Read Goan Konkani Efz 2 Bible Online

Efz 2 - Goan Konkani bible

Efz 2

¹Tumcheam opradank ani patkank lagun tumi mel'leant,

²tedna tumi hea sonvsarachê vaitt chali pormannem choltaleat; varear podvi choloita tacho odhikar tumi man'taleat; mhonngê devcharak tumi khaltim asleat, kiteak Devacher kolpotat tim sogllim tachê adhin astat.

³Khorench mhonn'lear, adim ami-i sogllim tanchê sarkim asleanv, amchea patki soimbacheam vondovnneam pormannem ami choltaleanv, kuddicheôch khuxeo palltaleanv, ani amcheach vadeachim zal'leanv. Oxem amchea patki soimbachê goti pormannem ami soglleam heram mon'xam bhaxen Devachea krodhak sampoddleleanv.

⁴Punn kitli vhodd Devachi konnvallai! Kitlo mhonn Devan amcho mog kelo!

⁵Amcheam patkank lagun ami mel'lim asleanv, ani tednanch Kristachea ekvottant, Tachea vangdda, Devan amkam novo jiv dilo! Tachea funkeachea dennean tumkam soddvonn mell'lea!

⁶Jezu Krista sovem, Tachea vangdda, Devan amkam punorjivont keleant ani Tachea vangdda amkam sorgar bosoileant

⁷Jezu krista sovem amche thaim Devan Aplem boleponn dakhoilem, fuddleam kallam-iugank Tannem Apli oprimit doiallai porgott keli.

⁸Karonn Devachech doiallaien, bhavarta udexim , tumkam soddvonn mell'lea;

⁹ti tuminch kel'leam proitnancho foll nhoi, punn Devachem funkeachem dennem. He baptint konnench mijas korum noie, kiteak amchi soddvonn amcheanch kornneam udexim upzona.

¹⁰Ami Devachi rochnna: Apnnem adim-fuddench toiar kel'leo boreo kornneo korun ami jieunche khatir Devan amkam rochleant!

¹¹Hea pasot, tumi ekdam zolman videxi mhonn ugddas dhorat; Judev lok mon'xachea hatan kuddir kel'lê kornnek lagun apnnankuch “sunôt kel’le” mhonntat te, tumkam “sunôt korunk naslele” mhonn lekhtat.

¹²Adim tumkam Kristachi ollokh naslich; Israel porjechem vorteponn tumkam lagonaslem; Devan Aplê porjek bhasavnneô korun tichê kodde korar kel'le tantum tumkam vantto naslo; bhorvanso ani Dev-ui nastana hea sonvsarant tumi jietaleat mhonn ugddas dhôrat.

¹³Adim tumi pois asleat; punn atam, Jezu Kristachea ekvottant, Kristachea rogta vorvim, Devan tumkam lagim haddleant.

¹⁴Khorench khursar marlelê Aplêch kuddint tankam doxim korteli ani tanche modem dusmankai dovorteli vonnôt môddli. Judevanchi ani videxeanchi êkuch porza korun Kristanuch amche modem xanti haddli.

¹⁵Oxi xanti sthapun, Apnna sovem dogãichi êkuch novi porza rochun haddche khatir, ani khursa udexim, sogllê dusman'kaiecho nas korun, tankam êkêch kuddint dogãik-ui ektthaun, Apnnem tankam Deva-xim sondhan korun portun haddche khatir, Tannem Somurt, ticheam kaideam-nemam soit kaddun uddoili.

¹⁷Oso To ailo ani Deva koddche pois asleleam videxeank toxench Taka lagim asleleam Judevank Tannem xantichi bori khobor Tannem porgôtt keli.

¹⁸Tachê udexim atam tumchean ani amchean ekach Atmea udexim Bapa mukhar rig gheum ieta.

¹⁹Mhonntôch tumi atam porkim vô bhailim mon'xam nhoi: bhoktanchea vangdda tumi-i sohonagrik ani Devachea ghorabeache vangddi.

²⁰Tumi apostl-anchê ani provadeanchê buneadir bandlolem ghor ani toch Jezu Krist tea ghoracho konnxea-sondhicho fatôr.

²¹Toch hi soglli bandavôll ekvottim samballta ani ti Sorvesporak bhettoil'lem Mondir koxem vaddoita.

²²Tumi-i, Tachê sovem, ieram borabôr Atmea udexim Devachem ghor koxem bandon ietat.