Read Goan Konkani Gal 5 Bible Online

Gal 5 - Goan Konkani bible

Gal 5

¹Ami atam svotontr zaleanv, kiteak Kristan amkam svotontr keleant. Mhonntôch thir ravat, ani novean gulam’ponnachem zum tumcher ghe nakat.

²Hanv, Paulu, tumkam sangtam: tumi sunôt korunk dixeat zalear, Krist tumkam kiteakuch upkaronam zalo.

³Sunôt korunk ditat titleank-ui novean xiddkaitam: akhi Somurt pallunk tankam kaido asa.

⁴Somurti vorvim zôr apunn Devak manovlelim zatelet mhonn tumi ravtat, tôr tumcho ani Kristacho sombond tumi toddun uddoilo, Devachi doiallai tumkam ontorli.

⁵Ami zalear, bhavartak lagun, Povitr Atmo amchê sovem korta tea vavra udexim, Dev amkam Apnnak manovlelim kortolo mhonn bhorvanso dhorun axeun ravtanv.

⁶Jezu Kristachea ektarant asleleank tãnnim sunôt keli vô na keli mhonn porvach na; mhotvachem tem ekuch — pritimogachê sfurtin aplo vavr korit asa to bhavart.

⁷Bhavartachea margar kitlea nettan tumi dhanvot asleat; tumkam vatter addaunk pavlo konn? sotachea marga velim konnem tumkam koddsorailim?

⁸Devan tumkam apoita tea Devan, koxêch bhaxen hem tumchea monant ghalum nozo.

⁹Sogllench pitt fugounk thoddench ambttem puro, oxem nhoi?

¹⁰Somiachea ekvottant ami asanv, dekhun tumchem ani mhojem mon vegllem zaunchem na mhonn tumcher hanv patietam; ani toxench, tumkam khubdaita to, konn-ui to zaum, Devachê khastik sampoddtolo mhonn hanv ravtam.

¹¹Bhavam-bhoinnimnô, sunôt gorjechi mhonn hanv ozun porgôtt’tam zalear, kiteak mhonn hanvem ozun dhumallo bhôgcho poddta? Tem khorem zal’lem zalear, hanv kortam ti khursachi porgôttnni mhaka kosleach trasant ghalchi nasli.

¹²Tumkam khubdaitat tãnnim, sunôt korchê korun, apnnankuch vochun izdde korun sôddche.

¹³Bhavam-bhoinnimnô, Devan tumkam svotontr zaunk apoileant; punn svotontrtaiechea niban mat patki soimbacheô khuxeo pallinakat; hachê svater ekamekachi pritimogan seva korat.

¹⁴Kiteak akhi Somurt ekach utran attapleli asa: “Tuzo môg kortai toso tujea peleacho mog kôrcho.”

¹⁵Chotrai dhôrat: ekamekak ghans marun khaxeat zalear, tumi ekamekacho nas kortelet.

¹⁶Sangtam tem hem: Povitr Atmeachê sfurti pormannem cholat ani patki soimbacheô khuxeo pallunk tumi pavchim nant.

¹⁷Patki soimbacheô khuxeô Povitr Atmeacheam khuxencher add, ani Atmeacheô khuxeô patki soimbacheam khuxencher add; Povitr Atmo ani patki soimb ekamekacher zhuztat dekhun, tumchea patki soimbacheam vondovnneam pormannem tumi cholum nozo.

¹⁸Povitr Atmo tumkam choloita zalear, Somurt tumcher aplo odhikar choloina.

¹⁹Patki soimba pormannem choltat tanchim kamam ollkhunk sompem. Oslim mon’xam pozoddponnant, mhelleponnant ani kamcharant lolltat;

²⁰Murti-puttleank bhôztat ani ghaddianger dhanvtat; dusman’kai samballtat ani zhogddeamnim dis kaddtat; nattkaien bhoron astat ani krodhan zolltat; hixpa bhair vhodd-vhodd vostunche axen bhonvtat; dusongam ani pokxam udexim loka modem bhed-futti ghaltat;

²¹futtloleam dolleamnim peleak polletat; soreak lobhdol’lim astat; dhumxannamnim rat sartat. Ani anink-ui oslim khotteponnam kortat. Tumkam adim xiddkaileant toxem, atam-i xiddkaitam: oslim kamam kortat tankam Devachea Rajeachem daiz bhogunk mellchem na.

²²Povitr Atmo, dusrê vatten, oslem foll utpon korta: mon’xam modem pritimôg vaddoita; kallzamnim khôl khuxalkai upzoita; ekameka lagim sondhan korun xanti vosoita; domkavnneam mukhar thôndd ravunk adar dita; peleak borem korunk ani moipasan vagounk xikoita; ek-ekleak visvas favo-aslolo monis korta;

²³mon’xank dulob kallzachim korta; ap-apleô vondavnneô domaunk ghottai dita. Hê bhaxen jieteleancho, somurt kosloch guneanv korunk xokona.

²⁴Jim konn Jezu Kristachim, tãnnim apleam ogunnam ani vondovnneam borabôr aplem patki soimb khursar marun dovorlam.

²⁵Zôr Povitr Atmo amchem jivit, tôr Atmo amkam choloun vhorta toxim cholum-ia.

²⁶Ami amchich boddai korum noiê, ekamekak challoum noiê, ekamekachi nattkai dhorum noiê.