Read Goan Konkani Fil 1 Bible Online

Fil 1 - Goan Konkani bible

Fil 1

¹Filipi xarantleam Jezu Kristachea ekvottant asleleam soglleam bhoktank, tancheam vhoddilank ani sevokank, Paulu ani Timot, Jezu Kristache chakor, noman kortat.

²Deva amchea Bapakoddchi ani amchea Somia Jezu Kristakoddchi doiallai ani xanti tumkam.

³Tumcho ugddas kortam titlê-i pavtti tumchê pasot hanv mhojea Devak dhin’vastam,

⁴ani tumam-somestam khatir prarthon kortam titlê-i pavtti khuxalkaien tem kortam,

⁵kiteak poilea disa thaun tem az porian xubhvorto-manachea mhojea vavrant tumi mhaka adar dila.

⁶Devan tumchê modem ho boro vavr suru kela, tôr Toch, Jezu Kristacho Dis ie porian, ho vavr xarti pavoitolo mhonn mhaka khatri asa.

⁷Tumkam mhojea kallzant hanv gheun asam, ani tumam-somestam vixim him bhavnna mhaka asunk favoch. Kiteak Devan mhaka favo kel’lea denneant, mhonngê mhojeam sankllimnim ani xubhvhortoman rakhchea ani thir korchea kamant, tumi sogllim mhojim bhagidar.

⁸Jezu Kristachea kallzachea mogan tumam-somestancho hanv kitlo môg kortam, hacho khud Dev mhozo govai.

⁹Devache mhoime ani vhoddvike khatir, Devak man’ta toslea jivitachim follam Jezu Kristan amchê sovem utpon kortoch, Kristachea tea disak, nirmoll ani niropradi tumi zaunche pasot, kitem odik borem tem tumi sodanch vinchun kaddunk, sotachi odik unch ollokh ani odik khôl onnbhov tumkam mellun, tumcho môg odik-odik vaddom, mhonn mhojim magnnim.

¹²Bhavam-bhoinnimnô, mhoji atanchi poristhiti xubhvhortomanachê porgôttnnek odik faideachi zali: hem tumi zanno zal’lim mhaka zai.

¹³Krista khatir mhaka bondkhonnint ghala mhonn, nhoi fokot razvaddeantleam soglleam modem, punn heram-i sogllea loka modem gazlam,

¹⁴ani mhoje bondkhonnek lagun, Somiacher dovorlolo zaiteam bhavam-bhoinnincho bhavart odik ghôtt zaun, tim odik dhiran ani bhiranti vinnem Devachem utor porgottunk lagleant.

¹⁵Tantlim kãi zannam nattkaien ani ekamekak virôdh korun Kristak porgôtt’tat tem khorem, punn dusrim borea monan kortat.

¹⁶Bore khobre-rakhnnechea vaurak lagun. mhaka bondkhonnent ghala mhonn zanna zaun,him nimannim tim, mogan Kristak porgott’tat.

¹⁷Anink her tim khorea monan nhoi, punn nattkaien Kristak porgôtt’tat, mhojê bondkhonniche tras vaddoitelim mhonn somzotat.

¹⁸Punn kãi porva na: koxê-i bhaxen, borea vô vaitt monan, Krist porgôtt zata, ani hakach lagun hanv khuxal asam;

¹⁹ani hanv khuxaluch ravtolom, kiteak tumcheam magnneamnim ani Jezu Kristachea Atmeachea adaran, hem mhaka suttka mellunk upkartelem mhonn hanv zannom.

²⁰Mhozo khotkhotit anvddo ani bhorvanso hoch, ki hanv kiteantuch lojek poddcho na ani, hanv morum vô jivo asum, sodanch toxem atam-i, kalljidarponnan bhoron hanv fuddem vetolom, ani mhojê kuddint Kristak vhoddvik mellteli.

²¹Mhonntôch mhojea jivitak koslo ôrth asa? Fokot Krist mhojea jivitak ôrth dita; punn hanv moron zalear, odik faido zatolo.

²²Oxem astana, jivo urun mhojean odik faideachem kam’ korunk zata zalear, hanvem kitem vinchun kaddchem tem mhaka somzona.

²³Donim-i vattamnim hanv oddon vetam: êkê vatten hem jivit sompoun Krista sorxem asunk hanv otrektam, ani hem ekdom’ odik borem;

²⁴punn, dusrê vatten, hanv jivo urlolo tumchê pasot odik gorjechem.

²⁵Tumkam odik dhir diunk ani bhavartant tumchi khuxalkai vaddounk hanv jivo urtolom ani tumam-somestanchea vangdda astolom mhonn hanv khatren zannom.

²⁶Ani hê bhaxen, hanv tumchê modem portun ietôch, mhojê khatir Jezu Krista sovem tumkam obhiman bhògta to ekdom’ vaddtolo.

²⁷Tem kitem-i zaum, Kristachea xubhvhortomanak sobta toslem tumchem jivit zaunk zai; oxem, tumchê modem vochun hanv khaxa polleunk pavum vô pois thaun tumchi khobor aikum, tumi eka kallzachim zaun thir ubim asat mhonn ani xubhvhortomanachea bhavarta khatir ekach monan vangdda zhuztat mhonn mhaka gomun ieum.

²⁸Tumcheam dusmanank koxêch bhaxen tumi bhieum nakat. Tanchem nisontton zatelem ani tumkam suttka mellteli mhonn, hi êk Devan dil’li khunna zateli.

²⁹Kiteak Kristacher bhavart dovrunkuch nhoi, punn Tachê khatir koxtt-dogd sõsunk-ui Devan tumkam favo kelam.

³⁰Tumi mhaka zhuzlolo pollela ani ozun porian hanv zhuztam mhonn tumi aikotat, teach zhuzant tumkam-i vantto asa.