Read Goan Konkani 2 Kor 1 Bible Online

2 Kor 1 - Goan Konkani bible

2 Kor 1

¹Paulu, Devachê khuxen Jezu Kristacho apostl, ani amcho bhav Timot Korintant aslolê Devachê povitr-sobhek ani sogllê Akaient asleleam somest bhoktank hem potr boroitat.

²Deva amchea Bapachi ani Somia Jezu Kristachi doiallai ani xanti tumkam favo zaum.

³Dev, amchea Somia Jezu Kristacho Bap, sodanch doiall Bapui ani soglleam amcheam gorzamnim amkam dhir-divpi: tôr Taka vakhannum-ia.

⁴Soglleam amcheam koxttam-dukhimnim To amkam dhir dita; hê porim ami-i, Deva koddlo amkam ieta to dhir gheun, sogllê torecheam trasank sampoddleleank dhir diunk xoktanv.

⁵Zoxem Bap amkam Kristachea koxttamnim bhorpur vantto dita, toxench To amkam Krista udexim bhorpur dhir-ui dita.

⁶Ami attevitte kaddtanv? Tôr te tumkam dhir ani soddvonn mellchê pasot. Amkam dhir mellta? Tôr ho-i tumkam dhir mellchê khatir. Oxem ami bhôgtanv tech koxtt-dogd tumi-i thirponnan bhogunk pavtelet.

⁷Tumchê vixim amcho bhorvanso thir, kiteak koxttam-dogdamnim amchim bhagidaram zaun, dhirant-ui tumi amchim bhagidaram zatelet mhonn ami zannonv.

⁸Bhavam-bhoinnimnô, Aziechea prantant kede ami upodre-koxtt bhôgleat, tem tumi zanno zal’lim mhaka zai: kitlo zôdd bhar amcher poddlo! To amchean sõsum nozo titlo! Team upodream-koxttantle ami jive utortelenv mhonn amkam bhorvansoch naslo.

⁹Khorench, mornnachem formonn amcher poddlem-xem amkam dislem; ami koxêch bhaxen amcher patiena zaunk hem oxem ghòddlem: fokot Devacher ascho sogllo amcho visvas, kiteak mel’leank porian jivont korunk Taka tank asa.

¹⁰Mornnachea iedea vhodda sonkottantle Tannem amkam nivarle, ani hea fuddem-i To amkam nivartolo mhonn amcho bhorvanso.

¹¹Tumcheam-i magnneancho amkam adar mellum; oxem zaiteam zannancheam magnneamnim Devan amkam kela tea upkara khatir zaitim zannam amchea nanvan Taka dhin’vastelim.

¹²Soglleam kodde, punn bhov-korun tumchê kodde vagtana, amchi chal sodanch, Devak zai toxi, promannik-ponnachi ani sadeponnachi zali; hantum mon’xachê zannvaiecher patieun nhoi, punn Devan funkea dil’lea denneachê podvecher patieun ami chol’leanv. Hachê pasot amkam obhiman bhògta ani hem tumkam khatren sangtanv.

¹³Amchea borovpant tumkam spoxtt vachunk zaina ani sarkem somzunk mellona toslem kãich ami tumkam boroinanv. Tumi tem samkem somzotelim mhonn mhaka visvas asa.

¹⁴Zoxem tumi ozun porian amchi chal ili-ili somzunk pavleant, toxench tumi ti sarkich somzunk pavtelet mhonn bhorvanso ballgitam; oxem, amchea Somia Jezucho Dis ietolo tedna, zoso tumchê khatir amkam obhiman bhògta, tosoch amchê khatir tumkam-i obhiman bhògtolo.

¹⁵Hea soglleachi khatri mhaka asli dekhun, hanv poilim tumchê-xim vochunk ani oxi tumkam dupêtt khuxalkai diunk sôdtalom.

¹⁶Mhonngê, mhoji ievzônn oxi asli: tumchea ganvantlean Maxedoniek vochunk ani Maxedoniê thaun portun ietana novean tumchê-xim ieunk; magir, vattek goroz to adar tumchê koddlo gheun, Judeiak vochunk ievjitalom.

¹⁷Oxi mhoji ievzônn asli mhonntôch, hanvem ti voilea-voir bodôl’lea mhonn dista tumkam? Vô mhojea mon’xasoimbak avoddta tem polleun, mhojeô ievzonnô kortam ani mhojea monant borabôr “Hôi, hôi” ani “Na, na” asa mhonn somzotat tumi?

¹⁸Zoso Dev dil’lem utor visvaxiponnan pallta, toxem amchem utor tumkam borabôr “Hôi” ani “Na”, oxem zaunk na.

¹⁹Hanvem, Silvanan ani Timotan tumkam porgôttla to Devacho Put, Jezu Krista, borabôr “HÔI” ani “NA” oso kednanch zalo na; To sodanch “HÔI”.

²⁰Kiteak Devan keleat titleô-i bhasavnneô Tachê sovem “HÔI” zaleat, ani heach pasot Tachê vorvim Devak mhoima diunchê khatir ami “AMEN” mhonntanv.

²¹Khud’ Devan amkam ani tumkam borabôr Jezu Krista sovem ghott rigoun dovorleant; Devanuch amkam Aplê sevek makhleat,

²²ani ami sogllim Tachim mhonnun amcher Tannem Aplo xik’ko marla, ani Apnnem amkam dovorlelem asa tea soglleacho isaro zal’lê porim Tannem amcheam kallzamnim Atmo ghala.

²³Mhojea jivachean sangtam, hanv novean Korintak vochunk na zalear, hachem karonn ekuch: tumkam anink dukh dina zaunk; hacho govai Dev.

²⁴Khorench, tumchem bhavartachem jivit zobordosten cholounk amchem mon nhoi, tumcho sontôs vaddounchea monan tumchê borabôr vavrunk amchi khuxi; kiteak tumchem bhavartachem jivit thir.