Read Goan Konkani Kol 1 Bible Online

Kol 1 - Goan Konkani bible

Kol 1

¹Paulu, Devachê khuxen Jezu Kristacho apostl, ani amcho bhav Timot

²Kolos xarantleam bhoktank, Krista sovem amcheam visvaxi bhavam-bhoinnink, noman kortat. Deva amchea Bapakoddlii doiallai ani xanti tumkam.

³Amcheam magnneamnim tumchê khatir Devak, amchea Somia Jezu Kristachea Bapak, ami sodanch dhin’vastanv.

⁴Kiteak Jezu Kristacher tumi bhavart dovorla mhonn ani soglleam bhoktancho tumkam môg asa mhonn amkam khobor pavlea.

⁵Sorgar tumkam bhorvanso dovorlolo asa tachê thaun to bhavart ani môg nipzotat. Sotacho nirôp, mhonngê xubhvhortoman, tumkam porgôtt zalo tedna, hea bhorvanxeachi khobor tumi aikoli.

⁶Tumkam pavlem tem xubhvhortoman tumi aikun Devachi doiallai sogllea sotan tumi somzolim tea disa sun tumche modem ghoddtalem toxench sogllê kodden ak’kea sonvsarak follam diun tem vistarot veta.

⁷Hem tumkam mhojea mogachea vangddi-chakra, Epafrasan xikoilam. To amchea nanvan tumchê modem visvaxiponnan vavr korpi Kristacho sevôk.

⁸Povitr Atmeachea ekvottant tumchê modem vosta tea mogachi khobor tannench amkam dilea.

⁹Hea pasot, tumchi khobor ami aikolea tethun thaun ami sodanch tumchê khatir magnnem kortanv, ani Povitr Atmeache purnn zannvaien ani somjikaien Devache khuxeche ollok tumi gheum mhonn ami magtanv.

¹⁰Oxem Somiak favo ani soglleanch vattamnim Taka manovta toslem tumchem jivit zatelem, ani sogllea jin’sacheo boreo kornneo tumi kortelet, ani Devachê zannvaient tumi vaddon vetelet.

¹¹Tumi sosnnikaien ani mhatmeponnan cholunk, Aplê mhoimechea bollan Dev tumkam ghott kortolo.

¹²Bapak dhin’vasat anondan! Tannem tumkam bhoktam vangdda uzvadda-daiz favo kelam.

¹³Kallokachê razvoddkentli Tannench amkam suttka dili, Aplea mogachea Putachea rajeant amkam bhitôr kaddlim.

¹⁴Tachê sovem amkam mell’li amchi suttka, patkam-mafi:

¹⁵Disonaslolea Devacho Jezu khoro jivo Rupkar, rochnnam modlo To Malgoddo!

¹⁶Sorgar prithver soglleô rochnna, distat ani disonant teô, — konn-ui teô zaum: raza, pordhan, odhikari vo raj choloupi — Tachêch vorvim rochun aileat. Asa tem sorv Tachê vorvim ani Tachêch khatir rochlam.

¹⁷Khõichich rochnna rochchê adim Krist aslo. Soglleam rochnnank ektthãi korun To Apunn eklo samball’n dhôrta.

¹⁸Toch To Aple kuddi povitr sobhechem mostok. Toch povitr sobhechea jivitachi zor, mel’leam modlo Tocch To malgoddo, soglleant prothom,’soglleant poilo!

¹⁹Devsoimbachi sorv sopurnnai Tachea mon’xasoimbant aschi, oxem Devak borem dislem.

²⁰Tachech vorvim, Tannench khursar vikrailelea rogta udexim, xanti sthap’pun sorgar ani prithver asa titlem Apnna xim ektthãi korunk Devachich khuxi zali!

²¹Eka vellar tumcheam khotteam kortubank lagun tumi Deva thaun koddsorlelim asleat, ani tumcheam monam pormonnem tumi Tachem dusman zal’leat.

²²Punn atam, Tannem Apnna mukhar tumkam povitr, nixkollonk ani niropradi ubim korun dovorche khatir, Tachea Putan Aplê vinaxi kuddint bhôglelea mornna vorvim, sondhan korun Devan tumkam portun Aplê vengent ghetleant,

²³Atam tumi bhavartache buneadir thir ani ghott ravat. Xubhvhortoman mandun gheun tumkam mel’la to bhorvanso tumi halonk-ddonvddolunk dium nakat. Hem xubhvhortoman mollba khala asleleam soglleam monxam modem porgott zalam, ani hanv Paulu tacho sevok zalam.

²⁴Tumchê khatir, hanv atam mhojeam koxttamnim sontostam, ani hê bhaxen jem Kristacheam koxttank kitem unnem asa, tachem map Tachê kuddi, povitr sobhê khatir, hanv mhojêch kuddint bhorun haddtam.

²⁵Aplo sondêx purnnponnim tumkam porgôtt korunk Apnnem nemun dil’lea kamant zababdari diun, Devan mhaka povitr-sobhecho chakôr kelo.

²⁶Ho sondêx kallam-iuganchea ani mon’xakullachea orombak thaun Devan lipoun dovorlolo gutt, punn atam Tannem Apleam bhoktank to dokhôl kela.

²⁷Hea guttache kitle mhoimebhorit porzoll to videxeam modem porgott korunk Devan tankam nemle. To gutt mhonn’lear tumche sovem asa to Krist mhoimecho bhorvonso.

²⁸Jezu Krista sovem sogllim sopurnn zaunchê khatir, sogllê zannvaien soglleam mon’xank xiddkavun ani xikoun ami Heach Kristak porgott’tanv.

²⁹Heach khatir mhojê bhitôr vavurtelea Kristachea xoktivont bollan hanv ghas gheun vavurtam ani zhuztam.