Read Goan Konkani 1 Kor 9 Bible Online

1 Kor 9 - Goan Konkani bible

1 Kor 9

¹Hanv svotontr nhoi? Hanv apostl nhoi? Amchea Somia Jezuk hanvem polleunk na? Somia sovem tumi mhojea vavrachem foll nhoi?

²Dusreank hanv apostl nhoi zain, punn tumkam tori hanv apostl, kiteak hanv apostl mhonn khatri diunk tumich Somia sovem mhozo xik’ko.

³Mhoji ttika kortat tankam ho asa toiar mhozo zobab.

⁴Ami kel’lea vavra pasot amchem udarposonn magun gheunk amkam hôk’k na kitem?

⁵Her apostl ani Somiache bhav ani Kefas porian ap-aplê bhavarti potinnik aplea sangata gheun bhonvtat: toch mhaka hôk’k na? Ani tanchê bhaxen tika mhojea sangata vhorunk hôk’k na mhaka?

⁶Vô fokot Barnabasak ani mhaka amchem udarposonn zoddchê khatir vavr korunk kaido asa?

⁷Soinik aplem pagar apnnakuch farik kortat? Konn tori êk dakancho mollo laita ani tachim follam khainam khõi? Êk hindd posun konn tori tachem dud pienas-tanam ravla mhonn asa?

⁸Fokot mon’xasoimbachê zannvaie-chem ulovop hem mhojem? Somurt-ui tench xikoinam kitem?

⁹Tôr Moizesachê Somurtint oxem boroil’lem asa: “Môllnni kortelea boilachea tonddak muskem ghalum noiê.” Devak boilachench poddon gelam zait?

¹⁰Vô sarkem amchê pasot, Dev oxem uloita mhonn sangchem? Dubhavavinn amchêch khatir hem boroilam, kiteak xet kôstat tãnnim tem bhorvanxean kôschem, ani xet môlltat tãnnim apnnank pikacho vantto melltolo mhonn bhorvanso dhorun tem môllchem.

¹¹Atmik biam tumchê modem ami vomplea uprant, tumchê koddchem sonvsaracheam vostunchem pik ami ghetlem zalear, hem kitem chodd zalem?

¹²Dusreank tumchê voir oslo hôk’k asa zalear, amkam tanchê poros odik vhôdd hôk’k ascho nhoi? Tori astam hea hok’kacho ami upêg korunkuch na; portench zalear, Kristachea Xubvortomanachê porgô-ttnnek koslich addkhôll ghalinam zaunk sogllê torecheô oddchonni ami sõsun ghetanv.

¹³Devmondirant seva kortat te Devmondirantlench aplem jevonn-khann ghetat ani vedichi seva kortat te vedicher bhettoil’leam danancho vantto apnnank ghetat mhonn nokllot tumi?

¹⁴toxench, jim konn xubhvhortoman porgôtt’tat, tãnnim xubhvortoma-nachêch porgôttnnentlean aplem udarposonn gheunchem, oxi Somian adnea ghalea.

¹⁵Toripunn osleam hok’kantlea eka hok’kacho porian hanvem upêg korunk na; ani atam-i zalear, heam hok’kancho upêg korunk sôdtam mhonn hanv hem boroinam; oxem korchê poros hanv morunk toiar...

¹⁶Xubhvhortoman porgôttchem kam’ mhonn’lear mhaka vhoddvikechem karonn nhoi; tem Devan mhaka dil’li êk hukum; tem hanv porgott korinam zalear, mhaka zok’ mar!

¹⁷Mhojê ap-khuxen hem kam’ kel’lem zalear, mhaka mozuri mell’li. Punn, mhojê ap-khuxen hem kam’ nhoi zalear pasun, Devan mhojê adhin kel’lo karbhar hanv mandun ghetam, oxem zalem.

¹⁸Tôr mhoji mozuri kitem? Itlench: Xubhvhortoman mhaka dita te hok’k soddun, hanv tem funkott porgôtt’tam, hantunch asa mhoji mozuri.

¹⁹Soglleam mon’xam sorim hanv svadhin zaun-ui, zata titleank jikun gheunchê khatir hanv soglleancho gulam’ zalam.

²⁰Judevank jikun gheunchê khatir, Judevam sorim hanv Judêv koso vaglom; Somurtichê adhin asleleank jikun gheunchê khatir, zorui hanv Somurtichea adhinponnant na, torui Somurtichê adhin aslelê porim hanv vaglom;

²¹toxench, Somurt nasleleank jikun gheunchê khatir hanv Somurt naslelê porim vaglom — tori hanv Devachê Somurti bhair aslolo monis mhonn mhaka dhorum nakat, sarkem sangun hanv Kristachê Somurtichea adhinponnant asam.

²²Osoktank jikun gheunchê khatir osoktam modem hanv-ui osôkt zalom; thoddeank punn koxê-i bhaxen taronn mellun gheunk torê-torechea loka pasot hanv tanchê modloch eklo zalom.

²³Xubhvhortoman haddta tea axirvadant mhaka vantto mellchê khatir, xubhvhortoman vistarchê pasot hem sogllem hanv kortam.

²⁴Ronga-moidanar dhanvpi sogllech dhanvtat punn ekleakuch inam’ mellta mhonn nokllot tumi? Tôr inam’ jikun gheunchê axen nettan dhanvat.

²⁵Dôr-êk pelvan soglleam vostuncho teag korta; te zalear êk vinaxi mukutt zoddunk oxem kortat, punn amkam melltolo to êk ovinaxi mukutt.

²⁶Hanv dhanvtam to dolleam mukhar hetu dovrinastanam dhanvona; ani khusti khelltam to varear mutti marun khellona.

²⁷Dusreank xubhvhortoman porgôttlea uprant hanvuch Devachi xikxa poddlolo zaina zaunk, mhoji kudd donddvonnun, gulama vori tika hanv domavun dhôrtam.