Read Goan Konkani 1 Kor 7 Bible Online

1 Kor 7 - Goan Konkani bible

1 Kor 7

¹Tumi mhaka boroun ghaleat team proxnanchi khobor korum-ia. Konn-êk dadlo bailê kodde logn zaina zalear vaitt nhoi.

²Punn oxem kamcharant poddot mhonnun, dôr-eka dadleak apli bail aschi ani dôr-êkê bailek aplo ghôv.

³Dadlean aplê bailê thãi ani toxench bailen aplea ghova thãi ap-aplo lognacho kaido pallcho.

⁴Bailek aplê khaxa kuddicher odhikar na, to tichea ghovak asa; têch bhaxen, ghovak aplê khaxa kuddicher odhikar na, to tachê bailek asa.

⁵Lognik hok’kacho upêg korunk ekamekak addainakat. Tori prarthonak tumchem mon odik lavchê khatir, tumchêch bhitôr kobul zaun tumchean thoddo vêll kuxin ravum-iet, punn magir novean ektthãi jieunk lagat; na tôr, tumchean tumcheô kuddicheô vondovnneô domaunk zaina zaun, Soitan tumkam tallnnent ghalit.

⁶Oxem sangun hanv tumkam êk kaido ghaltam mhonn somzum nakat; hanv fokot hi sovlôt asum-iet mhonn tumkam ugddas kortam.

⁷Tumi sogllim mhojê bhaxen zal’lim mhaka zai aslem; punn Devan zonn-ekleak kherit vorgunn dila; ekleak êkê torecho vorgunn ani dusreak dusrê torecho.

⁸Atam don utram logna bhair asat tankam ani vidvank: tim mhojê bhaxen ravlim zalear odik borem.

⁹Punn tanchean apleô vondovnneô domaunk zaina zalear, tim logn zaunchim, kiteak kamcharan lason vechê bodlek logn zalear odik borem.

¹⁰Logn zal’leank êk hukum’ ghaltam, ani to mhozo nhoi punn Somiacho: bail aplea ghova thaun veglli sorchi nhoi;

¹¹veglli sorli zalear, tinnem anink ekdam logn zaunchem nhoi, bogor aplea ghova lagim sondhan korchem; ani ghôv aplê bailê thaun vegllo sorcho nhoi.

¹²Herank oxem sangtam: punn hem sangnnem mhojem, Somiachem nhoi. Amchea konn-eka bhavak onbhavarti bail asa ani ti tachea vangdda khuxê-monan jieunk kobul asa zalear, tannem tika soddun diunchi nhoi.

¹³Ani toxench konn-êkê bailek onbhavarti ghôv asa ani to tichea vangdda jieunk kobul asa tôr, tinnem taka soddun diuncho nhoi.

¹⁴Kiteak aplê bailê vorvim onbhavarti ghôv axirvadik zala; ani toxich amchea bhava vorvim tachi onbhavarti bail axirvadik zalea. Oxem nhoi aslem zalear, tumchim bhurgim-ballam axirvadik nhoi zato aslim, punn atam tim axirvadik.

¹⁵Punn onbhavarti logna-vangddi koddsoron vochunk sôdta zalear, taka koddsoron vochum-di; oslê poristhitint to bhav vô ti bhoinn lognant anink bandlelim uronant, kiteak Devan tumkam xantin jieunk apoileant.

¹⁶Agê bailê, tujea ghovak tuje udexim taronn mello-xem zaunchem na mhonn tum koxi zannoi? Ani tum, ghova, tujê udexim tuje bailek taronn mello-xem zaunchem na mhonn tum koso zannoi?

¹⁷Hem aikat: Devan zonn-ekleak apovnnem kelem tedna, Somian zonn-ekleak vanttun dilam tea dennea pormannem tannem cholchem, ani jea bhesar taka Devan apoila teach bhesar tannem ravchem. Soglleam povitr-sobhank hoch nêm’ hanv ditam.

¹⁸Sunôt kel’leak Devachem apovnnem ailam zalear, kel’li sunôt tannem lipounchi nhoi; toxench sunôt korunk nasleleak Devachem apovnnem ailam tôr, tannem sunôt korchi nhoi.

¹⁹Sunôt keli vô na keli, haka moluch na; punn Devacheô adnia pallop, hem ekuch ki molachem.

²⁰Apovnnem ghetlam tedna jea bhesar zonn-eklo aslo, teach bhesar tannem ravchem.

²¹Devan tumkam apovnnem kelam tedna, tumi gulam asleat? Tôr kãi porva na. Svotontr zaunk sondi tumkam mellot zalear porian, tumi asat teach bhesacho zata titlo faido kaddat.

