Read Goan Konkani 1 Kor 12 Bible Online

1 Kor 12 - Goan Konkani bible

1 Kor 12

¹Bhavam-bhoinnimnô, Povitr Atmo vantt’ta team denneam vixim, tumi tancho ôrth ollkhun ghetlolo mhaka zai.

²Tumi onbhavarti asleat tedna, konn-ui tumkam oddun vhoro tê vatten tumi zap-nasleleam puttlea-murtincheam pãiam-xim vetaleat.

³Tea pasot, tumi hem zanno zal’lim mhaka zai: Devachea Atmeachea preronnan konnachean “Jezucher Xirap poddum!”, oxem mhonnunk zaina; toxench Povitr Atmeachea preronna vinnem konnachean “Jezu Somi!” oxem ucharunk zaina.

⁴Tôr veg-veglle vorgunn asat, punn Atmo êkuch;

⁵veg-veglli seva asa, punn Somi ekloch;

⁶veg-vegllim kamam, punn soglleam sovem sogllem korta to Dev Ekloch.

⁷Zonn-ekleak Povitr Atmean dil’lem dennem dixtti poddta tem soglleanchea faideak.

⁸Atmea vorvim konnak Dev Apleam vorteam guttanchi zannvai dita; anink konnak teach Atmea pormannem dil’li ollokh kollit korcho vorgunn;

⁹teach Atmea udexim Dev konnak thir-ghôtt bhavart dita; anink konnak teach Atmea vorvim piddevon-tank borim korchem dennem;

¹⁰ekleak ochoriam korchem dennem; anink konnak Devacho sondêx diunchem dennem; anink konnak kitem Povitr Atmea thaun ieta ani kitem dusream atmeam thaun ieta hanchê modem ontôr vivekan ollkhunchem dennem; anink konnak vichitr bhasô ulounchem dennem; dusrea konnak team bhasancho ôrth diunchem dennem.

¹¹Hem sogott êk ani toch Atmo korta, mhonngê To Aplê khuxê pormannem zonn-ekleak iukt tem dennem vantt’ta.

¹²Khorench, zoxi mon’xachi kudd êk punn tika zaite sandhe astat, ani kuddiche soglle sandhe, puskoll zaun-ui, êk kudd ghôddtat, toso Krist.

¹³Kiteak mhonn’lear ami sogllim — zaum Judev zaum Grik, zaum gulam zaum svotontr mon’xam — êk kudd zaunchê khatir, amkam ekach Atmea udexim batism dila, ani heach Devachea Atmea udexim amam-somestank Devan dhadoxi keleant.

¹⁴Karonn kudd mhollear êkuch sandho nhoi, punn zaite sandhe.

¹⁵“Hanv hat nhoi, dekhun hanv kuddicho nhoi”, oxem pãi mhonnot zalear, to pãi kuddicho nhoi zata?

¹⁶“Hanv dollo nhoi, dekhun hanv kuddicho nhoi”, oxem kan mhonnot zalear, to kan kuddicho nhoi zata?

¹⁷Sogllich kudd fokot dollo zalo zalear, tika aikunk ietelem koxem? Ani sogllich kudd fokot kan zalo zalear, koso mhonn tichean vas-pormôll gheunk zatolo?

¹⁸Tea pasot, Aplê khuxê pormannem, Devan kuddint veg-veglle sandhe ghaleat.

¹⁹Te soglle êkuch sanhdo zal’lo zalear, kudd anink koxi asum-iet?

²⁰Khorem mhollear, zaite sandhe punn êkuch kudd.

²¹Mhonntôch “mhaka tuji goroz na”, oxem dollean hatak mhonnunk zaina. Toxench toklen-ui pãiank mhonnunk zainam “Mhaka tumchi goroz na.”

²²Punn portench, odik osokt distat te kuddiche sandhe chôdd gorjeche.

²³Ani unnea manache mhonn somzotanv team kuddicheam sandheank ami kherit man ditanv; toxench je amche sandhe nirmoriadi distat, tankam odik moriadin ami lêkhtanv;

²⁴moriadiche distat team amcheam sandheank osli goroz na. Jeam sandheank titlo man na-so dista, tankam odik man mellcho mhonn Devan kudd oxi ghôddlea;

²⁵hê porim kuddint koslich futt aschi nhoi, punn soglleam sandheamnim ekamekachi zoton korchi.

²⁶Eka sandheak dukh asa zalear, tachea vangdda soglle sandhe dukh sõstat; toxench eka sandheak man mell’lo zalear, tachea vangdda soglle sandhe khuxal zatat.

²⁷Tôr tumi sogllim borabôr Kristachi kudd, ani zonn-eklo, ap-aplê pavttin, ticho êk sandho.

²⁸Povitr-sobhent Devan zonn-ekleak ap-aplo zago nemun dila: poilê svater apostl; dusrê svater Devacho sondêx gheun to kollounk, provadi; tisrê svater bhavartachi xikovnn ditat tim; toxench torê- torechim dennim ghetleat tim: vismitam korchem dennem, pidda kaddchem dennem, loka-sevechem dennem, sobhecho karbhar cholounchem dennem, vichitr bhasanchem.

²⁹Tôr sogllinch apostl, vô provadi, vô xikovpi? Vismitam kortat kai sogllim zonn?

³⁰Pidda kaddchem dennem soglleank asa kai? Sogllim vichitr bhasô uloitat kitem? Team bhasancho ôrth diunk soglleank dennem asa bi?

³¹Odik vorteam denneancher tumcho iklo dovrat. Ani soglleam-vôn odik ut’tôm vatt ti hanv tumkam atam dakhoitam.