Read Goan Konkani 1 Kor 15 Bible Online

1 Kor 15 - Goan Konkani bible

1 Kor 15

¹Bhavam-bhoinnimnô, hanvem tumkam porgott kelam tea xubhvhortomanacho tumkam atam ugddas kortam; tench tumi manun ghetlam ani thir bhavartan tem tumi samballtat;

²tachêch vorvim tumkam taronn mellta, tumi tantunt thir rauxeat zalear. Na tor tumcho bhavart nirfoll.

³Borem tôr, mhaka porgott kelam toxench, hanvem tumkam choddan-chodd mhotvachem porgott kelam tem hem: ki Povitr Pustokam pormannem Krist amcheam patkam pasot melo,

⁴ani Taka nikhipilo, ani Povitr Pustokam pormannem tisrea disa Devan Taka punorjivont kelo;

⁵To Kefasak ani uprant barank dixtti poddlo.

⁶Tea uprant, ekach farak, pãixeam-vôn choddam amcheam bhavam-bhoinnink To dixtti poddlo; hantlim chodd zannam ozun jivim asat, punn thoddim morun gelim.

⁷Magir dixtti poddlo Jakobak ani tea uprant soglleam apostlank.[1]

⁸Soglleam pattlean, hea ovchituch bollan zolma haddleleak, mhaka-i To dixtti poddlo.

⁹Apostlam modem soglleam-vôn hanv hinn-holko; Devachê povitr-sobhek hanvem dhumallo dilo dekhun, mhaka apostlachem nanv porian favo na.

¹⁰Punn, Devachea funkeachea dennean, hanv khoro apostl, ani Tannem mhaka favo kel’lem dennem nirfoll zaunk na. Portench zalear, heram soglleam poros hanvem odik chôdd vavr kela; khorem mhollear to vaur mhoje ostongim nhoi zalearui, to vaur mhojê sovem asa tea Devachea dennea vorvim.

¹¹Punn gorjechem tem hem: te zaum vô hanv zaum, oxench ami porgott kortanv, ani oxench tumi bhavartan mandun ghetlam.

¹²Kristak Devan mel’leantlo punorjivont kela mhonn ami porgôtt’tanv zalear, mel’leanchem punorjivontponn na mhonn tumchê modlim thoddim zannam sangtat tem koxem tôr?

¹³Mel’leanchem punorjivontponn nanch zalear, Devan Kristak-ui punorjivont korunk na.

¹⁴Ani Kristak Devan punorjivont korunk na zalear, amchi porgôttnni pokôll, ani tumcho bhavart-ui pokôll.

¹⁵Itlench nhoi: ami Devache khotte sakxidar mhonn sangchem poddlem, kiteak Devan Kristak punor-jivont kela mhonn ami sakxi dilea; punn mel’leam mon’xank Dev punorjivont korcho na mhonn khorem zalear, Devan Kristak-ui punorjivont korunk na, oxem mhonnchench poddlem. Mhonntôch, Devan Kristak punorjivont kela mhonn sangun ami dil’li sakxi Devacher add sakxi zali.

¹⁶Mel’leam mon’xank Dev punorjivont korcho na mhonn khorem zalear, Kristak-ui Devan punorjivont korunk na.

¹⁷Ani Devan Kristak punorjivont korunk na zalear, tumcho bhavart sarko nirfôll, tumi ozun tumcheam patkamnim asat.

¹⁸Mhonntôch jim Kristacher bhavart dovrun meleant, tancho ibadd zalo.

¹⁹Kristacher ami dovortanv to bhorvanso fokot hea jivitak amkam faideacho zalear, soglleam mon’xam-vôn amchi gôt odik churchureanchi.

²⁰Punn Kristak Devan Taka mel’leantlo punorjivont kela tem sot ani hachi khatri koxi morun geleant tankam-i Dev punorjivont kortolo.

²¹Kiteak, zoxem eka mon’xa vorvim moronn ailam, toxench eka mon’xa vorvim mel’leanchem punorjivontponn-ui ailam.

²²Hôi, zoxem Adanva sovem sogllim mortat, toxench Krista sovem soglleank Dev punorjivont kortolo.

²³Punn sogllim Devan tharail’lea kroma pormannem: poilo, Malgoddo mhonn, Krist; magir, Krist ietolo tedna, Kristachim tim sogllim.

²⁴Uprant sompadnni: tedna To soglleam Pordhanancho ani soglleam Odhika-riancho ani Podviancho bhosm korun, Raj, Deva, Aplea Bapachê, adhin To kortolo.

²⁵Kiteak soglleam Tacheam dusmanank Tacheam pãiam tolla Dev ghalit porian, Krist razvôtt choloitolo: hi Devachi ievzônn.

²⁶Bhosm zavpacho dusmanam modlo nimanno dusman mhonn’lear moronn.

²⁷Khorench, Povitr Pustokacheam utramnim, “Devan sogott Tacheam pãiam tolla ghalam.” Sogott Tacheam pãiam tolla ghal’lem asa mhonntana, Povitr Pustok Devak mat bhair dovorta, kiteak Tannem ki sogott Kristachea pãiam tolla ghalam.

²⁸Sogott Tacheam pãiam tolla ghalun zalea uprant, toch Put Apleam pãiam tolla sogott ghalam Tachê adhin, mhonngê Aplea Bapachê adhin, Apnnakuch kortolo. Hê porim Dev Ekloch Eklo Apunnuch zatolo sogtta-sorvanchi Bhorti ani Sompadnni.

