Read Goan Konkani 2 Kor 10 Bible Online

2 Kor 10 - Goan Konkani bible

2 Kor 10

¹Hanvuch, Paulu, Kristachê linttuvaien ani dulobaien tumchê lagim prarthun magtam. Tumchê modem astana nômr-khalto, ani pois astam tedna, khor to, hanv to Paulu.

²Hanv tumchê lagim prarthun magtam: tumchê modem pavtam tedna khoraien mhoji povdvi dakhounk soêg dium nakat! Hanv sonvsari nemam pormannem vagtam-choltam mhonn sangun jim konn mhojer arôp ghaltat, tanchê thãi hanv khôr zaunk zannom.

³Ami sonvsarant jietanv khorem, punn sonvsari hatiaram gheun amchem zhuz ami choloinanv.

⁴Amchim zhuzachim hatiaram sonvsari hatiaram nhoi; Devachê podvechim hatiaram tim, ani kottam moddun uddounk tankam boll asa. Ami môddtanv tim fottkiream torkam-chintnanchim kottam:

⁵mhonngê Devachê khorê ollkhi virudh urmottaien uprastat te soglle fottkire vad-vivad ami moddun uddoitanv, ani mon’xamnim aplem sonvsari mon soddun Kristachem mon dhorunk ami vavurtanv.

⁶Tumi amkam sarkinch khaltim zaleant mhonn dakhoilea uprant, khaltim zaunk kobul nant tankam xikxa lavunk ami toiar asanv.

⁷Tumi voilea-voiruch polleun mon’xachem mol kortat. Konn-ui apunn Kristachea odhikaran ulovpi, Tache sevok mhonn chint’tat? Tôr hanv-ui tanchê-itlo Kristachea odhikaran ulovpi, Tacho sevôk mhonn tãnnim chintchem ani ollkhun gheunchem.

⁸Somian mhaka dila to odhikar tumkam voir kaddun ghott korchê khatir, tumkam moddun uddounchê khatir nhoi. Ho odhikar mhaka dil’lo asa mhonn hanvem ghoddiê mhoji vhoddvik chôdd sanglea zalear-ui, mhaka koslich loz bhògonam.

⁹Fokot potram boroun mhojean tumkam bhenkddaunk zata mhonn somzonakat.

¹⁰Konn-konn oxem mhonnta: “Tachim potram khor ani bollixtt; punn taka khaxa pollexi zalear, tachê kuddik sokot na, tachea ulovpak-ui boll na.”

¹¹Team mon’xamnim hem somzun gheunchem: hanv pois astanam mhojeam potram vorvim zoso hanv tankam distam, hanv khaxa tumchê modem ietolom tedna, mhojeam kornneam vorvim hanv tosoch mhonn dakhoitolom.

¹²Apnnachich vhoddvik sangtat tanchea panvddear ami asanv mhonn dakhounk vô tanchê kodde amkam sôr korunk ami fuddem soronanv. Kosle mhonn pixe te! Apunnuch zokh tharaitat ani tea pormannem ap-aplem zokh ghetat, ani tench zokh dhorun apnnan-kuch ekameka kodde sôr kortat!

¹³Ami zalear favo tea mapa bhair amchich vhoddvik korche nanv, punn Devan amkam tharaun dileat team ximam bhitôruch ami ravteleanv, ani heam ximam bhitôr ravunuch tumchê-xim ami pavtanv.

¹⁴Ami poilinch thaun tumchê-xim ieunk nasleanv zalear, atam tumchê-xim vochun amcheam ximam bhair pavteleanv asleanv; khorem mhonn’lear, Kristachi bori khobor gheun tumchê-xim pavleat te amich mhonn ugddas dhôrat.

¹⁵Mhonntôch ami amcheam ximam bhair kel’lea vavrachi vhoddvik sanginanv, kiteak mhollear dusreanchea vavracheam ximam bhitôr ami pãi dovrunk na. Sodanch Devan amkam tharaun dil’leam ximam bhitôr amcho vavr. Tumcho bhavart vaddon vetolo ani oso tumchêch modem amcho vavr odik-odik follabhorit zatolo mhonn amcho bhorvanso.

¹⁶Oxem zalem tôr, uprant tumchea pranta pelean vochunk ani thõi xubhvhortoman porgottunk amchea monant asa; punn Devan tharaun dil’leam ximam bhitôr konnem dusrean kel’lea vavrachi vhoddvik amkam na.

¹⁷Jim konn vhoddvik sangunk sôdtat, tãnnim Sorvesporan kel’lea kamachi vhoddvik sangchi.

¹⁸Jim konn apnnankuch voir kaddtat, tim Devak manovnant; punn jim konn Devak manovtat, tankam Dev voir kaddta.