Read Goan Konkani Kol 2 Bible Online

Kol 2 - Goan Konkani bible

Kol 2

¹Tumchê khatir, toxench Laodixe- iantlea loka pasot ani mhaka rup-rup kodinch polleunk na team khub-khub zannam khatir hanv koso zhuztam, tem tumi zanna zal’lim mhaka zai.

²Ani tem kitea pasot? Tanchem kalljidarponn vaddounchê khatir, ekamekachea pritimogant tankam thir korchê khatir ani Devachea guttachi soglli girestkai ollkhun tachi sopurnn somzonni tankam mellchê pasot.

³Hea Krista sovem xanneponnachim ani zannvaiechim sogllim bhanddaram liplelim asat.

⁴Bhulovpacheam punn polkeam vivadamnim konnench tumkam fosoina zauche khatir hem hanv tumkam sangtam.

⁵Kuddin tumchê thaun pois asun-ui, monan tumchea sangata hanv asam. Tumchi xist polleun ani Kristacher tumcho bhavart kitlo ghôtt asa to ollkhun, mhaka anond bhògta.

⁶Jezu Kristak tumcho Somi mhonn tumi mandun ghetla mhonntôch, Tachea ekvottant jiet ravat.

⁷Tumchim pallam Tachê bhitôr khôl-khôl riglelim asum-di. Tumchem jivit Tacher bandun haddat, ani, tumkam xikoilam toxem, tumchea bhavartant odik ghott zaiat. Ani dhin’vasnnen bhoron tumchim kallzam ieum-di.

⁸Mon’xanchea polkea xanneponnan tumkam fosoun, konnench tumkam aplea tabeant korinam zaunk chotur ravat. Oslem xanneponn mon’xam thaun tumkam pavleleam xikovnnanchi vatt dakhoita zait, vô tem tumkam srixtti choloitat team odhikariancheam nemanchea margar ghaltat zait, punn tem Kristachi zannvai nhoi.

⁹Kiteak Tachea mon’xasoimbant Devponnachi soglli poripurnntai asa,

¹⁰ani Tachê sovem tumi-i poripurnntaiek pavleant. Hem monant dhôrat: soglleam odhika-rianchem ani odhipotinchem Toch mostok.

¹¹Tachêch sovem tumchi sunôt kelea: hi sunôt mon’xachea hatan kel’li nhoi. Kristan sthaplelê, hê sunotin tumchem patki soimb sarkench kaddun uddoilam.

¹²Tumkam batism dila tedna, tumkam Tachea vangdda nikhipilim, ani teach batisma vorvim tumkam Tachea vangdda punorjivont kelim, kiteak Taka mel’leantlo punorjivont kelo tea Devachê podvecher tumi bhavart dovorlo.

¹³Tumcheam opradank lagun ani sunôt korunk naslolê tumchê kuddi pasot tumi mel’leant; punn atam, soglleam opradanchem bhogsonnem diun, Devan tumkam Tachea vangdda punorjivont keleant.

¹⁴Somurticheam kaideam-nemam pasot amcher add aslem tem rinnachem lêkh-potr Tannem kaddun uddoilem ani tem khursar khillaun tacho nas kelo.

¹⁵Oxem Tannem odhikarianchi ani odhipotinchi podvi kaddun ghetli, ani, koidi koxe Aplea zoitachea porivarant tankam vhorun, soglleam rochnnam mukhar tankam firoile.

¹⁶Tumcheam khannam-pinneam vixim, toxench porbam-utsovanchê, punovanchê, ani Sabbathachê babtint konnench tumkam nem’-kaide ghalche nhoi.

¹⁷Heô soglleô vostu fuddarak ieuncheô asleô team vostunchi savlli; sodam togpachem sot mhollear ekloch Krist!

¹⁸Apleach vadean khaltikaiechem rup ghetat ani devdutank bhôztat, ani apnnank dorxonam gheunk sôdtat tosleam mon’xam pattlean vochun, tumkam dovorlelem inam’ hogddaum nakat; oslim mon’xam aplem mon’xasoimbachem chintop dhorun gorvan bhòrleant.

¹⁹Tim mostokak ekvottlelim nant. Hea mostoka-sun akhi kudd sandheam ani gotram udexim aplem posonn gheta, ani, oxi ekvottant samball’leli, Devak zai tê bhaxen vaddot veta.

²⁰Krista borabôr morun srixtti choloitat team odhikarianchea tabeantlim tumi mekllim zaleant; oxem zalear, ozun hea sonvsarachim zal’lê porim kiteak jietat tumi ani tache nem’ kiteak manun ghetat?

²¹“Haka hat lavum naka”, “tem dusrem chakinaka”, “tem tisrem sansponaka”:

²²kosle nem’ he? Vaprun ibadd zatat tosleam vostum vixim mon’xanchê zannvaien dil’leô adnea ani xikovnnô!

²³Tankam bhailean zannvaiecho rông asot, punn hi soglli polki puza, ôrth-nasleli khaltikai, map-nasleli kuddichi donddvônn; punn patki mon’xasoimbacheô vondovnneo domaunk osle nem’ kiteakuch upkaronant.