Read Goan Konkani 2 Kor 3 Bible Online

2 Kor 3 - Goan Konkani bible

2 Kor 3

¹Ami novean amchich vhoddvik sangunk sôdtanv kai? Kãi zannank goroz asa toxi, tumkam dakhounk vô tumchê koddli gheun dusreank dakhounk visvas-potrachi amkam goroz asa mhonn dista tumkam?

²Tumich amchem visvas-potr; tem amcheam kallzamnim boroil’lem asa ani soglleank tem vachunk ani somzunk mellta.

³Dubhava vinnem Kristachem potr tumi, amcheam hatamnim boroun kaddlelem: xaien nhoi, punn jivea Devachea Atmean; fatracheam folliancher kantoil’lem nhoi, punn masacheam kallzacheam folliancher boroil’lem.

⁴Deva mukhar Krista udexim Ho visvas amkam asa:

⁵amchêch osttongim ami kitem-i kelam mhonn sangunk ami xokonanv, punn amchi xokti Deva koddsun ieta.

⁶Tannench amkam novea korarache iukt sevok keleat. Ho Korar boroil’leam kaideam vixim nhoi, punn Atmea vixim; kiteak mhonn’lear boroil’le kaide jiv kaddtat, punn Atmo jiv dita.

⁷Somurt okxoramnim fatracheam folliancher kantoil’li; ani Devan ti Moizesak dili tedna, Devachi mhoima fankli. Moizesachem mukhamoll tê mhoimechea porzollan fankunk laglem, punn ho porzôll palovon vetalo; ani tori Moizesachea mukhamollacher to itlo loklokit aslo, ki Israelacheô put-dhuvô tacher apli nodor lavun dovrunk xokonasleô. Mon’xank moronn haddta ti Somurt itlê mhoimen denvun aili zalear,

⁸Atmeacho Korar sthapon ailo tedna, kitlê odik vhôdd mhoimen to fankunk favona?

⁹Amkam khastichem formonn haddta ti seva mhoimevont zali tôr, amkam Devak manovlelim mon’xam korta ti seva kitli odik mhoimevont zaunk favonam?

¹⁰Khorench, atanchê ut’tôm’ mhoimek sôr kelear, adli mhoima kãich nhoi asli mhonn amchean mhonnunk zata.

¹¹Kiteak palovon vechem aslem tem mhoimen fanklem zalear, togta tem kitlê odik mhoimen fankunk favona zait?

¹²Amkam oslo bhorvanso asa dekhun, ami kalljidarponnan uloitanv.

¹³Aplea mukhamolla velo porzôll palovon vetana, Israelacheam putam-dhuvamnim polleuna zaunche khatir, aplem mukhamoll eka podd’dean dhampto, Moizesa bhaxen ami nhoi.

¹⁴Punn tanchea gineanacher kallôk poddlolo; khorem mhonn’lear, az porian, Adlo Korar vachtat tedna, toch podd’do thõich asa; kiteak konn-ui Kristak ekvott’ta tedna mat, to podd’do koddsoron veta.

¹⁵Ozun porian Moizesachi Somurt vachtat tedna, tanchim monam eka podd’dean dhamplelim asat.

¹⁶punn vollon Somia-xim tim ietelim tedna mat, to podd’do koddsoron vetolo.

¹⁷Tôr Somi mhonn’lear Atmo, ani zõi Somiacho Atmo asa thõi svotontrtrai asa.

¹⁸Oxem tôr, amchea mukhamolla voilo podd’do kaddun, eka arxea porim Somiachê mhoimechim kirnnam ami portim fankoitanv; oxem ami sogllim bodlon, Zacho porzôll ami portun fankoitanv, Tachê sarkim ami odik-odik zait vetanv, Tachi mhoima odik-odik amchea jivant fankta. Hem kam’ sogllem Somiachem, ani hoch to Atmo.