²⁹Na zalear, mel’leam khatir batism ghetat tankam koslo faido asa zait? Dev zôr mel’leam mon’xank punorjivont korchoch na, tanchê khatir kiteak mhonn batism ghetat?

³⁰Ami-i zalear, kiteak mhonn ami ghoddiechê ghoddiê sonkoxttamnim jietanv?

³¹Bhavam-bhoinnimnô, amchea Somia Jezu Krista sovem tumchê khatir zo mhaka obhiman bhògta, tachean soput gheun hanv tumkam sangtam: dôr disa mornnachea sonkoxttant hanv asam.

³²Fokot mhojem mon’xasoimbachem boll dakhounk Efezant team savzam kodde hanv loddai korunk pavlom zalear, koslo faido mell’la mhaka? Dev zôr mel’leam mon’xank punorjivont korcho na, Povitr Pustokar melltat team utram pormannem, “borench khaum-ia ani pieum-ia, kiteak faleam ami mortolenv.”

³³Fosonakat: khotteam sangateank gheun bhonvxi, tujench borem jivit padd korxi.

³⁴Utthat, soirannar ieiat ani tumchi vankddi vatt soddun diat! Tumchê modleam thoddeank Devachi sarki ollokh na: loz tumkam, punn hem tumkam hanvem sangchench poddta.

³⁵Punn konn-konn oxem mhonntit: “Meleant tankam Dev koxim punorjivont kortolo? Kosli kudd gheun tim portim ietelim?”

³⁶Arê pixea! Jem bim tum vomptai, tem melea xivai taka novo jiv mellona.

³⁷Tum vomptai tem bim magir dixtti poddtelem tem nhoi, punn fokot bim, mhonnum-ia gonvachem vô anink koslem-i.

³⁸Tea biak Dev, Apnnench tharailam toxem, ang ditolo, ani dor-eka jin’sachea biak ap-aplem ang.

³⁹Sogllem mas ekuch mas nhoi; mon’xanchem mas ek, mon’zatinchem mas dusrem, suknneanchem mas vegllem, ani masllêchem anink-ui vegllem.

⁴⁰Prithver kuddi asat toxench ontrallar-ui kuddi asat; ontralla veleam kuddink sundorai asa ti êk, ani prithver asat team kuddinchi sundorai veglli.

⁴¹Suriacho porzôll êk, chondrimacho porzôll dusro, ani noketrancho porzôll tori vegllo. Ani noketram modem porian porzôll veg-vegllo.

⁴²Mel’leanchem punorjivontponn-ui toxench: biam vori ami vomptanv ti kudd vinaxi, Dev voir kadta ti ovinaxi;

⁴³ami vomptanv tem hinn-holkem, Dev voir kaddta tem mhoimen bhòrlolem; ami vomptanv tem osokt, Dev voir kaddta tem xoktivont;

⁴⁴ami vomptanv ti, soimbik kudd; Dev voir kaddta ti, otmik kudd. Soimbik kudd asa, toxich otmik kudd asa. Povitr Pustokar boroil’lem asa tea pormannem,

⁴⁵“poilea mon’xak, Adanvak, Devan êk jivo monis kelo”; nimannea Adanvak Tannem Jivit-divpi Atmo kelo.

⁴⁶Punn poilo aila to otmik nhoi, punn soimbik; uprant ailo to, otmik.

⁴⁷Poilo monis, zomni thaun ghôddlolo to, matiecho; Dusro Monis sorgincho.

⁴⁸Zoso poilo matiecho to, toxim matiechim tim tachê sarkim; ani zoso ho Dusro sorgincho, toxim sorginchim tim Hachê sarkim.

⁴⁹Mhonntôch, zoxem ami matiechea mon’xachem sarkem gheun aileanv, toxench sorginchea Mon’xachem sarkem ami ghetelenv.

⁵⁰Bhavam-bhoinnimnô, hanv sangunk sôdtam tem hem: amchea masa-rogtak Devachea Rajeachem daiz gheunk tank nam: vinaxi soimbak ovinaxiponn mellunk xokti na.

⁵¹Aikat, hanv khobor kaddtam ti eka guddart sotachi: ami sogllim morchim nanv, punn êkê ghoddiê bhitôr, dollo bittbitt’ta mhonnosôr, nimannê tuturechea sadar Dev amam-sogllean-chem rupantor kortolo. Tôr êk tuturi vaztoli ani mel’leam mon’xank Dev ovinaxi soimban punorjivont kortolo ani oxem Toch amchem rupantor kortolo.

⁵²

⁵³Kiteak vinaxi tem ovinaxi zaunchem mhonn ani morun veta tem omor zaunchem mhonn Devachi khuxi.

⁵⁴Vinaxi tem ovinaxi zalea uprant, ani morun veta tem omor zalea uprant, Povitr Pustokar boroil’lem asa tem utor ghoddon ietelem: “Zoit mell’lem, mornnacho bhosm zalo!”

⁵⁵“Ê Mornna! Tujem zoit khõi atam? Ê Mornna! Tujem kuns khõi anink urlam?”

⁵⁶Moronn haddta tem kuns mhollear patok, ani patkak boll dita ti Somurt.

⁵⁷Amchea Somia Jezu Krista vorvim Dev amkam zoit ditach: tôr Devak amcho dhin’vas gavum-ia!

⁵⁸Mhonntôch, mhojeam bhov priticheam bhavam-bhoinnimnô, sodanch ghott ravat, thir ravat, odik-odik hurben Somiachi seva korit ravat. Tumcho koxtti vavr Somi bhov follabhorit kortolo mhonn monant dhôrat.