Read Goan Konkani 2 Kor 6 Bible Online

2 Kor 6 - Goan Konkani bible

2 Kor 6

¹Ami Devache sohokari mhonn tumkam oso ulo kortanv: tumi ghetlea ti Devachi doiallai nirfôll zaunk dium nakat.

²Kiteak Dev oxem sangta; “Xubh vellar Hanvem tuzo ulo aikolo, ani taronnachea disa Hanvem tuka adar dilo.” Polleiat: hoch to xubh vêll; taronnacho dis to hoch!

³Amchea muniarponnant koslich chuk mellona zaunk, konnachêch sudharnnechê vatter ami koslich addkhôll ghalinanv.

⁴Portench zalear, soglleam vattamnim ami Devache sevok mhonn dakhoitanv: koxtt-dukhi, oddchonni ani hal-upodre ami bhôgle;

⁵ami mar ghetlo, amkam bondkhonnint uddoile, amcher bonddai keli; koxtti vavr amim kelo, amkam nhid porian na zali ani upas-tapas ami kaddcho poddlo; hea sogttant ami thir ravleanv.

⁶Chuki virêt amchi vagnnuk; zannvaiechi amchi xikovnn; sosnnikaiechi ani bhole-ponnachi amchi chal; Povitr Atmeache bhorpur gunn amkam; amcho pritimôg ddhông-naslolo;

⁷sotacho amcho nirôp; amkam asa ti ghottai Devachich; dusmana virudh zhuztana ani amchi rakhônn kortana, amcheam hatamnim fokot Devak man’ta toslea jivitachim hatiaram;

⁸dôr disachea amchea jivitant amkam melltat man ani beman, konn-konn amchi ninda kortat ani konn-konn amkam vakhanntat; ami sot tem porgôtt’tanv, tori amkam fotting koxe lêkhtat;

⁹sogllo lôk amkam ollkhota, tori ami konn nhoi aslelê porim amkam dhôrtat; ami morpachech, tori he polle ami jivech asanv; amkam boroch mar ghala, tori amcho jiv kaddunk pavunk nant;

¹⁰khonti-dukhint buddlele astam, ami sodanch sontoxi; ami khorench gorib, tori dusrê vatten ami puskoll zannank girest korit asanv; jogant amkam kãich na khorem, tori sogllo sonvsar amcho.

¹¹Korintkaramnô, tumchê kodde ami ugteponnim uloileanv, amchem kalliz tumkam sarkench ugtem kelam.

¹²Môg unno zala zalear, to amchê vatten nhoi, to tumchêch vatten unno zala zait.

¹³Tumi mhojim bhurgim zal’lê porim oxem tumkam sangtam: môg mogan farik korunk, tumchim-i kallzam mhaka sarkim ugtim korat.

¹⁴Onbhavarteam kodde favo nhoi toslo sombond zoddum nakat. Promannikponn ani khotteponn koxim mhonn vangddi zaunk xoktat? Uzvadd ani kallôk hanchê modem koslem bhagidarponn asum-iet?

¹⁵Krist ani Soitan, hanchê modem kedna tori koblat asum-iet? Bhavart asloleam ani bhavart nasloleam modem koslem bhagidarponn ghoddunk zata?

¹⁶Devachea mondira ani murtim-puttleam modem koxêch bhaxen ekmot asum nozo, kiteak ami khoreponnim jivea Devachem mondir. Tôr Devan oxem mhonn’lam: “Tanchê modem Mhojem tthikann kortolom ani tanchê modem jietolom; Hanv zatolom tancho Dev ani tim zatolim Mhoji porza.”

¹⁷“Tea pasot, mhonnta Sorvespor, tanchê modlim bhair sorat ani mekllim ravat; koslêch mhellê vostuk hat lavum nakat, tedna Hanv tumkam vengent ghetolom.

¹⁸Hanv tumcho Bapui zatolom, ani tumi zatelet Mhoje put ani Mhojeô dhuvô. Oxem mhonnta Sorvpodvedar Sorvespor.”