Read Goan Konkani Efz 3 Bible Online

Efz 3 - Goan Konkani bible

Efz 3

¹Hea pasot hanv Paulu, videxeam khatir Jezu Kristacho koidi, tumkam sangtam:

²Tumchê khatir, Devan Aple doiallaie udexim, ho vaur korunk, mhojea hatamnim ghala mhonn,

³ani hanvem thoddeach utramnim boroilam tea pormonnem, Aplo gutt ugto korun Devan mhaka tachi ollokh dilea mhonn dubhavavinn tumi aikolanch,

⁴tem tumi vachtoch, Kristachea guttachi kitli mhaka somzonni asa ti tumkam kollon ieteli.

⁵Hea guttachi khobor adleam pinddkanchea khõicheach mon'xak kollounk na; punn atam, Atmea udexim, Devan to gutt Apleam bhoktivont apostlank ani provadeank ugto kela:

⁶mhonngê xubhvortomana udexim, Jezu Kristachea ekvottant, videxeank tench daiz favo zalam, têch kuddiche sandhe zaunk tim pavleant, ani têch bhasavnnent tankam-i vantto mell'la.

⁷Aple vaurto podve udexim, mhaka favo kel'le Devachê doiallaiechea dennea pormonnem he Bore Khobrecho hanv sevôk zalam.

⁸Bhoktam modem soglleam-vôn lhan to hanv zaunui, tthav-nasleli Kristachi dovlôt videxeank porgôtt korchem hem dennem Devan mhaka favo kelam,

⁹ani Aplea guttachi manddavôll kosli ti sobhêmazar uzvaddaunchem kam' Tannem mhaka dilam. Sogtta-sorvanchea Rochnnara Devan ho gutt kallam-iuganchea orombak thaun Apnnachêch bhitôr lipoun dovorlolo;

¹⁰hê porim Devachi vividh zannvai fokot atam, povitr-sobhê vorvim, ontrallaveleam pordhanank ani odhikareank kollit zaunchi asli.

¹¹Hich ti amchea Somia Jezu Krista sovem Devan sasnnak thaun ievjil'li manddavôll.

¹²Tachê sovem, Tacher bhavart dovrun, Deva mukhar visvasan vochunk amkam dhir mellta.

¹³Mhonntôch, tumchê khatir hanv koxtt-dogd bhôgtam mhonn polleun, tumi niraxi zaum nakat mhonn hanv tumchê kodde magtam: he mhoje koxtt-dogd tumchi vhoddvik.

¹⁴Amcho sorgincho Bap sorgar ani prithver aslolea sogllê torechea ghoranneacho Oromb; tôr Tachê mukhar saxttangim poddun oxem magtam:

¹⁶Tumchê bhitorlê-bhitôr novim zal'leam mon'xancho akar Bapachea Povitr Atmea vorvim, ghottaien vaddot vochunk ani bhavarta vorvim Kristan tumcheam kallzamnim tthikann korunk, tumchim pallam ani bunead mogant rigunk, Aple mhoimeche bhorten tumkam favo korunk hanv Devakodde magtam.

¹⁸Devacheam somest bhoktam borabôr Jezucho môg kitlo rund, kitlo lamb, kitlo unch ani kitlo khôl to somzum mhonn khorem mhon’llear, Kristacho môg kodinch poripurnntaien ollkhum nozo, tori to tumi onnbhovunk pavum mhonn, ani oso, hô mog purnntaien onnbhovun, tumi Devachich poripurnntai bhogunk pavum mhonn hanv magtam.

²⁰Aplê podven amchê bhitôr Zo Aplem kam' korit asa, amchean magunk-prarthunk zata, vô ami kolpunk xoktanv, tachê poros ogllem korunk Zaka podvi xokti asa,

²¹Taka, amchea Bapak, mhoima, akhê povitr-sobhê modem, Jezu Krista sovem, pinddkê-pinddkent, sasnna- sasnnak! Amen!