Read Goan Konkani Efz 5 Bible Online

Efz 5 - Goan Konkani bible

Efz 5

¹Tumi Devachim opurbaiechim bhurgim dekhun, Tachi dêkh gheiat.

²Kitlo mhonn Kristan tumcho môg kelo! Amchê khatir Tannem, Devak man'pachem, domdomit pormollachem, Apnnachench somorponn ani bolidan kelem; tôr tumi-i Tachêch bhaxen mogan cholat.

³Kamcharachi, soddeponnachi ani sonvsari vostunchê bhagonaslolê axechi gozal porian tumchê modem aschich nhoi, kiteak osleô vostu bhoktank sobonant.

⁴Toxench mhellem vô burxem ulovop ani bemoriadichim fokannam tumche modem aschem nhoi: hem sogllem tumkam puttvona; ufrattim, tumchim utram zaum-di Devak dhin'vas divpachim.

⁵Hem mat monant dhôrat: kamchari mon'xank, pozddea lokak, sonvsari vostunchi odik-odik axa dhorunuch jietat tankam, Kristachea ani Devachea rajeant daiz na. (Osli sonvsari vostunchi axa khorench mhonn'lear murtim-puttleanchi puza.)

⁶Polkeam utramnim konnench tumkam fosoinam zaunk chotrai dhôrat. Osleanch vostunk lagun Devak khaltim ravonant team mon'xancher Tacho krôdh denvun ieta.

⁷Osleam mon'xanchea bhaga tumi poddum nakat.

⁸Eka kallar tumi-i kallokant asleat, punn atam Somiachea ekvottant tumi uzvaddak pavleant; tôr uzvaddacheam bhurgeanchi chal dhôrat;

⁹khorench, uzvaddachim kamam sogllea jin'sachem boreponn, promannikponn ani sot.

¹⁰Somiak kitem odik man'ta tem sodun kaddat.

¹¹Ani kallokachim holkim kortubam korteleam kodde kosloch sombond dovrum nakat; portench zalear, tanchem patok tankam dakhoun diat.

¹²Guptim kortat team kortubanchi khobor porian korunk loz dista.

¹³Punn uzvaddak haddtat teô soglleô vostu kosleô teô sarkeô kollon ietat; ani kosli-i vôst uzvaddak haddtôch, tichem khorem soimb dison ieta.

¹⁴Dekhun Povitr Pustokar oxem mhonnlelem asa: “Zagim zaiat nhidentlim! Jivont zaiat mornantlim, ani Kristuch tumchê voir porzolltolo.”

¹⁵Mhonntôch tumchea jivitachi chal kosli ti mhenotin polleiat, ani nennar mon'xanchi nhoi punn xanneam mon'xanchi tumchea jivitachi chal zaum-di.

¹⁶Hea kallar vaitt khub vaddlam, dekhun tumi tumkam dil'lea vellacho zata titlo faido kaddat.

¹⁷Chotraien cholonant toslim mon'xam zaum nakat, punn Somiachi khuxi konn ti sodun kaddat.

¹⁸Soro pieun bebdikai korum nakat, oxem tumi tumchea jivitachi vatt laitoleat. Portench zalear, Povitr Atmean bhòrlelim mon'xam zaiat.

¹⁹Tumcheam zomatimnim stotram, gitam ani bhoktichim gaionam gaiat ani tumcheam kallzamnim gitam-gaionam korun Somiak vakhannit ravat.

²⁰Amchea Somia Jezu Kristachea Nanvan Devak, amchea Bapak, sodanch ani sogllê svater dhin'vaxit ravat.

²¹Tumi Kristak man ditat mhonn dakhounk ekamekak khaltim zaiat.

²²Bailô apleam ghovank khalteô zauncheô ani oxem apunn Somiak khalteô asat mhonn tãnnim dakhounchem.

²³Kiteak, zoso Kristak, Aplê kuddichea -- mhonngê povitr-sobhechea -- Soddvonnarak, ticher odhikar asa, toso ghovak aplê bailecher odhikar asa.

²⁴Ani oxem, zoxi povitr-sobha Kristak khalti asa, toxeô bailô apleam ghovank sogttant khalteô asunk zai.

²⁵Tumi potimnô, aikat: zoso Kristan povitr-sobhecho môg kelo ani tichê khatir Aplo jiv dilo, toxench tumi tumcheam potinnincho môg korat.

²⁶Tannem he sobhek Aplea utra-podven povitr keli ani udka-dhuvnnen nitoll nirmoll korun Devak bhettoili.

²⁷Povitr-sobhek sundôr-sobit korun, Tannem tika Apnna mukhar ubi keli! Khot nasloli, miri nasloli, koslich khôdd nasloli, povitr ani nixkollonk Tannem tika keli!

²⁸Hêch porim, aplo môg kortat toso, potimnim apleam potinnincho môg korunk zai. Aplê potinnicho môg korta to aploch môg korta.

²⁹Konnuch monis aplê kuddicho dvês korina, punn ti pôsta ani ticho poramôs korta; Krist-ui povitr-sobhê thãi toxench korta,

³⁰kiteak ami Tachê kuddiche sandhe.

³¹Dekhun “dadlo aplea avoibapaik sanddtolo ani aplê potinnik ekvott'tolo ani tim dogam-i êk zatelim.”

³²Povitr Pustokantleam heam utramnim ek unch molachem gupit sot attaplelem asa: tem Kristak ani povitr-sobhek lagu zata mhonn hanv dhôrtam.

³³Punn tim utram tumkam-i lagu zatat: mhonntôch tumchê modlea zonn-eklean, aplo môg korta toso, aplê potinnicho korcho, ani potinnin aplea potik man diuncho.