Read Goan Konkani Fil 4 Bible Online

Fil 4 - Goan Konkani bible

Fil 4

¹Mhonntôch, mhojeam bhavam- bhoinnimnô, kitli mhaka tumchi opurbai asa ani kitlo mhonn hanv tumkam polleunk axetam! Tumchê vixim kitlo sontôs ani obhiman mhaka bhògta! Oxem tôr, mhojeam priticheamnô, Somia sovem thir ravat.

²Somia sovem eka monachim zaunk, Euodiê kodde prarthun magtam, toxench Sintikê kodde prarthun magtam.

³Ani tum, mhojea visvaxi vangddea, tujê lagim hanv vinoti kortam, tankam adhar di: heô bailô, Klementi ani heram mhojeam sohokaream borabôr, xubhvhortoman porgottunk mhojea vangdda zhuzleat: hanchim nanvam jiveanchea pustokar boroil’lim asat.

⁴Somia sovem sodanch khuxal ravat; novean sangtam: khuxal ravat.

⁵Tumchi dulobai soglleank dixtti poddum-di. Somi ieuncho zalo.

⁶Koslech huske kaddi nakat; kallzache dhinvasnnen, soglleam tumcheam magnneamnim tumkam goroz titlem-i Devak kollit korat.

⁷Ani amchea gineana poros vorti Devachi xanti tumchim monam ani kallzam Jezu Krista sovem rakhteli.

⁸Xekim, bhavam-bhoinnimnô, kitem khorem, manachem, nitichem, nirmoll, opurbaiechem, kirtivont, gunnest ani xrestt tem tumcheam monant golloiat.

⁹Mhojê koddlem tumi xikleant titlem-i tumi korat: hanvem tumkam dileat teô chali, mhojea tonddantlem tumi aikolam tem vô mhojê vagnnukentlean tumi dekhlam tem. Hê porim amchim kallzam xantin bhôrta to Dev tumchê sovem astolo.

¹⁰Boroch vêll korun, atam tori anink êk pavtt mhojê vixim tumi novean husko dakhoila mhonn Somia sovem hanv ekdom’ khuxal zalam. Adim porian mhozo tumkam husko aslo mhonn hanv manun ghetam, punn to dakhounk tumkam soêg mellunk na.

¹¹Mhaka kitem unnem zalem mhonn hanv oxem sangina, kiteak mhojê lagim asa titleanuch sodam dhadoxi asunk hanv xiklam.

¹²Gorjecheô vostu nastana vô goroz tea-vôn odik asun jieuncho mhaka onnbhov asa; khõisor-ui ani koslê-i poristhitint jieuncho gutt hanv xiklam: upaxim ravunk vô pott-bhôr jevunk-khaunk, subham’ponnant vô lachar-ponnant jieunk, kiteak-ui hanv toear!

¹³Mhaka xokti dita tea Jezu vorvim hanv kitem-i korunk xoktam.

¹⁴Tori mhojeam koxttamnim mhaka adar diun tumi borem kelem.

¹⁵Poilinch xubh-vortoman porgottunk hanv Maxe-donientlo bhair sorlom tedna, tumchê bhair khõichêch povitr-sobhen mhaka adar diunk na: tumkam, Filipkaramnô, hi soglli khobor asa. Fokot tumi mhaka poixe dhaddun dile.

¹⁶Tesalonikent astana mhaka goroz poddli tedna, êkuch pavtt nhoi punn don pavtti tori, tumi mhaka pavleant.

¹⁷Tumcheam dananchi axa mhaka asa mhonn somzo nakat, punn udar monan kel’leam tumcheam danam udexim, tumchea ixopant ekttaim zato faido, tumkam mell’lolo mhaka zai.

¹⁸Sod’deak goroz tem ani tachê-vôn chodd mhojê lagim asa. Epafrodita kodde diun tumi dhaddlelim danam gheun hanv bhòrlolo asam. Tim danam domdomit pormollachem somorponn, Devak avoddta ani To manun gheta toslo iôdn.

¹⁹Mhozo Dev, Jezu Krista vorvim, Aplê subham’ dovlotintlem kaddun tumcheam gorzamnim tumkam pavtolo.

²⁰Oxem tôr, Devak, amchea Bapak, mhoima sasnnachea sasnnak. Amen.

²¹Jezu Kristachea ekvottant aslelea dôr-eka bhoktak noman kortam. Mhojea sangata asat tim bhavbhoinn tumkam noman kortat.

²²Soglleam bhoktancho nomoskar tumkam, bhov-korun Somra-zachea razvaddeantleam bhoktancho.

²³Somia Jezu Kristachi doiallai tumchê sovem asum.