Read Goan Konkani Gal 6 Bible Online

Gal 6 - Goan Konkani bible

Gal 6

¹Mhojeam bhavam-bhoinnimnô, konn-ui koslea-i eka guneanvak sampoddlim zalear-ui, Povitr Atmo tumkam choloita mhonntôch tankam dulobaien nitt margar haddat; ani tumi zonn-eklean, apunn-ui toxench tallnnent poddona zaunk, chotrai dhôrchi.

²Ekamekacho bhar vhorunk adar diat, oxem korun tumi Kristachi somurt palltelet.

³Jim konn, apunn kãich nhoi astana, apunn kitem tori mhonn somzotat, tim apnnankuch fosoitat.

⁴Zonn-eklean ap-apli vagnnuk topasun kaddchi ani, ti bori zalear, dusream lagim sôr korinastanam, tachean vô tichean apnnachêch khatir khuxalkai bhogum-ieta;

⁵kiteak zonn-ekleak ap-aplem ojem uklun vhorchem asa.

⁶Devachea Utrachi xikovnn ghetat tãnnim sogllê aplê asticho vantto apnnank xikoiteleank diuncho.

⁷Tuminch fosovo nakat: Devak fosounk zaina. Tôr ami vomptanv tench ami lunvteleanv.

⁸Patki soimbacheam vondovnneanchea xetant ami vomplem zalear, hea patki soimbantli ami lunvtelenv kusddai; punn Povitr Atmeachea xetant ami vomplem zalear, heach Atmea thaun ami lunvtelenv sasnnik jivit.

⁹Mhonntôch thokona-stana borem tem korum-ia: kiteak borem korchem soddun dinanv zalear, tachem pik vêll pavtôch amkam melltelem.

¹⁰Dekhun amkam dil’lo vogôt asot porian, soglleank borem korum-ia, bhov-korun bhavarta vorvim amchim bhavbhoinn zal’leank.

¹¹Atam mhojeach hatan him utram boroitam: kedeam vhoddleam okxoramnim hanv boroitam tem borem-korn polleiat.

¹²Je konn mon’xanchê nodrek boddai dakhounk sôdtat, tech te tumkam sunôt korunk boll kortat te. Ani oxem kiteak kortat zait? Fokot Kristachea khursak lagun apnnancher piddapidd iena zaunk.

¹³Te apunnuch sunôt kortat khorem, punn Somurt kãi pallinant; Fokot tumchê kuddi vorvim apnnank man mellchê khatir, tumi sunôt kel’li tankam zai.

¹⁴Mhaka zalear, vhoddvikechem karonn ekuch: Jezu Krist amcho Somi khursar melo, hich mhoji vhoddvik. Hea Tachea khursa vorvim mhaka sonvsar khursar mela ani sonvsarak hanv khursar melam.

¹⁵Sunôt keli vô na keli, haka koslich bixat na: novi rochnna zaunk hem ekuch sorv mhotvachem!

¹⁶Hea nema pormannem choltat titleancher-ui ani Devachê Israel-porjecher denvum xanti ani-kaklut!

¹⁷Itlem sanglea uprant konnench mhaka anink tras dium noiê; kiteak mhojê kuddir asat te dag Jezu pasot hanvem bhôgleleam koxttanche.

¹⁸Bhavam-bhoinnimnô, amchea Somia Jezu Kristachi doiallai tumi odik-odik bhogunk pavum. Amen.