Read Goan Konkani 1 Kor 4 Bible Online

1 Kor 4 - Goan Konkani bible

1 Kor 4

¹Ami Kristache sevok ani Devache gutt porgott korunk nemlele karbhari mhonn mon’xamnim amkam lekhche.

²Dôr karbhari visvaxi zauncho: hoch tankam ascho gorjecho gunn.

³Tumi vô mon’xanchê koslê-i neaisobhen mhoji nit keli mhonn hanv porva korich na; mhoji nit hanvuch porian korinam.

⁴Mhojem ontoskornn nitoll asa khorem, toripunn haka lagun hanv niropradi mhonn nirnnoi ghena: mhoji nit korunk asa To ekloch Somi.

⁵Hea pasot adim-fuddench Somi ie porian, konnachich vô kiteachich tumi nit korum noiê. Tea disa kallokant liplelem asa tem sogott To uzvadda haddtolo, ani soglleam monanchim kolpona ugddapim kortolo. Tedna Dev zonn-ekleak favo ti vakhann’nni ditolo.

⁶Bhavam-bhoinnimnô, hanvem sanglam tem tumchea faideak mhaka ani Apol’lok lailam. “Boroil’lem asa tachê bhair vochum nakat.” Hê mhonn’nnecho ôrth amkam lavun samballat. Konnench gorvan bhoron ekleacho pattlav korun dusreachi beporva korchi nhoi.

⁷Tôr ieram poros tum vhôdd mhonn tuka konn dhôrta? Dusrea koddchem gheunk naslolem tujê kodde asa kitem? Ani tunvem tem ghetlam zalear, gheunk naslolê bhaxen tuji boddai kiteak?

⁸Hôi, tumi dhadoxi zaleant! Tumi girest zaleant! Amkam konnxeak ghalun, tumi razvôtt cholounk lagleant! Xabas! Khorench tumi raiponn cholounk pavchim asleat! Tednam ami-i tumchea vangdda raiponn choloito aslenv!

⁹Punn sot kitem? Amam apostlank Devan nimanno vôrg dila mhonn mhaka dista; ami mornnachem formonnn poddleleam mon’xam porim zalenv; hôi, sogllea sonvsaran—devdutamnim ani mon’xamnim — amkam kenddnneancho mal korunk tanchê mukhar amkam ube kele.

¹⁰Krista khatir ami pixe, punn tumi Krista sovem xannim; ami osokt, punn tumi xoktivont; tumkam obhiman, punn amkam beman.

¹¹Hê ghoddiê porian ami bhuk ani tan sôstanv ani sumarachim angostram nastana bhonvtanv; ami mar khatanv; ghor-dar amkam na;

¹²hat-pãi zhoroun ami koxttotanv; galli sonvun amkam opman’tat tedna, ami axirvad ghaltanv; dhumallo amkam ditat, punn to ami sõstanv;

¹³amkam xiraptat tedna, ami dulobaien uloitanv; ani az porian hea sonvsaracho kochro ani sogllea somazacho mhêll koso amkam dhôrtat.

¹⁴Tumkam lojek ghalunk mhonn hem hanv tumkam boroina; punn mhojim bhov mogachim bhurgim koxim tumkam budh diunk hem boroitam.

¹⁵Khorench, tumkam Krista sovem hozaramnim porian guru asle zalear-ui, tumkam zaite bapui nant; kiteak Jezu Krista sovem, xubhvhortomana udexim, hanvench tumkam zolm dila.

¹⁶Mhonntôch mhoji dêkh gheiat mhonn tumkam ulo kortam.

¹⁷Heach pasot Timotak hanvem tumchê-xim dhaddla; to Somia sovem mhozo chôdd mogacho ani visvaxi put. Krista sovem hanvem dhôrlolê vattecho to tumkam ugddas kortolo. Tich vatt sogllê kodden dôr-êkê povitr-sobhent hanv xikoitam.

¹⁸Hanv tumkam bhett diunk ieuncho na mhonn dhorun, tumchê modlim thoddim zannam gorvan ful’leant.

¹⁹Tori Somiachi khuxi zalear, hanv tumkam bhett diunk rokddo ietolom; ani tedna gorvan ful’leleanchim utram nhoi punn podvi kitli ti polletolom.

²⁰Kiteak utrancher nhoi punn podvecher Devachem raj dhòrlelem asa.

²¹Tumkam kitem zai? Hatant boddi gheun hanvem tumchê-xim ieunchem, vô môg ani dulobai gheun ieunchem?