Read Goan Konkani 1 Kor 14 Bible Online

1 Kor 14 - Goan Konkani bible

1 Kor 14

¹Mogan cholunk zaum-di tumcho vhoddantlo vhôdd husko. Punn tea bhair denneanchi-i axa dhôrat, bhov-korun Devacho sondêx diunchea denneachi.

²Jim konn vichitr bhasamnim uloitat, tim Deva kodde uloitat, mon’xam kodde nhoi, kiteak konn tankam somzonant; tôr tim Atmea udexim guddart sotanchi khobor kortat.

³Punn jim konn Devacho sondêx ditat, tim mon’xam kodde uloitat ani tankam bhavartant ghott kortat, dhiran bhortat ani buzvonn ditat.

⁴Vichitr bhasô uloitat tim apunn bhavartant ghôtt zatat; punn Devacho sondex ditat tim zomleleam bhavam-bhoinnink bhavartachi ghottai ditat.

⁵Tumi sogllim vichitr bhasamnim uloixeat zalear hanv khuxi, punn tea-vôn chodd tumkam soglleank Devacho sondêx diuncho vorgunn mell’lolo zalear hanv odik khuxal; zomleleam bhavam-bhoinnink bhavartant ghott korchê khatir, jem vichitr bhaxen sanglam tacho ôrth diunk konn asa zalear borem asa, punn sodanch vichitr bhasamnim uloitat tanchê poros Devacho sondêx ditat team mon’xank odik mol asa.

⁶Mhonntôch, mhojeam bhavam-bhoinnimnô, vichitr bhasamnim uloun hanv tumchê-xim ailom zalear, koslo faido tumkam? Kosloch na! Punn mhojea ulovopan Devachem koslem sot tumkam ugddapem kelem ani tacho ôrth tumkam ugto kelo, vô Devacho koslo sondêx tumkam haddlo, vô êk xikovnn tumkam dili zalear, tem tumkam faideak poddtelem.

⁷Jiv-naslolem vazontr dhôrlear toxench zata: veg-veglle svor dina zalear, vinno vô sitar koslo nad vazoita, tem koxem gomun ietelem?

⁸Toxench, tuturecho kherit avaz spoxtt aikunk iena zalear, konn mhonn zhuzachi toiari korunk lagtolo?

⁹Tumchê sobhent toxench ghòddta: uloitana somzunk ietat tosleam utramnim tumi uloinant zalear, tumi sangtat tem konnak gomtelem? Tumchim utram bexttim varear ubun vetelim.

¹⁰Hea jogant kitleô bhasô asat teô mhaka khobor na; punn tantleo, ôrth nasleli êk-ui na;

¹¹punn team-team avazancho ôrth hanv nokllom zalear, uloiteleank hanv porko zatolom ani uloitat tim-i mhaka porkim zatelim.

¹²Mhonntôch tumi-i, Povitr Atmeache vorgunn gheunk axetat dekhun, bhavam-bhoinninchem bhavar-tachem jivit ghott korunk upkartat team vorgunnancho odik-odik upêg korunk zaum-di tumchi axa.

¹³Tea pasot, jim konn êkê vichitr bhaxen uloitat, tãnnim apunn sangtat tacho ôrth diuncho vorgunn magcho.

¹⁴Kiteak hanv êkê vichitr bhaxen prarthon korin zalear, mhozo otmo prarthon korta punn mhojea gineanak adav na.

¹⁵Mhonntôch kitem? Mhojea otmea vorvim magnnem kortolom ani borabôr mhojea gineanan-ui magnnem kortolom; toxench mhojea otmean gaitolom ani borabôr mhojea gineanan-ui gaitolom.

¹⁶Na tôr, fokot tujea otmean Devak dhin’vastai zalear, tumchê zomatint vantto ghevpi chaltim mon’xam koxim mhonn tujê dhin’vasnnek “Amen” mhonntelim? Kiteak tum kitem mhonntai tem tim kãi nokllot.

¹⁷Dubhava vinnem tum Devak borê bhaxen dhin’vastai; punn team dusream mon’xanchea bhavartachea jivitak ghottai mellona.

¹⁸Tumam-soglleam poros chodd vichitr bhasamnim hanv uloitam mhonn Devak dhin’vastam;

¹⁹tori bhavam-bhoinninchê sobhent xikovnn diunchê pasot, mhojea gineanan panchuch utram uloun hanv khuxi zato aslom.

