Read Goan Konkani Fil 3 Bible Online

Fil 3 - Goan Konkani bible

Fil 3

¹Xekim, bhavam-bhoinnimnô, Somia sovem khuxal ravat. Tumkam adim boroilam tem anink êk pavtt sangunk mhojê vatten koslich addkhôll na, ani tumchich rakhônn korunk tem upkartelem.

²Team sunneank lagim gheunkuch nakat! Te khotte vavraddi! Ang katrunk bhonvtat tosle monis te!

³Ami ki sunotichi khori porza, kiteak ami Devachea Atmea vorvim Taka bhôztanv; angar kel’lê khunnecher amcho visvas na, punn Jezu Kristacher amcho obhiman.

⁴Mhojean-ui masa-rogtacher visvas dovrunk zatalo; ani konn-ui angar kel’lê khunnecher visvas tthevunk apnnak karonn asa mhonn somzota zalear, mhaka odik karonn asa.

⁵Atth disancho astana mhoji sunôt keli, hanv zolman Israelachea raxttracho, Ben’jamin’chea kullacho, Hebrevank zolmol’lo Hebrêv. Somurt pallchê babtint hanv êk Farizêv;

⁶hurben itlo bhòrlolo, ki povitr-sobhek hanvem dhumallo dilo. Somurti thaun upzota tea promannikponnachê babtint mhaka koslich chuk nasli.

⁷Heô soglleô vostu mhaka faideacheô asleô, punn atam Krista pasot teô hanvem nuksann mhonn lekhleô.

⁸Jezu Krista, mhojea Somiachi, ollokh itlea unch molachi ki Kristak jikun gheunche khatr, ani mhojeanch kornneam udexim zôddlelem, Somurti thaun upzoto promannikponn mhaka asun nhoi, punn bhavarta udexim Kristacher visvas dovortana Dev Apnnak manovlelim korta tem promannikponn mhaka asun, hanv Kristachea ekvottant hanv asche khatir, hanvem Tachê pasot sogllem soddun dilem, sogott xenn mhonn dhôrlem.

¹⁰Oxem Jezuk ollkhunk, Tachea punorjivontponnachem boll onnbhovunk, Tacheam koxttamnim vantto gheunk, Tachea mornnant Tachê-sarko zaunk: itleakuch hanv otrektam.

¹¹Hê bhaxen mel’leantlo punorjivont zaunk pavtolom mhonn mhaka bhorvanso asa.

¹²Hanv xevottak pavlom vô sopurnn zalom mhonn somzo nakat. Na! Hanv inam’ jikunk ozun dhanvot asam, kiteak heach pasot Jezu Kristan mhakach jikun ghetla.

¹³Bhavam-bhoinnimnô, jiklom mhonn somzun hanv murgottnam; punn itlench sangtam: pattim sôddlam tem visrun, fuddem asa tacheruch dolle lavun, sogllea mhojea bollan nitt xevottak hanv dhanvun vetam.

¹⁴Jezu Krista sovem voir sorgar inam’ jikunk Dev amkam apoita: to inam’ mhozo xevôtt.

¹⁵Ami bhavartant vaddlelim mon’xam mhonnon, hêch bhaxen ami chintchem; punn konnachem-i mot vegllem zalear, hem-i tumkam Dev ugddapem kortolo.

¹⁶Kitem-i zaum, ami az porian pavleanv thõi thaun teach rostean fuddem vochum-ia.

¹⁷Mhojeam bhavam-bhoinnimnô, sogllim tumi vangdda mhoji dêkh gheiat ani mhoji dêkh gheun cholteleancher dolle dovrat.

¹⁸Atam hanv sangunk vetam tem adim zaitê pavtti tumkam sangtalom, punn atam tench novean sangchem poddta; mhaka itli khônt bhògta ki mhaka roddunk ieta, kiteak mhonn’lear zaitim zannam khursar mel’lea Kristachim dusman zal’lê porim choltat;

¹⁹oslim mon’xam nisonttonak pavtelim; tim bhôztat to dêv tanchem pott; jê vostuchi tankam loz dischi asli, tichi tankam vhoddvik bhògta; tanchem dhean-mon fokot sonvsari vostuncher asa.

²⁰Punn amcho khaxa dês sorgar asa; ani sorgar thaunuch amchea Soddvonnara, Somia Jezu Kristak, ami axeun ravtanv.

²¹To hê amchê holkê kuddichem rupantor korun ti Aplê mhoimevont kuddi sarki kortolo; soglleô vostu Apnnachê adhin To korunk xokta têch podven To hem rupantor kortolo.