Read Goan Konkani Fil 2 Bible Online

Fil 2 - Goan Konkani bible

Fil 2

¹Apnna sovem Krist tumchem jivit ghott korta. Aplea mogan tumkam buzvonn dita. Povitr Atmeacho-i tumkam ekchar asa ani tumkam eka-mekachi opurbai asa ani ekamekachi konnvollai dista zalear

²ekchitachim, ekach mogachim, ekach monachim ani êkêch khuxechim zaiat; tednam ki tumi mhaka sarko dhadoxi kortelet.

³Svarti axen kãich korinakat, suki boddai korinakat, punn khalteponnan dusrim tumchê-von vortim mhonn dhôrat;

⁴ap-aplea faideachem kitem tem pollenakat, punn dusreak kitem faideak poddtolem tem polleiat.

⁵Jezu Kristachea monant ani kallzant aslem tench tumchea monant ani kallzant asum-di:

⁶Devachea soimbacho To, punn Devachi gôt Tannem axen samball’n dhorunk na.

⁷Apnnakuch khali kelo, mon’xachem sarkem ghetlem, gulama-akar dhôrlo. Mon’xanchê gotint jieun,

⁸lhan’vik vinômr To zalo. Moronn, khursachem moronn, Apnnacher ghei porian Devak To khalto zalo.

⁹Dekhunuch Devan Taka unch sorgar ubar’n vhelo ani Nanv Taka dilem soglleam nanvam-vôn vortem.

¹⁰Mhonnun atam sorv rochnna sorgar, prithver, patallant Jezuchea Nanva mukhar saxttangim vondon korum,

¹¹ani Jezu Krist Somi mhonn porgôtt korun soglleô jibô umallean Deva Bapak mhoima dium.

¹²Mhonntôch, mhojeam pritich-eamnô, hanv tumchê modem aslom tedna, tumi mhojea utrak khaltim asleat; têch bhaxen atam, hanv tumchê thaun pois astana, tumi khaltim aschi odik goroz; ani tumchi purnn suttka tumkam mellchê khatir bhieun ani kampun proitn korit ravat;

¹³kiteak mhonn’lear, Aple mogache ievzônnek lagun, tumi aunvddeunk ani vaurunk tumche bhitor vaurta Toch khud Dev.

¹⁴Jivitachea utrak thir ravun, hea sonvsarant noketram porim, tumi jigjigtat te khottê ani baskôll pinddkê modem khot-naslelim Devachim bhurgim tumi zaunche khatir gunngunni vô vivad korinastana, kitem korchem asa tem korat.

¹⁶Jivitachea utrak, tumche thirauannenuch, ki hanv nirfollim vaurunk na mhonn Kristachea Disak mhojean vhoddvik korunk zata.

¹⁷Khorench, Devak bhettoil’lea tumchea bhavartachea iodnacher mhojem-i rogot varoun somorponn korchem poddlem tôr, hanv khuxal ani tumam-soglleam borabôr hanv-ui sontosbhorit zatolom.

¹⁸Toxench tumi-i khuxal zaun mhojê borabôr sontosbhorit zaiat.

¹⁹Timotak vegim tumchê-xim dhaddunk zatolo mhonn hanv Somia Jezucher patietam; hê bhaxen tumchi khobor gheun mhojem mon somadhan zatelem.

²⁰Mhojeach kallza-monacho ani tumchi khorea monan kallji ghevpi dusro konn mhojê lagim na.

²¹Heram soglleank Jezu Kristachem poddunk na, te ap-aplench polleun asat.

²²Punn Timot koso chol’la to tumi tôr dekhlam: êk put aplea bapaichea vangdda kam’ korta, toxem tannem mhojê borabôr xubhvhortomanachem kam’ kelam.

²³Mhojem koxem cholta tem pollena fuddem, hanv taka veginch tumchê-xim dhaddunk zatelem mhonn ravtam.

²⁴Ani hanv legun rokddo tumchê-xim pavtolom mhonn mhaka Somiacher visvas asa.

²⁵Amchea bhava Epafroditak tumchê-xim dhaddchi goroz asa mhonn mhaka dislam. Mhojea vavrant ani mhojea zhuzant to mhozo vangddi zaunk pavlo; tumi taka pattoil’lo mhonnon, hanga ieun tannem mhaka adar dilo.

²⁶To tumkam soglleank polleunk axetalo, ani apunn piddest zala mhonn tumkam khobor pavli dekhun taka khônt zali.

²⁷Khorench to ekdom’ boro naslo ani morunk pavlolo, punn Devan tachi doia keli; tachich nhoi punn mhoji-i Tannem doia keli ani oxem dukhacher-dukh mhaka asona-xem kelem.

²⁸Hea pasot taka polleun tumi novean khuxal zaunche khatir ani mhojê khontint mhaka-i buzvônn mellche khatir, zata title vegim taka tumchê-xim dhaddunk odikuch hanv anvddetam, taka polleun tumi novean khuxal zatelet ani mhojê khontint mhaka-i buzvônn mellteli.

²⁹Mhonntôch Somia sovem sogllê khuxallkaien taka gheiat; tachê-osleam soglleam mon’xank man diat;

³⁰tumchean mhaka diunk zainaslo to adar diunk tannem aploch jiv sonkottant ghalo ani oso Kristachea kama khatir to morunk pavlolo.