Read Goan Konkani 1 Kor 2 Bible Online

1 Kor 2 - Goan Konkani bible

1 Kor 2

¹Bhavam-bhoinnimnô, tumchê mo dem hanv ailom tedna, Devan ugto kel’lo gutt hanvem tumkam porgôtt kelo, punn sundorbhaxecho porzôll fankoun vô mhojich unch zannvai dakhoun to hanvem porgottunk na.

²Tumchê modem ailom tedna, Jezu xivai, mhonngê khursar marlelea Krista xivai, soglli dusri ollokh kuxin dovrunk hanvem tharailem.

³Hanv tumchê modem aslom tedna, mhoji osoktai ollkhun ani boroch bhieun ani kampun aslom.

⁴Mon’xanchê zannvaiecheam utramnim tumkam jikun gheunk nhoi, punn fokot Atmeachê xoktin tumkam khatri diunk hanv uloilam ani mhozo nirôp hanvem porgôttla.

⁵Mhonntôch tumcho bhavart mon’xanchê zannvaiechê buniadir nhoi, punn Devachê xokticher bandlolo asa.

⁶Bhavartant sopurnnaiek pavleleam mon’xank uloitana, ami zannvaiênuch uloitanv punn hi zannvai hea kalla-iugachi nhoi, vô nattak zaunk veteleam hea kalla-iugacheam pordhananchi-i nhoi;

⁷punn ami porgôtt kortanv ti zannvai Devachi guddart zannvai: ti lipoun doverleli zannvai; ti Devan kallam-iugam adim amchê mhoimê khatir fuddench tharail’li.

⁸Hea kalla-iugachea eka pordhanak porian ti kollit zaunk na; kiteak, ti tankam kollit zal’li zalear, mhoimechea Somiak te khursar marche nasle.

⁹Punn “Devan Apnnacho môg korteleank toiar kelam tem dolleamnim polleunk na, kanamnim aikunk na, mon’xachea monan attapunk na.”, oxem jistuch Povitr Pustokant boroilelem asa tea pormonnem,

¹⁰heô vostu Devan amkam Aplea Atmea udexim ugddapeô keleat. Kiteak mhonn’lear Atmo sogttacho, Devacho porian, tthav gheta.

¹¹Tujea monant kitem asa tem zannoi to, tum to ekloch, ani Devachea monant kitem asa tem, zanna To, Devacho Atmo Ekloch.

¹²Tôr Devan amkam dileant tim dennim ollkhunk Deva thaun ieta to Atmo ami ghetla, sonvsaracho atmo nhoi.

¹³Hea pasot, mon’xanchê zannvaien xikoil’leam utramnim nhoi, punn Povitr Atmean amkam xikoil’leam utramnim heanch denneam vixim ami uloitanv: Atmo ghetla tankam Atmeanuch xikoil’leam utramnim heam denneancho ôrth sangtanv.

¹⁴Jeam mon’xank Atmo mellunk na, tim Devachea Atmea thaun ieta tem ghenant; hem tankam ek pixeponn, ani tim, tem ollkhunk xokonant, kiteak Atmeachêch vorvim heô vostu topasun kaddunk zata.

¹⁵Punn jeam mon’xank Atmo mell’la, tanchean soglleam vostuncho ôrth topasun tharaunk zata: punn heam mon’xancho ôrth konnacheanuch tharaunk zaina.

¹⁶Kiteak, Povitr Pustokacheam utram pormannem, “Sorvesporachem mon konnem tori ollkhun kaddlam? Konnachean Taka budh diunk zait?” Amkam zalear, Kristachem mon mell’lam.