Read Goan Konkani 1 Kor 16 Bible Online

1 Kor 16 - Goan Konkani bible

1 Kor 16

¹Bhoktank adar diunchê khatir danam ektthãi korchê vixim, Galaxientleam povitr-sobhank hanvem dileat tech nem’ tumi-i samballat.

²Dor satolleachea poilea disa zonn-eklean ap-aplê tanki pormannem kitem-i ganttik marun kuxin dovorchem; hê porim, hanv tumchê-xim ietôch, vorgonni kaddchi anink goroz poddchi na.

³Hanv tumchê-xim ietôch tumchi maniotai asleleam mon’xam kodde hanv potram ditolom ani tanchê udexim tumchim danam Jeruzaleak dhaddtolom.

⁴Hanvem-i vechem poddlem zalear, te mhojê borabôr vetele.

⁵Maxedonientlean mhaka vochunk zai, tôr Maxedoniek bhett dilea uprant hanv tumchê-xim ietolom.

⁶Tumchê modem ghoddiê hanv thoddo vêll ravtolom, ani ghoddiê hinvallo porian tumchêch modem sartolom; uprant khõisor-ui hanv vochon zalear, mhojê fuddlê vattek tumi mhaka adar ditelet mhonn ravtam.

⁷Fokot vatter thoddo vêll tumkam bhett diunchi mhaka khuxi na. Somiachi khuxi zalear, tumchê modem boroch vêll sarunk sôdtam.

⁸Pon’nasvea Disachea Porbe porian hanv Efez xarant ravtolom;

⁹Khorench hanga zaito faideacho vavr korunk dar ugtem asa, punn thõi virôdh kortelim-i zaitim zannam asat.

¹⁰Timot tumchê-xim iet zalear, taka bhirant vô husko asunk koslench karonn dium nakat; to-i mhojêch bhaxen Somiachem kam’ korta.

¹¹Konnench tachi beporva korchi nhoi. Mhojê-xim borê bhaxen portun ieunk taka adar diun vatter ghalat: kiteak amcheam bhavam-bhoinnim borabôr tachi vatt polleun asam.

¹²Amchea bhava Apol’lo vixim hem sangchem asa: dusream bhavam-bhoinnim borabôr tumkam bhett di mhonn hanvem tachê lagim prarthun maglem, punn oxem korunk taka atam bilkul khuxi na zali, bori sond’ mellot tedna to tumchê-xim ietolo.

¹³Zagrut ravat, bhavart thirponnan samballat; kalljidarponn dakhoiat, ghott ravat;

¹⁴Tumi kortat tem sogllem pritimogan korat.

¹⁵Bhavam-bhoinnimnô, anink êk vôst tumchê lagim magchi asa: Istefanak ani tachea kuttumbak tumi ollkhotat. Akaient soglleam-vôn poilim tãnnim amcho bhavart dhôrlo, ani Devacheam bhoktanchê sevek tãnnim aplem jivit bhettoilam.

¹⁶Tumi-i tumchê pallien, osleam mon’xanchi ani tanchea vangdda ghas gheun vavr kortat, tanchi seva korat.

¹⁷Istefanas, Fortunat ani Akaikus pavle mhonn mhaka khub anond zala, kiteak tumi hanga nant mhonntôch, tumchea zagear tãnnim mhaka dhadoxi kelo.

¹⁸Kiteak tãnnim mhojem ani tumchem-i somadhan kelem. Osleam mon’xanchi tumi opurbai korun dakhoiat.

¹⁹Aziechea prantantleô povitr-sobha tumkam noman kortat. Akuila ani Priska ani tanchea ghorant bhòrta ti povitr-sobha Somia sovem vhoddê ixttagotin tumkam vicharta.

²⁰Sogllim bhavbhoinn tumkam nomoskar kortat. Somiachea ekvottant tumi bhavbhoinn mhonnun ekamekak tumchea mogachi khunna diat.

²¹Mhojeach hatan hi vôll hanv boroitam: Pauluchem noman tumkam.

²²Konn-ui Somiacho môg korinant zalear, tanchem kotta! Marana tha.

²³Somi Jezu tumkam Apli dulobai dakhoum.

²⁴Jezu Kristachea ekvottant tumam-somestancho hanv môg kortam.