Read Goan Konkani Gal 1 Bible Online

Gal 1 - Goan Konkani bible

Gal 1

¹Hanv Paulu apostl hem potr boroitam. Apostlanchem apovnnem mhaka mon’xam thaun vô khõicheach eka mon’xa udexim ieunk na; punn Jezu Kristan ani Taka mornnantlo punorjivont kel’lea Deva, Tachea Bapan, mhaka apostl zaunk apoila. Mhojea sangata asat team soglleam bhavam-bhoinnim borabôr Galaxiecheam povitr-sobhank hanv noman kortam:

³Dev amcho Bap ani Jezu Krist amcho Somi tumkam Apli doiallai ani xanti bhogunk dium.

⁴Hea atanchea noxttea kallantlim amkam nivarunk, amcheam patkam pasot Jezun Apnnachench somorponn kelem: hi Deva, amchea Bapachi, khuxi asli.

⁵Sasnnachea sasnnak Takach mhoima! Amen.

⁶Devan tumkam Kristachi doiallai bhogunk apoileant: Taka itlê vegim sanddun dusri kosli bori khobor tumi dhôrlea mhonn mhaka ojap dista.

⁷Khorem mhonn’lear, dusri bori khobor mhonnleli nanch, punn tumkam gondhollant ghalunk ani Kristachi bori khobor donsounk sôdtat tosle monis tumchê modem upzoleat.

⁸Punn ami tumkam porgott kelea te bhore khobre bhair konn-ui — amich zaum te, vô sorgar thaun ail’lo to êk devdut zaum — dusri ek Bhori Khobor porgott koritit zalear, Devacho xirap tacher poddum!

⁹Adim ami sanglam tench atam anink êk pavtt sangtanv: tumi mandun ghetlea te bhore khobre bhair konn-ui dusri ek tumkam porgott korit zalear, Devacho xirap tacher poddum!

¹⁰Atam hanv konnak manonk sôdtam-so tumkam dista — mon’xank ki Devak? Mon’xank khuxi korunk hanv bhair sorlam kai? Ozun porian mon’xanchi khuxemôt korunk hanvem sôdlolem zalear, Kristacho sevôk hanv zauncho naslom.

¹¹Hea pasot bhavam-bhoinnimnô, hanvem porgôttlea ti Bhori Khobor mon’xam thaun upzunk na mhonn tumi zanna zalelim mhaka zai;

¹²khõicheach mon’xa koddlem hanvem tem gheunk na, vô konnench mhaka tachi somzonni diunk na. Khud Jezu Kristan ti mhaka ugddapi korun dilea.

¹³Adim, Judevanchem xastr palltalom tedna, Hanv koso choltalom, koso hanv povitr-sobhek hispa bhair dhumallo ditalom ani ticho nas korunk vavurtalom, tem tumi aikun zannont.

¹⁴Toxench, Judevanchem xastr pallunk ani mhojeam purvozamnim korun dovorleleô chali bhoktin rakhunk mhojê piraiecheam boraborcheam Judevam poros ekdom’ odik hanv hurben bhòrlolom.

¹⁵Mhojê avoichea kusveant-sun Devan mhaka kuxin kaddlo ani Aplê doiallaien mhaka apoilo. Taka zai zalem tedna,

¹⁶Aplea Putachi Bhori Khobor hanvem videxeank porgott korchê khatir, hea Aplea Putachi ollokh Devanuch mhaka ugddapi korun dili. Tea vellar konnachich budh hanvem magunk na,

¹⁷nhoi mhonn mhojê adim apostl zal’leank mellunk Jeruzaleak hanv vochunk na, punn Arabiechea prantant gelom ani porot Damaskak ailom.

¹⁸Hachê magir, tin vorsam uprant, Pedruchi ollokh korunk Jeruzaleak gelom ani tachê sorxem pondra dis ravlom.

¹⁹Dusrea khõicheach apostlak[1] hanvem polleunk na; mhaka mell’lo fokot Somiacho bhav Jakob.

²⁰Hanv tumkam boroitam tem fôtt nhoi mhonn Deva hujir sangtam.

²¹Magir Siria ani Cilicia heam prantantleam thoddeam ganvamnim hanv bhonvlom.

²²Judeiant asleô teô Kristacheô povitr-sobha mhaka tonddan ollkhonasleô.

²³Tãnnim aikol’lem tem itlench: “Zo monis adim amkam dhumallo ditalo ani amchea bhavartacho eka vellar nas korunk vavurtalo, toch monis atam amcho bhavart porgôtt’ta!”

²⁴Ani mhojê khatir teô Devak mhoima ditaleô.