Read Goan Konkani Gal 4 Bible Online

Gal 4 - Goan Konkani bible

Gal 4

¹Fuddem vochum-ia: sogttacho dhoni zaun-ui, daiji lhan asot porian, tachê ani gulama bhitôr koslich ontôr na;

²tachea bapain tharailelê piraiek to pavot porian, taka rakhunk ani tacho vevhar cholounk nemlole monis astat.

³Têch porim ami sotachê ollkhichê babtint lhan asleanv tedna, srixtti choloitat teô podveô amkam aplea gulam’ponnant dovortaleô.

⁴Punn nemlolo kall bhòrlo tedna, Devan Apleach Putak dhaddlo. Ho Put êkê bailê thaun zolmun ailo ani Somurti khal To jielo.

⁵Somurti khal jieteleank suttka gheun diunchê khatir ani amkam Devachim apnnailelim bhurgim korchê pasot, Devan Taka dhaddlo.

⁶Tumi Aplim bhurgim mhonn dakhoun diunk, “Ab’ba Bapa”, oxem mhonnun ulo marto Aplea Putacho Atmo Devan amcheam kallzamnim ghalo.

⁷Hea pasot tum hea fuddem gulam’ nhoi; tum put. Tum put, mhonntôch, Devan Apleam bhurgeank dovorlelem daiz tujem.

⁸Adim tumi Devak ollkhonasleat, dekhun khore dèv nhoi tanche gulam tumi zal’leant.

⁹Punn atam tumi Devak ollkholea uprant — vô, oxem mhonn’lear odik borem, Devan tumkam ollkhun ghetlea uprant — srixtti choloitat team nirbolli ani dolldiream podveam vatten koxim mhonn tumi portun vetat? Koxim mhonn tumi novean tanchim gulam zaunk sôdtat?

¹⁰Omkeam-omkeam disancho, mhoineancho, somoiancho ani vorsanchi porob korun, osleanch somarombhancher asa tumchem lokx.

¹¹Tumchê modem kel’lo koxtti vavr sogllo funkôtt gelo kai? Ho mhozo husko.

¹²Bhavam-bhoinnimnô, hanv tumchê lagim porathun magtam: mhojê sarkim zaiat, kiteak hanv-ui tumchê sarko zalom. Adim tumi mhaka koslench vaitt korunk na.

¹³Piddek lagun tumkam bori khobor poilêch pavtti porgottunk mhaka soêg mell’lo: hem tumi zannont.

¹⁴Punn mhoji pidda tumkam bhov zhôdd zaun-ui, tumi mhoji beporva korunk na, nhoi mhonn mhaka pois korunk na; ufrattim, hanv êk devdut zal’lê porim, hôi, hanv khud Jezu Krist zal’lê porim, tumi mhaka ievkar dilo.

¹⁵Tedna tumkam itli khuxalkai bhògtali: ti soglli khõi pavli atam? Tumchê vixim hanvuch sakxi ditam: ghòddlelem zalear, tumche dolle konchoun kaddun mhaka ditele asleat.

¹⁶Tôr tumkam hanvem sot sanglem dekhun, tumcho dusman hanv zalom kai?

¹⁷Bori khobor donsounk bhonvtat te tumkam apnnam vatten jikun vhorunk hurba dakhoitat, punn tanchem mon sarkem nhoi; tumkam apnnam vatten jikun gheunchê khatir, tumkam te mhojê thaun toddunk sôdtat.

¹⁸Borea karonnak lagun herank jikun gheunk sôdlear borem; punn sodanch toxem zaunchem, fokot hanv tumchê modem asam tednach nhoi.

¹⁹Mhojeam supurleam bhurgeamnô, tumchê sovem Kristacho akar purto zai-sôr hanv tumkam zolm diunk novean ballontiche vollvolle bhôgtam.

²⁰Hea vellar tumchê modem hajir aslom zalear, mhozo sobhav vegllo zato aslo! Tumkam lagun hanv ekdom’ huskelam!

²¹Sangat mhaka: Somurti khal tumi jieunk sôdtat mum? Tôr Somurt sangta tem aikunk na tumi?

²²Abrahamak dog put asle mhonn boroil’lem asa: eklo gulam’-cheddvacho ani dusro svontontr bailecho.

²³Gulam’-cheddvacho to soimbacheam nemam pormannem zolmol’lo, ani svadhin bailecho to Devan Abrahamak kel’lê bhasavnnê udexim zolmol’lo.

²⁴Heam ghòddnneantli êk vopar kaddum-ieta. Heô dogi bailô mhonngê don korar: êk mhon’llear Sinai Dongra velo; tacho rupkar Hagar ani ti apleam bhurgeank gulam zaunk zolma haddta.

²⁵Hagar mhonn’lear Arabient aslelea Sinai Dongracho rupkar, teach borabôr atanchea Jeruzaleacho-i rupkar, kiteak hem Jeruzalem apleam bhurgeam soit gulam’ponnant asa.

²⁶Punn adim sanglea ti svotontr bail sorgar thaun denvlelea Jeruzaleacho rupkar, ani hi ki amchi avoi.

²⁷Kiteak oxem Povitr Pustokar boroilelem asa: “Sontosbhorit za, bhurgem-ball naslelê, vanzttê bailê! Ballonticheô dukhi bhogunk naslelê, khuxal za, anondache ul’las sôdd! Tôr sôddlelê bailek odik bhurgim, ghovan kodinch soddunk na tichê poros chodd!”

²⁸Mhonntôch, mhojeam bhavam-bhoinnimnô, tumi Isaka porim bhasavnnechim bhurgim.

²⁹Tedna soimbacheam nemam pormannem zolmol’lo bhurgo Devachê bhasavnnê udexim zolmol’lea bhurgeak piddapidd ditalo, toxench atam-i ghòddta.

³⁰Punn Povitr Pustok kitem sangta? “Gulam’-cheddvak ani tachea putak bhair ghal; kiteak svotontr bailechea puta borabôr gulam’-cheddvachea putak daizant vantto ascho na.”

³¹Mhonntôch, bhavam-bhoinnimnô, ami gulam’-cheddvachim bhurgim nhoi, punn svotontr bailechim.