²²Kiteak Somiachem apovnnem ghetlam tedna jim konn gulam aslim, tankam Somian svotontr kelim; toxench Somiachem apovnnem ghetlam tedna jim konn svontontr aslim, tim Kristachim gulam zaleant.

²³Kimôt diun Devan tumkam gulam’ponnantlim soddoileant! Tôr mon’xanchim gulamam zaum nakat.

²⁴Bhavam-bhoinnimnô, jea bhesar zonn-ekleak Devan apovnnem kelam, teach bhesar Deva mukhar tannem vô tinnem ravchem.

²⁵Atam ozun logn zaunk nant tanchi khobor korum-ia: tanchê vixim Somian mhaka kãi hukum’ diunk na, punn, Somiachi doiallai mell’lelean hanv visvas favo aslolo sevôk zaunk pavlam mhonn zanno zaun, mhojem mot sangtam.

²⁶Vaittam-vignanche dis lagim pavleat, dekhun jea bhesar monis asa, teach bhesar to ravlear borem.

²⁷Êkê bailê kodde lognachea bandpasant asai? Tôr tika soddunk sodinaka. Bailechea logna-bandpasant nãi tum? Tôr potinn sodinaka.

²⁸Punn logn zaxi zalear, tuka patok zaina. Toxench ek ankvar cheddum logn zait zalear, taka-i patok zainam. Tori logn zatat tankam hea sonvsari jivitache upodre-koxtt astele, tantlim tumkam hanv vattaunk sôdtam.

²⁹Bhavam-bhoinnimnô, hanv sangunk sôdtam tem itlench: Devan tharail’lea kallachi sompadnni pavli. Dekhun hea fuddem bail asleleamnim logn zaunk naslelê porim;

³⁰dukh kortat tãnnim dukh korinaslelê porim; utsôv kortat tãnnim utsôv korinaslelê porim; viktem ghetat tãnnim apnnam lagim kãich naslelê porim;

³¹hea sonvsaracheô vostu vaportat tãnnim osleanch vostumnim ghuspon naslelê porim jieunchem; kiteak hea sonvsarachem atanchem rup anink chôdd kall togpachem na.

³²Tumi huskeam-vinnem jiel’lim mhaka zai. Logn zaunk naslelea eka dadleak Somiacheam vostuncho husko asa; apunn Somiak koso manovtolo, hachê vixim taka husko.

³³Punn logn zal’lea dadleak hea sonvsaracheam vostuncho husko asa; aplê bailek koso khoxi kortolo, hachê vixim taka husko, ani oxem tachem mon veg-vegllê vatten oddon veta.

³⁴Toxench êkê logn zaunk naslelê bailek vô êkê ankvarik Somiacheam vostuncho husko asa, kiteak ti kuddin ani monan Taka manovleli zaunk vavurta; punn logn zal’lê bailek hea sonvsaracho husko asa: aplea ghovak koxi manovteli, hachê vixim tika husko.

³⁵Hem tumcheach adavak sangtam. Tumkam gorjê bhair bandun dovrunk mhojem mon nhoi; punn tumi mannsugen jieunchê khatir ani sogllea kallzan Somiak tumi somorponn korchê pasot hem sogott tumkam boroilam.

³⁶Konn-ui aplê ankvar hoklê sorim apleô vondovnneo ap-domavnnechê ximê bhair vaddleat mhonn polleta, ani apli chal tichê lagim sarki nhoi mhonn takach disun ieta, ani tiche kodde lognuch zaunchem taka disot zalear, apnnak borem dista tem tannem korchem. Tim logn zaunchim; oxem korun patok aschem na.

³⁷Punn êk novro, konnachench boll nastana, aplea ap-khuxen ghetlelea tharavant thir asa ani aplê ankvar hoklek toxich apli hokol koxi dovrunk sôdta zalear, to-i borem korta.

³⁸Mhonntôch aplê ankvar hoklê lagim logn zata to borem korta; ani logn zaina to odik borem korta.

³⁹Logn zal’li bail, ticho poti jivo asot porian, taka bandleli asta; punn ticho ghôv morot zalear, ti meklli zali ani apnnak zai tea dadlea lagim tichean logn zaum-ieta; to ghôv Somiacher bhavart aslolo mat zauncho.

⁴⁰Ti vidvechea bhesar ravot zalear, ti odik bhagi; hem mhojem mot. Ani mhojê sovem Devacho Atmo asa mhonn hanv zannom.