Read Goan Konkani 2 Kor 12 Bible Online

2 Kor 12 - Goan Konkani bible

2 Kor 12

¹Vhoddvik sangun kosloch faido na; tori hanv sangit ravtolom kiteak sangchi goroz asa, ani Somian mhaka favo kel’leam kãi dorxonanchi ani prokasnnianchi khobor kortolom.

²Kristachea ekvottant aslelea eka mon’xak hanv ollkhotam. Chovda vorsam adim taka sorgar khud Deva mukhar ubarun vhelo: hi ubarnni mhojê kuddi soit zali vô mhojê kuddi bhair zali tem hanv nokllom — Devuch zanno.

³Hea mon’xak Voikunttant ubarun vhelo mhonn hanv zannom: hem-i mhaka kuddi soit vô kuddi bhair ghòddlem zalear hanv nokllom — Devuch zanno. Thõi mon’xacheam utramnim ucharunk zainant ani zanchi gozal korunk mon’xank favona tosleô gupit vostu tannem aikoleô.

⁵Hea mon’xak favo kel’lea onnbhova vixim vhoddvik sangunk hanv toiar asam; punn mhojêch vixim zalear, fokot hanv kitlo osôkt mhonn dakhoun ditat team vostum vixim vhoddvik sangtolom.

⁶Oxem korun, vhoddvik sangunk sodin zalear, hanv piso zauncho na kiteak sot tench sangtolom. Tori oxem hanv korcho na; kiteak mhonn’lear mhaka polleun ani mhojem aikun mhojem mol korunk zata titlench puro; hachê poros, mhojeam oprub prokasnneank lagun, mhojem odik unch mol konnench kel’lem mhaka naka.

⁷Teanch mhojeam ut’tom’ prokasnneam pasot, hanv gorvan fulonam zaunk, mhojea angant Devan romblolo êk kantto asa: to mhaka sotaunk dhaddlolo Soitanacho êk dut; haka lagun hanv gorvan fulonk xokonam.

⁸Hea vixim, hea sonnso-nnantlo mhaka nivar mhonn tin pavtti prarthon korun hanvem Somia lagim maglem,

⁹punn Somian mhaka oxem sanglem: “Mhoji mozôt puro tuka, kiteak osoktaient Mhojem boll sopurnnaien porzollta.” Dekhun, Kristachem boll mhojê sovem voschê khatir, bhov vhoddê khuxen mhojeam osoktaianchi hanv vhoddvik kortolom.

¹⁰Mhonntôch hanv osôkt mhonn, mhaka beman kelo mhonn, veg-veglleam gorzank sampoddlom mhonn, dhumallo bhôglo vô torê-torecheam oddchonnimnim cheplom mhonn, porvach na: Krista pasot hê sogllê gotint hanv murgott’tam, kiteak jitlo hanv osôkt titlo hanv Kristachê xoktin soktivont.

¹¹Atam hanv khorench piso zalam, punn tuminch mhaka piso kela. Tumi ki mhozo man rakhunk zai aslo; hanv kãich nhoi zalear-ui, tori team tumcheam xrextt apostlam poros hanv kãich unno nhoi.

¹²Tumchê modem sogllê sosnnikaien hanv vavurtalom tedna, hanv khoro apostl mhonn khatri diunk mhojê udexim Devan zaiteô khunna, ojapam ani vismitam korun dakhoilim.

¹³Heram povitr-sobham poros koxê bhaxen hanvem tumkam kitem-i unnem kelam? Ek mat khorem, mhojea udarposonnacho bhar hanvem tumcher ghalunk na. Hi mhoji onit tumi mhaka bhôgsat!

¹⁴Polleiat, tisrê pavtti hanv tumkam bhett diunk toiar asam, ani mhojea udarposonnacho bhar atam-i tumcher ghalcho na: kiteak tumcheô vostu mhaka nakat; tumi zai mhaka! Avoibapai pasot poixe zomoun dovrunk putam-dhuvancho kaido nhoi; portench zalear, apleam bhurgeam pasot poixe zomoun dovrunk avoibapaicho kaido.

¹⁵Tumchê khatir mhojê kodde asa titlem-i khorchunk, mhozo jiv porian khorchunk, hanv bhov khuxi. Hanv tumcho itlo odik môg kortam dekhun, tumi mhozo unno môg korcho?

¹⁶Borem tôr: hanvem tumcher mhozo bhar ghalunk na khorem, punn, naddbudhicho zaun, mhojê naddbudhin tumkam hanvem mhojea chopkeant dhôrlim.

¹⁷Tumchê-xim hanvem pattoileat team mon’xam modlea eklea vorvim tori hanvem tumcho faido kaddla zait?

¹⁸Tumchê-xim voch mhonn hanvem Tita kodde maglem ani tachea vangdda anink eklea bhavak hanvem dhaddlo. Titan tumcho koslo tori faido kaddlo zait? To ani hanv ekach monan vagunk nant kai? Ami êkêch toren cholunk nant zait?

¹⁹Tumchê mukhar ho sogllo vêll amchem nanv rakhunk ami sôdlam mhonn chintinakat. Na. Ami sanglam titlem Kristachea ekvottant ani Deva hujir sanglam; ami sogllem kortanv tem, priticheamnô, tumchea Kristi jivitant ghott korunk, ami kortanv.

²⁰Tori, tumchê-xim pavtam tedna, mhaka tumi mellunk zai aslim toxim mellona zaxeat mhonn ani hanv tumkam mellunk zai aslom toso mellona zain mhonn, mhaka husko asa: tumchê modem zhogddim, nattkai, rag, svart, boglanttam, chaddiô, gorv ani gondholl-gollboll astit mhonn mhaka husko.

²¹Tumchê modem novean pavtolom tedna, adim ghòddlam tench ghoddot mhonn mhaka bhirant dista: mhozo Dev mhaka tumchê mukhar lojek ghalit. Adim patkamnim jietalim team zaiteam zannam pasot mhaka khub dukam gollounk poddot mhonn mhaka bhirant dista, kiteak mhonn’lear tãnnim ozun aplem pozoddponnachem, kamchari ani soddeponnachem jivit soddun diunk na.