Read Goan Konkani 2 Kor 2 Bible Online

2 Kor 2 - Goan Konkani bible

2 Kor 2

¹Tumkam dukh diunchi nhoi mhonn tumkam novean bhett dinam zaunk hanvem tharav ghetlo.

²Tumkam hanvem khônt dili tôr, mhaka khuxal korunk anink konn asa? Tumich nhoi tim, hanvem khontibhorit keleant tim?

³Tumich tim mhaka sontosbhorit kortat tim dekhun, tea vellar tumkam bhett diun mhakach hanv fokot khônt haddto aslom; mhonnun hanvem tumkam tem potr boroun dhaddlem. Jedna hanv sontosbhorit asam, tedna tumkam-i sontôs zata mhonn mhaka khatri asa.

⁴Tumkam khontibhorit korunk mhonn nhoi, punn tumam-soglleancho kitlo hanv môg kortam tem tumi zanno zaunche khatir, khontint ani dukhint buddlolea kallzan ani dukam golloun hanvem tumkam tem potr boroilem

⁵Konnem zôr khônt dilea, ti tannem mhaka diunk na, punn êkê bhaxen — vhoddlem korun sangina zaunk — ti tumam-soglleankuch dilea.

⁶Tumchê sobhen tea mon’xak khast lailea ti puro.

⁷Tumi taka bhôgsuncho ani taka dhir diuncho, na zalear aplê vhôdd khontint to buddon vochot.

⁸Tumi tachi opurbai korun dakhoiat mhonn hanv tumkam ulo kortam.

⁹Tumchi porikxa korunk ani kitlê khaltikaien tumi adnia palltat tem polleunk hanvem tem potr boroilem.

¹⁰Tumi konnak bhôgxitat tedna, hanv-ui taka bhôgxitam. Ani hanvem kitem bhogxilem tem, — hanvem-i bhôgsunchi goroz asli zalear — hanvem Krista hujir bhogxilam.

¹¹Oxem Soitan amcher zoit vhorunk pavcho na. Tacheô naddbudhi ami borim zannonv.

¹²Kristachem xubhvhortoman porgottunk Troas ganvant hanv pavlom tedna, Somian mhaka ek dar ugddun dilem.

¹³Punn Tit mhozo bhav mhaka thõi mellunk na dekhun, mhaka thar na zalo. Tea pasot tea lokacho nirôp gheun hanvem Maxedoniechi vatt dhôrli.

¹⁴Punn Devak dhin’vastam, kiteak To amkam Kristachea ekvottant dovrun sodam Tachea zoitachea porivarant vantto dita ani amchê udexim Kristachê ollkhicho domdom’ soglleak ximpddaita:

¹⁵khorench mhonn’lear, ami Deva mukhar choddta toslo Kristacho domdomit pormôll: soddvonn ghetat tanchê modem, toxench ibadd zaunchê vatter asat tanchê modem.

¹⁶Heam nimanneank mornnak pavoita toslem mornnadik ghann-ordd’dann, ani poileank jivan bhorit veta toslo domdomit sugondh. Oslea kamak khand marunk konn purto zait?

¹⁷Ami zalear, Devachea utracho dhondo kortat tosle veapari ami nhoi; osle veapari khub. Punn ami Deva hujir, khud Devan pattoil’le porgôttnnar mhonnun, sadea monan Krista sovem utor porgôtt’tanv.