Read Goan Konkani Gal 3 Bible Online

Gal 3 - Goan Konkani bible

Gal 3

¹Ok’kol-nasleleam Galasiekaramnô, tumkam konnem montr bi kelam? Khursar marlolo Jezu Krist tumcheam dolleam mukhar nivôll chitarlolo tôr asa!

²Ek mat tumchê koddchem hanv zanno zaunk sôdtam: tumi ghetla to Povitr Atmo, Somurt formaita tim kamam keleant dekhun ghetla, vô tumkam porgôttlea ti bori khobor tumi bhavartan mandun ghetlea dekhun?

³Devacho Atmo gheun tumi novem jivit suru kel’lem, tench tumi atam kuddiche xokten sompounk sôdtat? Itli tumchi môt uddli?

⁴Itleam vorteam denneancho tumkam mell’la to onnbhôv sogllo funkôtt gelo kai? To sogllo funkôtt gela zaum nozo.

⁵Dev tumkam subham’ponnan Aplo Atmo dita ani tumchê modem vismitam korta: tumi Somurtichim kamam kortat dekhun To oxem korta zait, vô tumkam porgôttlea ti bori khobor tumi bhavartan mandun ghetlea dekhun?

⁶Povitr Pustokar oxem boroilelem asa: “Abrahaman Devacher bhavart dovorlo, ani hea tachea bhavartak lagun taka Devan Apnnak manovlolo kelo.”

⁷Mhonntôch bhavart dhôrla tinch mon’xam Abrahamachi sonsôt mhonn tumi somzunchem.

⁸Bhavarta udexim videxeank Dev Apnnak manovlelim kortolo mhonn adinch polleun, Povitr Pustokar Abrahamak ho xubh sondêx oso adim-fuddench porgôttlo: “Tujê udexim Dev soglleam raxttrank axirvad ditolo.”

⁹Mhonntôch Abraham bhavartacho monis, ani jim konn bhavart dhôrtat, tim tachê borabôr Devacho axirvad ghetat.

¹⁰“ Somurtichea pustokar boroilele asat te soglle kaide samballinant ani pallinant, tancher xirap poddum.” oxem Povitr Pustokar boroilolem asa dekhun somurtin formaileleam kamancher visvas tthevtat titlim-i xirap poddlelim.

¹¹Mhonn’toch, “Bhavarta udexim Dev Apnnak manovlelim korta tim Jivit ghetelim.” oxem Povitr Pustokar boroil’lem asa dekhun, konnuch Somurti udexim Devak manovlelim zainant mhonn dubhavuch na.

¹²Tor Somurt bhavarta thaun upzona, kiteak, portench zalear Povitr pustokar oxem boroilelem asa: “Heo soglleo adnea palltat tinch tanche udexim jivit ghetelim”

¹³Jezu Krista udexim Abrahamak dil’lo axirvad videxeank pavchê khatir ani bhasailolo Atmo bhavarta vorvim amkam mellchê pasot, “ Lankddar umkollta to monis xirap-poddlolo.”, oxem Povitr Pustokar boroilelem asa tea pormonnem, Apunnuch amchê khatir xirap poddlolo zaun, Kristan amkam Somurtichea xirapantlim soddoun ghetlim;

¹⁵Bhavam-bhoinnimnô, chaltea jivitachi vopar ghalun sangtam: mon’xam modem sôi-xik’ko marun thir-monzur kel’lo korar, konnachean to moddunk zaina, nhoi mhonn taka kitench choddounk zaina.

¹⁶Abrahamak ani tachea putak Devan bhasavnneô keleô. Povitr Pustok sobar zannam zal’lê porim “putam-dhuvank” mhonnonam, punn ekleachich khobor korta dekhun oxem mhonnta: “ani tujea putak”; ho put mhollear Krist.

¹⁷Hanv sangunk sôdtam tem hem: Devan thir-monzur kel’lo korar charxim-tis vorsam uprant ailolê Somurtichean rôd’d korunk zaina ani tichean bhasavnni nirfôll korum nozo.

¹⁸Kiteak, zôr daiz Somurtik lagun pavta, tôr tem bhasavnnek lagun nhoi-xem zalem; punn Devan Aplê bhasavnnek lagun tem dennem Abrahamak favo kelem.

¹⁹Somurt koslea xevottak lagun asli tor? Zache vixim bhasavnni kel’li,To ieit porian, kaide portun-portun moddon ieunchê khatir,Devan Somurt sthapun dil’li. Devdutam koddlean eka modestea udexim lokak paunche khatir Devan dil’li ti.

²⁰Fokot dogam vô choddam modem koslo-i vevhar sompouncho asa zalear, modesteachi goroz asa; punn (Abrahamak bhasavnni kortana) Dev ekloch aslo.

²¹Mhonntôch Devan kel’lê bhasavnnecher Somurt add veta zait? Na ki na. Kiteak Jivit diunk podvi asleli Somurt Devan dil’li zalear, mon’xam Somurt pallun khoreponnim Devak manovlelim zato aslim.

²²Sogllo sonvsar patkachê podvê khal asa, mhonn Povitr Pustok sangta, ani oxem Jezu Kristacher dovorlelea bhavarta thaun bhasailelem dennem bhavart dhôrteleank mell’ta

²³Punn bhavartacho kall ieunchê adim, Jezucher bhavart dovorchi goroz mhonn Devan ugddapem kori-sôr, amkam soglleank Somurtin koidi korun dovorlelim.

²⁴Mhonntôch, bhavarta udexim Apnnak manovlelim Devan amkam korche khatir, Krist ieit porian, amcher odhikar cholounk Devan dil’li somurt ti.

²⁵Punn atam bhavartacho kall ieilo, mhonntôch Somurt amcher anink Odhikar choloina.

²⁶Kristachea ekvottant buddoileant tim sogllim tumi Krista sovem ek zaleant dekhun, Jezu Kristachea ekvottant, bhavartak lagun ki sogllim tumi Devachim bhurgim.

²⁸Judêv anink na, Grik na; gulam’ na, svotontr monis na; dadlo na, bail na; tôr Jezu Krista sovem tumi sogllim êk!

²⁹Ani zôr tumi Kristachim, tôr Abrahamachi sonsôt tumi, ani bhasavnnê pormannem daiji tumi.