Read Goan Konkani 1 Kor 11 Bible Online

1 Kor 11 - Goan Konkani bible

1 Kor 11

¹Zoso hanv Kristachi dêkh ghetam, toxem tumi mhoji dêkh gheiat.

²Tumi sodanch mhozo ugddas kortat mhonn ani hanvem tumkam dili ti xikovnn tumi samballtat mhonn hanv tumkam vakhanntam.

³Dôr-eka dadleachem mostok Krist, ani dôr-êkê bailechem mostok ticho poti, ani Kristachem mostok Dev: hem tumi zanno zal’lim mhaka zai.

⁴Zo dadlo aplem mathem dhampun prarthon korta vô Devacho sondêx dita, to aplea mostokacho man kaddta.

⁵Ufrattim, ji bail aplem mathem dhampinastana prarthon korta vô Devacho sondêx dita, ti aplea mostokacho man kaddta, kiteak ti sarki êkê kens-taslolê bailê bhaxen zata.

⁶Zôr êk bail aplem mathem dhampina, tôr tinnem aple kens tasche; punn zôr kens katrunk vô mathem tasunk êk lojechi vôst, tôr tinnem aplem mathem dhampchem.

⁷Dadlo Devacho rupkar ani porzôll dekhun, tannem aplem mathem dhampunk favo na; punn bail dadleacho porzôll.

⁸Tôr dadlo bailê thaun nhoi, punn bail ki dadlea thaun rochun ailea.

⁹Itlench nhoi, dadleak bailê pasot rochunk na, punn bailek ki dadlea khatir rochlea.

¹⁰Hea pasot, devdutank favo to man dakhounchê khatir, ani apunn aplea poti khal asa mhonn dakhounk-ui, tinnem aplem mathem dhampchem.

¹¹Tori astam, Somiachea uzvaddan hem ami somzunk pavtanv: zoxem dadlea vinnem bailek moluch na, toxench bailê vinnem dadleak-ui moluch na;

¹²kiteak bail dadlea thaun rochun ailea khorem, punn dôr-êk dadlo bailê thaun zolmun ieta, ani sogllench Deva thaun upzota.

¹³Tumich borem-korn chintun sangat: aplem mathem dhampinastam Devak prarthon korunk bailek sobta?

¹⁴Soimb legun kitem xikoita tem polleiat: dadleache lamb kens mhonn’lear tacho man kaddtat,

¹⁵punn baileche lamb kens ticho man vaddoitat, kiteak lamb kens bailek matheachi nhesônn koxi dil’le asat.

¹⁶Konn-ui hê vixim vivad korunk sôdta zalear, hanv itlench sangtam: amchê modem ani Devachê khõichêch sobhê modem oxench zaunk zai mhonn kainch na.

¹⁷ozun tumkam xikovnn diunchi asa: tumcheam zomatim vixim mhojean tumkam vakhannunk zaina, kiteak teô tumkam borem korchê bodlek tumkam odik vaitt kortat.

¹⁸Poilê svater, tumchi sobha bhòrta tedna tumchê modem futti asat mhonn hanvem aikolam, ani hem ogllem-unnem khorem-xem mhaka dista.

¹⁹Khorem mhonn’lear, tumchê modem konn visvas favo-aslelim tim ollkhun gheunchê khatir tumchê modem futti aslear borem.

²⁰Tumchi sobha bhòrta tedna, tumi kortat tem Somiachem Rat-Jevonn nhoi!

²¹Kiteak tumi jevunk lagtat tedna, ek-eklo, dusreank ravonastanam, ap-aplem jevonn jevun kaddta; hê porim konn-konn upaxim urtat ani konn-konn bebdim zatat.

²²Jevunk ani pieunk tumchim khaxa ghoram nant tumkam? Vô Devachê sobhechi beporva kortat tumi ani kãich na tankam lojek ghalunk sôdtat? Hanv tumkam kitem mhonn sangum? Xebaski dium? Hê vixim mhojean tumkam xebaski diunk zaina.

²³Somia koddli ji hanvem xikovnn ghetlea, tich hanvem tumkam dilea: Somi Jezu poradhin zalo tê rati Tannem unddo ghetlo,

²⁴Devak dhin’vasun to môddlo ani mhonn’lem: “Tumchê pasot somorpilea ti, hi mhoji kudd. Mhozo ugddas korun, hem tumi korat.”

²⁵Têch porim, jevonn zatôch Tannem patr ghetlem ani mhonn’lem: “Hem patr mhojea rogtan sthaplolo novo korar. Tumi hantlem pietat titlê-i pavtti, Mhozo ugddas korun, hem tumi korat.”

²⁶Kiteak tumi ho unddo khatat ani hea patrantlem pietat titlê-i pavtti, Somi ie porian Tachem moronn tumi porgott kortat.

²⁷Mhonntôch, jim konn favo na tê bhaxen ho unddo khatat ani Somiachea patrantlem pietat, tim Somiachê kuddicher ani rogtacher add guneanv kortat.

²⁸Hea pasot zonn-eklean poili apli chovkoxi korchi ani uprant ho Unddo khauncho ani hea patrantlem pieunchem.

²⁹Kiteak jim konn hi Somiachi kudd mhonn ollkhun ghenastanam khatat ani pietat, tim aplench khastichem formonn khatat ani pietat.

³⁰Hea pasot tumchê modem zaitim zannam piddevont ani osokt zal’lim asat ani sobar zannam morun geleant.

³¹Ami poili amchich chovkoxi kel’li zalear, amcher khastichem formonn poddchem naslem.

³²Punn sonvsara borabôr amcher khastichem formonn poddonam zaunk, Somi amkam nitt margar haddchê khatir amkam xistichi kosli-kosli xikxa dita.

³³Mhonntôch, mhojeam bhavam-bhoinnimnô, tumi jevnnak ektthãi zatat tedna, ekamekak ravat;

³⁴konnank-ui bhuk lagta zalear, tãnnim aplea ghora jevun ieunchem; tednam tumchi zomat tumcher khastichem formonn haddchi na. Urloleam proxnam vixim, hanv ietolom tedna gorjeche nem’ ditolom.