Read Goan Konkani Efz 4 Bible Online

Efz 4 - Goan Konkani bible

Efz 4

¹Tea pasot, hanv, atam Somiachea ekvottant koidi, tumchê lagim porathun magtam: tumchea apovnneak sobta toslem tumchem jivit zaum-di:

²sodanch khaltim zaiat, dulob ani sosnnikaiechim; ekamekak mogan sõsat;

³Devachea Atmean tumchê modem ekvôtt rochun haddla, tôr atam tumkam ektthãi dovorta ti xanti samballunk zata titlem korat.

⁴Tumi sogllim êkuch kudd ghôddtat, soglleank êkuch Povitr Atmo dil'lo asa, toxench tumchea apovnneak êkuch bhorvanso asa;

⁵amcho Somi ekloch, êkuch amcho bhavart, ek amcho batism;

⁶Dev-ui ekloch, sogtta-sorvancher odhikar choloita To, sogtta-soglleam udexim Aplem kam' korit asa To, ani sogtta-sorvam sovem tthikann korun asa To, amam-somestancho Bap.

⁷Kristan vanttun dilam tea mapan amchê modlea zonn-ekleak êk kherit vorgunn dil'lo asa.

⁸Hea pasot Povitr Pustok mhonnta: “Unch choddun vechê vellim, Apnna borabôr Tannem zaiteank koidi korun vhelim, mon'xank dennim vanttun dilim.”

⁹Tôr “To unch choddlo”, hachi somzonni kitem? Tacho ôrth oso: To poilo sokla, mhonngê amchê prithver, denvun ailo.

¹⁰Zo sokla denvun ailo ani magir voir choddun gelo to Toch: sogllê srixttint Tacho odhikar dixtti poddchê khatir Devan Taka soglleam rochnnam voir ubarlo.

¹¹Tannench mon'xank him dennim dileant: thoddeank apostl keleat, konna-konnank Devacho sondêx gheun to kollit korunk provadi keleat, kãi zannank xubhvortoman porgott korunk dhaddleant, thoddeank sobheche gonvlli zaunk ani bhavartachi xikovnn diunk vinchun kaddleant.

¹²Heam denneancho xevôtt mhonn'lear ho: bhoktank Devachê sevek toear korunk ani oxem Kristachi kudd bandun haddunk.

¹³Oxem okherek ami sogllim, Devachea Putacher bhavart tthevlelim ani Tachi podvi onnbhovunk pavlelim mon'xam, sarkinch êk zatelenv; ani Kristachê poripurnntaient odik-odik vaddon, aminch Tachê poripurnn-taiechea mapak vaddlelim mon'xam zaunk pavtolenv.

¹⁴Tedna ami anink dhakttuleam bhurgeam bhaxen zaunchim nanv; fottkirim mon'xam herank-ui teach fottinchea margar oddun vhorunk apli naddbudhichi xikovnn gheun ietolim, punn ami toslê xikovnnecheam lharancher lotton vechim nanv; ani koslea-i vareachê funkin ami halchim-dholchim nanv.

¹⁵Portench zalear, mogan sotachi vatt dhorun, Kristacho akar purteponnim ghei-sôr soglleam vattamnim ami vaddot vetelenv. Povitr-sobha Tachi kudd ani To hê kuddichem mostok:

¹⁶Toch ak’khê kuddiche veg-veglle sandhe ap-aplea zagear ghalun choloita ani ekamekak ekvottaun dhôrta; oxem êk-êk sandho ap-aplem kam' korunk pavta ani kuddichi ghottai vaddoita. Hê porim akhi kudd choddot-vaddot moga vorvim sarki bandon ieta.

¹⁷Mhonntôch atam hanv tumkam sangtam ani Somiachea ekvottant oso tumkam ulo martam: hea fuddem anink videxeam porim jie nakat; tanchem mon polkem, tanchea gineanacher kallôk poddlolo asa; aplim kallzam tãnnim nibor keleant ani tankam sotachi ollokh na dekhun, Devachea jivitant tankam vantto na.

¹⁹Vaitt kortubanchi soglli loz ani khônt soddun, kamchari jivitant tim buddleant ani sogllea jin'sachim pozddim kortubam korit asat.

²⁰Krista vixim osli xikovnn tumi gheunk na,

²¹kiteak dubhava virêt Jezu sovem asto sot tumkam porgôttlam ani xikoilam.

²²Mhonntôch tumchea adlea jivitachi chal tumi soddun diunk zai; khotteam vondovnniam vorvim padd zait veta tem tumchem adlem-pornnem patki soimb soddun diunchem.

²³Tumchea kallzachi ani monachi sarki novsornni tumi korchi,

²⁴ani Devachea sarkeachim rochlelim, Taka man'ta toslea jivitachim ani povitrtaien cholpi novim mon'xam tumi zaunchem.

²⁵Mhonntôch fôtt marop sarkench sôddat; ekameka lagim sot tench uloiat, kiteak ami ekamekache sandhe.

²⁶Rag tumkam ietoloch, tori ragak lagun patok korinakat; vêll poddot porian rag dhorun ravo nakat;

²⁷ani tumchea kallzant devcharak rig dinakat.

²⁸Chori korchi sonvoi asli tannem anink choriô korcheô nhoi, punn apleam hatamnim koxtt korun koslo tori boro vavr korcho, ani oso gorjevontak adar diunk tachê lagim kitem tori astelem.

²⁹Tumchea tonddantlim bhair sortat tim utram bemoriadichim zaunchim nhoi; portench zalear, aikoteleank soega pormannem bori dêkh ditat ani faideak poddtat toslim zaunchim tumchim utram.

³⁰Devachea Povitr Atmeak khônt dium nakat, kiteak Dev tumkam purnn suttka ditolo to Dis ietolo mhonn, tumi Aplim mhonn dakhounk, ho Atmo Devachoch tumcher xik'ko, tumkam ek khatri.

³¹Soglli kôddsann kallzantli bhair ghalat; rag ani krôdh monant dhorunkuch nakat; bob marum nakat; jasteo marop bond korat; sogllê torechem khotteponn soddun diat.

³²Ekameka thãi doiall-movall kallzachim zaiat. Krista sovem Devan tumkam bhogxilim, têch bhaxen tumi-i ekamekak bhôgsat.