Read Goan Konkani 2 Kor 8 Bible Online

2 Kor 8 - Goan Konkani bible

2 Kor 8

¹Atam, bhavam-bhoinnimnô, Maxedoniecheam povitr-sobhank Devan doiallai dakhoili tichi khobor tumkam sangtam.

²Bhov vhoddam koxttam-dogdamnim tanchi porikxa zali. Tim ekdom’ gorib zal’lim, tori tim sodanch khuxal aslim. Oslê poristhitint bhoron òt’ta toslem udarponn tãnnim dakhoilem.

³Kiteak aplê kuveti pormannem ani kuveti voir porian, amcheam bhavam-bhoinnink mozôt korpachê sevent apnnank-ui vantto di mhonn teô sobha ap-khuxen amchê kodde prarthun magtaleô: hachi hanv govai ditam.

⁵Itleak ami ravonasleanv. Kiteak mhollear, Somiak tãnnim aplem jivit somorpilem, ani atam, hi Devachi khuxi mhonn somzun, amkam-i tem somorpun dilem.

⁶Mhonntôch, zoxem Titan hem udar kallzachem kam’ tumchê modem suru kel’lem, toxench tannem tem sompounchem mhonn ami tachekodde maglem.

⁷Tôr, zoxim tumi soglleant poilim—mhonngê bhavartant, ulovpachê huxarkaient, zannvaient, sogllê zotnaient ani amkam dakhoil’lea tumchea pritimogant — toxinch hea-i udar kallzachea kamant poilim zaiat.

⁸Tumkam ek hukum’ ghalunk hanv hem sanginam; punn, heranchem udarponn tumkam dakhoun, tumcho pritimôg kosak lavun kitlo khoro to polleunk sôdtam.

⁹Jezu Kristan, amchea Somian, kitlea udar kallzan amcho môg kelo, ti tumkam bori khobor asa: To girest aslo, punn amchê modem ietana amchê pasot gorib zaun ailo; oxem hea Tachea goribponna vorvim tumi deivik denneamnim girest zaunchim mhonn Tannem oxem kelem.

¹⁰Hê babtint hanv tumkam mhoji budh ditam; ti tumkam khorench boreak poddteli. Kiteak gel’lea vorsa hea kamak tumi hat ghal’lo, khorem mhonn’lear tem tuminch ievzun kaddlelem;

¹¹tôr atam tem fuddem vhorun sompoiat. Hê porim, zoxem hea kamak hat ghalunk tumi umêd dakhoil’li, toxench, tumchê kuveti pormannem mozôt korun, tem kam’ sompounk-ui umêd dakhoiat.

¹²Khuxê-monan kitem-i diunk umêd-hurba asa zalear, mon’xa kodde asa tem Dev manun gheta; mon’xa kodde na tem Dev magina.

¹³Dusreancho bhar hollu korun tumich oddchonninchea bhara khal chepon urchim mhonn mhojea monant na, punn sangunk sôdtam tem hem: vanttpant soglleank sarkem mellchem.

¹⁴Tumkam atam chodd asa tantlem kaddun tancheam gorzank tumi pavat, ani êk dis tankam chodd astelem tantlem kaddun tim tumcheam gorzank pavtelim: oxem vanttop sarkem zatelem.

¹⁵Tôr Povitr Pustokar oxem boroil’lem asa: “Zankam chodd mell’lam, tankam kãi ogllem urunk na; ani zankam thoddem mell’lam, tankam kãi unnem zaunk na.”

¹⁶Tumche sovem mhaka aslem tench chintop Titachea kallzant Devan upzoilem mhonn hanv Taka dhin’vastam.

¹⁷Nhoich amchea uleak tannem umedin kan dilo, punn to apunnuch sogllê hurben bhoron ap-khuxen tumchê-xim vochunk vattek laglo.

¹⁸Tachea sangata ami eka bhavak dhaddla: xubhvhortoman porgott korchea kamant tachi kirti soglleam povitr-sobhamnim gazta.

¹⁹Itlench nhoi; ganvam-ganvamnim bhonvtanam, amchê borabôr vochunk ani hea mogachea kamant amkam adar diunk povitr-sobhamnim taka vinchun kaddla; Somiak mhoima diunchê khatir ani gorjevontank pavcho amcho husko dakhounchê khatir hem kam’ ami hatant ghetlam.

²⁰Udar monan dil’lim itlim danam pavounchi zobabdari palltanam, konnench amchi ttika korchi nhoi mhonn oxem ami manddun haddlam.

²¹Kiteak nhoich Deva mukhar punn mon’xanchê-i nodrek sarkem asa tem korunk ami vavurtanv.

²²Hanchê borabôr anink eklea amchea bhavak ami dhaddla: tachi hurba portun-portun ani zaiteam bhasamnim ami topasun kaddlea; taka tumcho chôdd visvas asa dekhun, tachi hurba atam odik vaddlea.

²³Tit zalear mhozo bhageli ani tumchi seva korunk mhozo sohokari; heram bhavam vixim oxem sangchem asa: te povitr-sobhanche dut ani Kristak mhoima haddtat tosle sevok.

²⁴Oxem tôr, povitr-sobham mukhar tumi tanchi opurbai kortat mhonn dakhoiat, ani tumchê vixim mhaka obhiman bhògta to khorench bhogunk favo mhonn dakhoun diat.