²⁰Bhavam-bhoinnimnô, chintpan ballkam sarkim zaum nakat, punn vikottaien ballkam sarkim zaiat, chintpan vaddlelim mon’xam zaiat!

²¹Somurtint oxem boroil’lem asa: “Vichitr bhasamnim ani videxeanchea onttamnim Hanv hê porjê kodde uloitolom, ani, tori astana, tim Mhaka kan diunchim nant, mhonnta Sorvespor.”

²²Mhonntôch vichitr bhasamnim ulouncho vorgunn bhavarteank nhoi, punn onbhavarteank êk khunna; ufrattim, Devacho sondêx diuncho vorgunn onbhavarteank nhoi, punn bhavarteank khunna.

²³Mhonntôch soglli sobha bhòrta tedna sogllim vichitr bhasamnim uloitat mhonn somzat; tea vellar bhavartachi sarki xikovnn naslelim vô onbhavarti mon’xam thõi pavlim zalear, tumkam pixem laglam mhonn mhonnchim nant?

²⁴Punn sogllim provadiponnacho sondêx ditat zalear, ani tedna êk onbhavarti vô bhavartachi sarki xikovnn naslelim konn-konn thõi pavtit tôr, tim aikotat titlea-i vorvim apleach ontoskornnachi poristhiti tankam topasunk poddtelem ani tim aplich mon’subi korunk pavtelim,

²⁵ani tanchea kallzache gutt uzvadda ietele; ani oxem, Dev khorench tumchê modem asa mhonn ollkhun, tim saxttagim poddtelim ani Devak bhôztelim.

²⁶Mhonntôch kitem, bhavam-bhoinnimnô? Tumi zomtat tedna, konn-konn ek stotr gaitat, dusrim konn êk xikovnn ditat, anink konn Devachi ievzônn ugti kortat, Ozun konn-konn êkê vichitr bhaxen uloitat, ani dusrim konn tichi somzonni ditat. Hem sogott tumchem bhavartachem jivit ghott korunk zaum-di.

²⁷Vichitr bhaxen konn-konn uloitat zalear, dogam vô chodduch zalear tegam zannam ulounk fuddem sorchim, ani tem-i zalear eka pattlean ek, ani konna-i eklean somzonni diunchi.

²⁸Punn somzonni diunk konn na zalear, sobhent tim ogim ravchim ani apnna ani Deva sovem ulounchem.

²⁹Provadiponnachem dennem ghetlelim astit zalear, dogam vô tegam zannamnim Devacho sondêx diuncho ani heram somestamnim team sondexank chit diun aikunchem.

³⁰Lagim bosun aslolea dusrea konnak Devachi ievzônn ugti zali zalear, tachê adim uloitelean ogi ravchem.

³¹Devacho sondêx sogllea-mnim dium-ieta, punn ek-eklean ap-aplê pallien; tedna soglleank kosli tori xikovnn mellteli, ani soglleancho dhir vaddtolo.

³²Provadiponnachem ulovop tea-tea provadeachê vô provadinnichê adhin asunk zai,

³³kiteak Dev goddboddacho Dev nhoi punn xanti-somadhanacho. Zoxem bhoktancheam soglleam sobhamnim chal asa,

³⁴toxem tumchê-i sobhent bailamnim ogi ravchem, kiteak thõi ulounk tankam rojea dil’li na: Somurt-ui sangta tea pormannem, fuddariponn tanchea hatant na.

³⁵Kitem-i teô zanna zaunk sôdtat zalear, ghqra vochun tãnnim apleam ghovam kodde nimgun gheunchem. Sobhent êk bail uloit zalear, ti apli ixim’ hogddaita.

³⁶Kitem chint’tat tumi? Devachem utor tumchê koddsun bhair sorlam kitem? Vô tumkanch tem pavlam kai?

³⁷Konn-ui apunn êk provadi mhonn somzota, vô apnnank Atmean dil’lo êk vorgunn asa mhonn chint’ta zalear, tãnnem, hanv tumkam boroitam tem Somiachi adnea mhonn ollkhun gheunchem.

³⁸Konn zôr hem ollkhun ghenant, Dev-ui tankam ollkhun ghenam mhonn sangchem.

³⁹Mhonntôch, bhavam-bhoinnimnô sondêx diunk tumkam axa asum; teach borabôr vichitr bhasamnim ulounk addvaddum nakat.

⁴⁰Punn sogllem mannsugen ani manddavollin zaum-di.