Read Goan Konkani Gal 2 Bible Online

Gal 2 - Goan Konkani bible

Gal 2

¹Uprant, chovda vorsamnim, Barnabasa borabôr ani Titak-ui sangata gheun, hanv novean Jeruzaleak choddun gelom.

²Devan mhaka oxem kollit kelem dekhun hanv thõi gelom; ani videxeam modem hanv porgottit ailam ti Bhori Khobor hanvem fuddaream mukhar khasgi boskent ghali; kiteak mhonn’lear mhozo atancho ani adlo vavr nirfôll zal’lo mhaka naka aslo.

³Tedna, mhojea sangata aslelea Titak porian, to Grik zaun-ui, sunôt korunk konnench boll korunk na.

⁴Jezu Kristacher bhavart dovrun ji amkam svotontrtai mell’lea, ti guptim polleun kaddunk ani amkam novean gulam’ponnant uddounk, amchê modem fals bhav ghusle dekhun ho prosnn upraslo.

⁵Punn tumkam porgott kel’le bhore khobrechem sot surokxit rakhun dovorchê khatir, tanchê mukhar ami ek khinn-bhôr porian man bagaunk na.

⁶Thõi manan lekhlele fuddari asle (hachê adim te khõichea panvddear asle te mhaka poddonk na, kiteak Dev mon’xank tanchea tondda pormannem lekhinam); tôr heam manan lekhleleam fuddareamnim hanvem kitench bodôlchem mhonn koslich suchnna mhaka korunk na.

⁷Ufrattim, sunôt-kel’leank Bhori Khobor porgôttchem kam’ Devan Pedruchê adhin kelam toxench, sunôt korunk nasleleank ti Bhori Khobor porgott korchem kam’ Devan mhojê adhin kelam mhonn tãnnim ollkhun ghetlem.

⁸Kiteak, khorench, Zannem Pedruk Judevancho apostl kela, teach Devan mhaka videxeancho apostl korun dhaddla.

⁹Jakob, Kefas ani Juanv, hankam povitr-sobheche khambe mhonn lekhtalim; tôr heanch mon’xamnim, Devan mhaka dil’lem dennem manun gheun, Barnabasak ani mhaka bhagidar-ponnachi khunna koxi aplo uzvo hat dilo: hê khunnê voilean ami videxeam vatten ani tãnnim Judevam vatten vechem mhonn amchi koblat zali.

¹⁰Goribancho mat ugddas korunk tãnnim amchê lagim maglem; tôr tench hanv zotnaien korit ailam.

¹¹Punn Kefas Antiokiek ailo tedna hanvem taka sobhêmazar virôdh kelo, kiteak mhon’llear tachi chal sarki vankddi asli.

¹²Karonn Jakoba thaun ailole kãi monis thõi pavchê adim to videxi bhavam-bhoinnim borabôr jevtalo; punn te ietôch, sunôt kel’leam heam bhavank bhieun, to ilo-ilo pattim sorlo ani videxi bhavam-bhoinnim borabôr jevpachem tannem sôddlem.

¹³Ani heram Judev bhavarteamnim tachea ddhonge-ponnachi oxi dêkh ghetli, ki Barnabas porian tankam lagun teach ddhonge-ponnachê vatten oddon gelo.

¹⁴Punn Bhore Khobrechea sotachê vatten te nitt-sarke cholonant mhonn polletôch, hanvem soglleam hujir Kefasak mhonn’lem: “Tum êk Judêv, tori Judevanchi chal soddun videxeam bhaxen tum jietai. Oxem zalear, videxeank Judevanchi chal pallunk lavunk sôdtai tem koxem?”

¹⁵Zolman ami Judev, videxeam baxen patki nhoi ami.

¹⁶Toripunn hem ami zannonv: somurt formaita tim kortumbam korun nhoi, punn Jezu Kristacher bhavart dovrun ki khõichim-i mon’xam Devak manovlelim zatat. Mhonntôch, Somurtin formaile-leam kortumbam vorvim, konnankuch Dev Apnnak manovlelim korcho na dekhun, somurt formaita tim kortumbam korun nhoi, punn Jezu Kristacher bhavart dovrun Devak manovlelim zaunchê khatir, ami-i Jezu Kristacher bhavart dovorla.

¹⁷Punn ami Kristak bhavartan ekvotton Dev amkam Apnnak manovlelim kortana, videxeam porim aminch patki mhonn spoxtt disot zalear, khud’ Krist amkam patki bhesant ghalpachem karonn zalo zait? Na ki na!

¹⁸Jem hanvem moddun uddoilelem, tench hanv novean bandunk laglom zalear, hanvem tem moddun vaitt kelam mhonn dakhoitam.

¹⁹Deva pasot jieunche khatir, hanv somurti vorvim somurtik melom. Krista borabor mhaka khursar killaila.

²⁰hanv atam jietam to hanv nhoi; tor Krist mhojê thãi jieta; Mhojea osokt mon’xasoimbant hanv atam jietam tem jivit, mhozo môg kela ani mhojê khatir Apnnakuch somorpun dila tea Devachea Putacher bhavart dovrun hanv jietam.

²¹Devachê doiallaiechem dennem hanv soddun dinam; kiteak Somurti udexim Dev mon’xank Apnnak manovlelim korta zalear, Krist funkott melo-so zalo.