Read Goan Konkani 1 Kor 8 Bible Online

1 Kor 8 - Goan Konkani bible

1 Kor 8

¹Atam puttleam-murtink bhettoi- l’leam khannanchi gozal korum-ia. Tanchê vixim amam-somestank ginean asa mhonn hanv boro zannom. Oslea gineanan ami fokot gorvan fulon ietanv; punn mogan ki ami khoreponnim vaddon vetanv.

²Apnnak kiteachi pok’ki ollokh asa mhonn konnam-konnank disot; toripunn ozun favo tosli ollokh tankam na.

³Punn konn-konn Devacho môg kortat, tankam Dev ollkhota.

⁴Puttleam-murtink bhettoil’leam khannam vixim khobor kelea zalearui pasun, hea sonvsarant khuincheai puttlea-murtik jiv-vacha na.Kiteim zaum, Dev fokot ekuch asa, anink her dêv nanch mhonn ami zannonv.

⁵Kiteak zorui zaum sorgar zaum sonvsarant “dèv” mhonnlele asat — ani khorench, tosle “dèv” ani “dhoni” khup! —

⁶torui amkam êkuch Dev asa ani To amcho Bap: Tachê thaun sogllem rochun ieta ani ami-i Tachê khatir asanv. Toxench ekloch amcho Somi, Jezu Krist: Tachê thaun sogllem ieta ani ami Tachê vorvim jietanv.

⁷Punn hem ginean soglleank na. Thoddeank osleam puttleam-murtinchi itli sonvoi zalea ki, aiz porian, bhettoil’lem khann khorench eka devak bhettoil’lem zal’lê porim tim ghetat, ani oxem tanchem osokt ontoskornn bhoxttota.

⁸Khorench mhollear, khanna vorvim ami Devak odik manovlelim mon’xam zainanv; tem khann ghenanv zalear, amkam kãi nuksann zaunchem na, ani tem gheun-ui amkam kãi faido na.

⁹Tumkam kitem-i khavpachi sot’tea asa khorem, punn hi tumchi sot’tea osoktank patkacho soêg zaina zaunk chotrai dhôrat.

¹⁰Tumi, ginean aslolim mon’xam, eka puttleam-murtinchea devosthanant jevnnak boslelim astana dusrim konn-konn osokt ontoskor-nnachim tumkam polletat mhonn somzum-ia. puttleam-murtink bhettoi-l’lem khann gheunk tankam-i dhir mellcho na?

¹¹Hea tumchea osokt bhavam vô bhoinnim pasot Krist melo, ani atam, tumchea gineanak lagun, hinch tumchim bhavbhoinn ibadd zaun gelim!

¹²Hê porim, bhavam-bhoinn-incher add patok korun ani tancheam osokt ontoskornnank dhopko diun, Kristacher add tumi patok kortat.

¹³Mhonntôch jevnna-khannak lagun mhozo bhav vô bhoinn patok korunk pavta zalear, hea fuddem mhojea bhava vô bhoinnik khotti dêkh dina zaunk hanv anink mas kednanch khauncho na.