Read Goan Konkani 1 Kor 3 Bible Online

1 Kor 3 - Goan Konkani bible

1 Kor 3

¹Bhavam-bhoinnimnô, Atmo mell’la team mon’xam kodde hanv uloitam toxem, tumchê lagim mhojean ulounk zaunk na; punn mon’xa-soimbacheam vondovnneam pormannem cholteleam mon’xam lagim koxem, tumchê kodde hanv uloilam; kiteak Krista sovem tumi ozun supurlim ballkam.

²Dud hanvem tumkam pieunk dilam, sukem khann tumkam diunk na, kiteak toslem khann-jevonn gheunk tumchean tedna nozo aslem; ani ozun-ui nozo.

³Kiteak tumi ozun mon’xa-soimbacheam vondov-nneam pormannem jietat. Tumchê modem nattkai ani zhogddim vostat mhonntôch, tumchea jivitachi chal mon’xasoimbacheam vondovnneanchi zali ani tumi fokot masa-rogtachim mon’xam zaleant, oxem nhoi?

⁴Kiteak, jedna tumchê modlo konn-konn mhonnta ‘hanv Paulucho’, ani dusro mhonnta ‘hanv Apol’locho’, tedna tumchi chal fokot masa-rogtacheam mon’xanchi nhoi?

⁵Apol’lo konn? Ani Paulu konn? Tumkam bhavart dila te sevok ami; ani zonn-ekleachi seva fokot Somian dilam tea dennea pormannem.

⁶Hanvem roilem, Apol’lon ximplem, punn Devan vaddoilem.

⁷Tôr roitat vô ximptat tim mhotvachim nhoi; vaddoita To ki mhotvacho, ani Ho mhonn’lear Dev.

⁸Konn-konn roitat, dusrim konn-konn ximptat, punn roitoleam ani ximptoleam modem ontôr na; zonn-eklean kam’ kelam tea pormannem Dev taka mozuri ditolo.

⁹Kiteak ami ekamekak hat diun kam’ kortanv, punn kam’ Devachem, ani tumi tem Devan roil’lem xet. Tea bhair, tumi Devan bandlelem ghor.

¹⁰Devan mhaka dil’lem dennem vaprun, eka gholl’lelea ghor-bandpea bhaxen, hanvem buniad ghali, ani atam tê buniadir dusro konn bandta. Punn apunn koxem bandta tacher zonn-eklean lokx ghalchem.

¹¹Kiteak ghal’li asa ti buniad Jezu Krist: hichê bhair, anink êk buniad konnachean ghalunk zaina.

¹²Hê buniadicher konn bandta zalear, to bhangar vô rupem vô moladik mannkam vaprun bandit; vô to lankudd vô tonn vô korodd vaprun bandit.

¹³Punn zonn-ekleacho vavr koslo to dakhôl kortolo to Sorvesporacho Dis udetolo; ho Dis uzo gheun ietolo ani ho uzo dôr-eka mon’xacho vavr kosak laitolo.

¹⁴Buniadir bandlelem konnachem kam’ ubem urlem zalear, taka mozuri mellteli.

¹⁵Zacho vavr ulpon vochot, taka nuksann ietelem; punn to apunnuch ujeantlean vattovl’lea porim taronn ghetolo.

¹⁶Tumi Devachem mondir ani Devacho Atmo tumchê sovem tthikann korun asa mhonn tumkam khobor na?

¹⁷Zôr konn-ui Devachea mondirachem nisontton kortit, tôr Dev tancho nas kortolo; kiteak Devachem mondir povitr, ani tumich hem mondir!

¹⁸Konnench apnnakuch fosoum noiê; tumchê-bhitorlim konn-ui hea kalla-iugacheam nemam pormannem apunn zannar mhonn somzotat zalear, tãnnim khorench zannar zaunchê khatir pixim zaunchem poddtelem.

¹⁹Karonn Deva mukhar hea sonvsarachi zannvai ek pixeponn, kiteak Povitr Pustokar oxem boroil’lem asa: “To, zannarank tanchêch naddbudhi vorvim, dhôrta.”

²⁰Ani dusrê kodden oxem boroilolem mellta: “Zannar mon’xanchim chintnam polkim mhonn Sorvespor zanno.”

²¹Mhonntôch khõicheach mon’xa-chem nanv gheun, konnench apli vhoddvik gazounchi nhoi.

²²Khorem mhonn’lear, sogllem tumchem: Paulu, vô Apol’lo, vô Kefas, sonvsar, vô jivit, vô moronn, atancho ani fuddlo kall — hem sogllem tumchench;

²³punn tumi Kristachim, ani Krist Devacho.