Read Goan Konkani 2 Kor 13 Bible Online

2 Kor 13 - Goan Konkani bible

2 Kor 13

¹Atam tisrê pavtti tumchê-xim hanv ieuncho asam. Koslem-i garannem ruzu korchê khatir dogam vô tegam sakxidaranchê govaikechi goroz.

²Tumchê modem dusrê pavtti ail’lom tedna hanvem sanglelem toxench, atam-i, tumchê modem nastana, adim pap kelam tankam ani heram soglleank sangtam; hanv porto ien zalear, hanv konnakuch xikxa lainastana ravcho na.

³Krist mhojê sovem uloita mhonn khatri zai tumkam? Tumchêch sovem To osôkt nhoi, punn tumchê modem To soktivont.

⁴Kiteak Taka khursar marlo tedna To osôkt aslo khorem, punn atam Devachi xokti gheun To jivo asa. Tachea ekvottant asun Tachi osoktai ami-i bhôgtanv khorem, punn Tacheach ekvottant ami jive astelelenv ani tumchea boreak Devachi xokti dokhôl kortelenv.

⁵Tumi tumchea bhavarta pormannem jietat zalear polleunk tumchich tumi chovkoxi korat. Tumchich tumi porikxa korun gheiat. Tumchê sovem Jezu Krist asa mhonn nokllot tumi? Na tôr, tumcho bhavart sarko nhoi mhonn porikxen-tlean gomon ieta.

⁶Punn amcho bhavart zalear sarko asa mhonn tumkam khatri mell’lea asteli mhonn hanv patietam.

⁷Ami khatreche mhonn gomun ailam ki na, hachi hanv porva korina. Tumi mat borem tem korchem mhonn Deva lagim ami magtanv. Ami khatreche mhonn disun ieunchem, ho mhozo husko nhoi; punn tumi sarkem asa tem korchem, ho êkuch mhozo husko.

⁸Sotacher add vochunk amkam koslich xokti na; fokot sota khatir amkam xokti dil’li asa.

⁹Ami osokt zalear zaum-di, punn tumi mat soktivont zaxeat zalear ami khuxal. Tumi sudharot vechim mhonn Deva lagim ami magtanv.

¹⁰Dekhun ozun pois astana hem hanv tumkam boroitam: hê porim tumchê-xim ietolom tedna, Somian mhaka dil’lea odhikaran khoraien tumkam vagounchi mhaka goroz poddchi na; kiteak moddun uddounk nhoi punn bandun haddunk mhaka ho odhikar dil’lo asa.

¹¹Atam, bhavam-bhoinnimnô, amcho adês tumkam;/mog asum-di; odik-odik sudharonk vavrat; mhojea uleak kan diat, eka monachim zaunk vavrat ani tumchê modem xantin jieiat ani mogacho ani xanticho Dev tumchê sovem astolo.

¹²Khorim bhavbhoinn koxim ekamekak ixttagotichi khunna diat. Amcheam bhavam-bhoinnincho nomoskar tumkam.

¹³Amchea Somia Jezu Kristachi doiallai, Devacho môg ani Povitr Atmeacho ekchar tumam-somestam sovem asum.