Read Goan Konkani Efz 1 Bible Online

Efz 1 - Goan Konkani bible

Efz 1

¹Paulu, Devachê khuxen, Krista Jezucho apostl, Krista Jezuchea ekvottan aplea jivitant vixvaxi asa te Devache porjek hem potr boroita.

²Deva amchea Bapa ani Somia Jezu Krista koddchi doiallai ani xanti tumkam.

³Soglleam atmik denneamnim unch sorgim Krista sovem amkam bhorleant Tea Amchea Somia Jezu Kristachea Deva-Bapak vakhann'ni- dhinvasnni,

⁴Apnna samkar, ami povitr ani patkam-mekllim, maiêmogachim zaunche pasot, Kristakodde amchea ekvotta udexim, ami Aplim zaunk, Sonvsar rochchê adim pasun Tannem amkam vichun kaddunuch dovorlelim.

⁵Aplea Pritivont Puta sovem, Devan amkam dilem tea Aplea udar mogachea vortea denneak lagun, ami Apnnak vakhannuk, Jezu Krista sovem Apunn amkam Apleo put-dhuvo kortolo mhunn Tannem tharailelench aslem. Hi Tachi udar ieuzonn asli.

⁷Thav naslele khol zannvaien ani bariksannen, Tannem amcher xim-mer nastana otoile te doiallaieche bhorte pormonnem, Tachê sovem, Tacheach rogtan, amkam atam mell'li soddvonn, amchim patkam bhogsun gelim.

⁹Kallam-iuganchê sompadnnek, sorgar-prithver asa titlem-i Tachêch adhin ektthãi korunk, Apnnem Krista sovem tharaileli te bore ievzônne pormonnem, Aplê khuxecho gutt Tannem amkam ugto korun dilo;

¹¹Kristacher bhorvonso dovrunk poilim tim ami, Tache kirte-mhoimek jieunche khatir, Apnnachêch khuxê pormannem Zo ekloch sogllem ievjita, Zo ekloch sogllem tharaita, Tannench amkam [Judêv lokak][1] Jezu sovem Aplim mhonnun Aplea sasnnant nirmun haddleant.

¹³Kristachea ekvottant atam tumi-i bhitôr sorleant, kiteak tumi-i sotacho sondêx aikola, soddvonnechi bori khobor bhavart dhorun mandun ghetlea. Tumi-i Aplim mhonn dakhouncheak Devan tumcher xik'ko marla: Bhasailolo Povitr Atmo Tannem tumcher dhaddun dila.

¹⁴Amkam dovorlelea daizacho khud Povitr Atmo isaro. Ani Aplim asat tankam Dev sompurnn suttka ditolo mhonn Amkam khatri hich! Devak mhoima ani vakhann'ni

¹⁵Hea pasot, Somia Jezucher tumi bhavart dovorla ani soglleam bhoktancho tumi môg kortat mhonn hanvem aikolam

¹⁶tê meren tumchê khatir hanv Devak argham diit asam, ani mhojeam magnneamnim hanv tumcho ugddas korit asam.

¹⁷Apli poripurnn ollokh tumkam mellche khatir, Amchea Somia Jezu Kristacho Dev, mhoimevont Bap, Aplo zannvaiecho ani prokasnnecho Atmo tumkam dium.

¹⁸Tannem tumkam apoileant to bhorvanso bhoktam sovem Aple mhoimevont daizachi ti sompurnai, ani bhavart dovortat tanche sovem kitli xim-mer nasleli Tachi xokti ti! Devan Kristak meleleantlo punorjivont kelo ani sorgar Aplea uzveak bosoilo tedna, Tannem Krista sovem Apli podvi dakhoili ti tich vorti podvi To amche sovem dakhoita ti hi ti tumi zanna zaunche pasot tumchea gineanacheam dolleank uzvadd diuncheakui hanv magit asam.

²¹Thõi sorgar soglleam sorgincheam pordhanam, odhikaream, podveam ani rajeam voir, toxench atanchea vô fuddlea iugantlea kosli-i sot'tea-aslelea xrextt nanvacher, Devan Kristak odhikar dilo.

²²Devan soglleô vostu Kristacheam pãiam tolla ghaleat ani soglleam voir ubarun Taka povitr-sobhechem mostok korun dila.

²³Ti tachi kudd, Tachi poripurnntai: Zo akhi srixtti poripurnn korit asa, Tachich poripurnntai ti.