Read Goan Konkani 1 Kor 13 Bible Online

1 Kor 13 - Goan Konkani bible

1 Kor 13

¹Mon’xancheô ani devdutancheô porian bhasô hanv uloin punn mhaka pritimôg na zalear, mhojem ulovop vazun avaz korto ghanttê sarkem ani kinnkinnteam kansalleam sarkem.

²Devacho sondêx diunk provadeacho dennem mhaka asot, Devachim sogllim guddart sotam ollkhunk ani Tachê zannvaiecho tthav porian gheunk mhaka mellot, ani dongor êkê svater thaun dusrê svater kaddun dhaddunk bhavartachi iedi xokti mhaka asot, punn mhaka pritimôg na zalear hanv kãich nhoi.

³Mhojê lagim asa titlem-i goribank hanv vanttin, mhoji kudd legun lasunk diin, punn mhaka pritimôg na zalear, mhaka kosloch faido na.

⁴Pritimôg konnachem-i kitem-i sõsun ghevpi ani soglleam thãi doiall-movall; pritimogak nattkai na, boddai na, gorv-ui na;

⁵pritimôg dusream kodde mannsugen vagta-cholta ani kednanch aplo adav sodinam; pritimôg rag choddunk dina; koslench vaitt monant dhorinam.

⁶Konnem vaitt kelem mhonn pritimôg khuxal zaina, punn konn-ui borem korit tôr pritimôg sontosta.

⁷Pritimôg dusreancheô chuki-khoddi somzun gheta, dusreancher visvas dovorta, bhorvanso dhorun ravta, sosnnikaien ani dhiran soglleak fuddo korta.

⁸Devacho sondêx divpi provadi asat? Tôr tanchem kam’ somptelem; vichitr bhasô ulovpi asat? teô bond zateleô; konnak vidhya asa? ti ubon veteli; punn pritimôg êkuch kodinch sompcho na.

⁹Kiteak amchi vidhya opurnn, amchem provadiponn-ui opurnn;

¹⁰jem kitem sopurnraiek pavta tedna, opurnn tem sogllem nattak zatelem.

¹¹Hanv bhurgo aslom tedna mhojem ulovop, mhoji vagnnuk, mhojem chintop, sogllem bhurgeachem aslem; punn zanntê piraiek pavtôch, bhurgeponnachem sogllem hanvem soddun dilem.

¹²Atam tôr Dev amkam sarko spoxtt disona, punn fokot arxeantlean zal’lê porim Tachim kirnnam amkam pavtat; punn magir Devak ami rup-rup polletelenv. Atam mhaka asa ti Devachi ollokh opurnn; punn magir, Dev mhaka ollkhota tosoch, hanv-ui Taka sopurnnaien ollkhotolom.

¹³Hea amchea jivitant asat bhavart, bhorvanso ani pritimôg, he tin; punn hanchê modem ut’tôm to pritimôg!