Read Goan Konkani 1 Kor 5 Bible Online

1 Kor 5 - Goan Konkani bible

1 Kor 5

¹Tumchê modem pozoddponn vosta mhonn sogllo lôk sangta; videxeam modem porian vosonam toslem pozoddponn! Kiteak mhonn’lear konn-eklo aplea bapaichê dusreponnim bailek gheun ravta!

²Ani tori tumi gorvan ful’lolim asat! Oslem kortub kelam taka tumchê modlo bhair ghalun, tumi rudon kel’lem zalear odik borem zatem.

³Zorui kuddin hanv tumchê thaun pois asam, monan hanv tumchê modem hajir asam, ani tumchê modem aslelêch porim, oslem pozddem kortub kelam tacher hanvem kheastichem formonn marlem.

⁴Amchea Somia Jezuchea nanvan tumchi zomat bhòrta tedna, hanv-ui monan tumchê zomatik hajir astolom; ani tedna amchea Somia Jezuchê podven

⁵tea mon’xachê kuddicho nas zaunchê khatir taka Soitanachê adhin korunk zai; oxem Somiachea Disa tachea otmeak taronn melltelem.

⁶Tôr tumchi boddai polki! Ilo-so khomir sogllem kaloil’lem pitt ambttaita mhonn tumkam khobor na?

⁷Tôr tumchea jivitantlo pornno khomir bhair uddoiat, khomir nastana kaloil’lem pitt zaiat, kiteak amcho Paskacho Utsôv pavlo: Kristak marlolean, amchea Paskanchea Menddreachem bolidan zalem.

⁸Mhonntôch Paskanchea Utsovacho somarombh korum-ia ani khotteponnacho khomir aslele undde gheun nhoi, punn khomir-naslele, mhonngê satvik jinneche ani khore-ponnache, undde gheun zaum-di amcho somarombh.

⁹Pozddea jivitacheam mon’xanchê songotik poddum nakat mhonn mhojea adlea potracher hanvem tumkam boroilam.

¹⁰Hea sonvsarantleam soglleam pozddeanchi vô svarteanchi vô nagovnneanchi vô puttleam-murtink bhôzteleanchi hanv khobor korinaslom; oxem zal’lem tôr, tumkam ho sonvsar soddun par kaddchi poddtoli asli.

¹¹Hanv tumkam sangunk sôdtalom tem itlench: amchê sobhentlim bhavbhoinn zaun-ui, konn-konn pozddim, svarti, vô puttleam-murtink bhozpi, vô dusrea-nchem vaitt uloitat toslim, vô bebdim, vô nagovnnim zalear, osleam mon’x-anchê songotik tumi poddonakat, tanchea vangdda jevunk porian bosonakat.

¹²Amchê sobhê bhair asleleanchi nit korunk mhaka kiteak poddlam? Bhitôr asleleanchi ki nit korunk tumcho kaido, oxem nhoi?

¹³Bhair asleleanchi nit kortolo to Dev. “Hea noxttea mon’xak tumchê modlo bhair uddoiat”, oxem Povitr Pustok sangta.