Read Goan Konkani Kol 3 Bible Online

Kol 3 - Goan Konkani bible

Kol 3

¹Krista borabôr Devan tumkam punorjivont keleant mhonntôch, sorginchea vostunche zaum-di tumche otrek: thõi sorgar Krist Devachea uzvea hatak boslolo asa.

²Tumchem dhean-mon sorgincheam vostuncher asum-di, sonvsarantleam vostuncher nhoi;

³karonn tumi meleant ani tumchem jivit Krista borabôr Deva sovem liplelem asa.

⁴Tumchem jivit mhonn’lear Krist, ani To dixtti poddtolo tedna, tumi-i Tachê borabôr dixtti poddtelet ani Tachê mhoiment tumkam vantto melltolo.

⁵Hea pasot tumchea soimbant asat te sonvsari anvdde marun uddoiat: pozoddponn, mhelleponn, kamchar, khotteô vondovnneô, ani ti mannsugê-bhaili girestkaiechi axa — hi axa khorench mhonn’lear murtim-puttleanchi puza.

⁶Osleam vostunk lagun, Devachem aikonant tancher Tacho krôdh denvun ieta.

⁷Ani tanchê modem tumi jietaleat tedna, tumchem-i jivit toslench aslem.

⁸Punn atam hem sogllem tumi soddun diunkuch zai: rag, krôdh ani vikottai; jastiô ani pozddeô khobrô tumchea tonddantleô kodinch bhair sorcheô nhoi;

⁹Tacheam chalim soit adlem patki soimb tumi soddun dilam dekhun, ekamekak kodinch fotti marinakat.

¹⁰ani novea monxacho akar ghetla dekhun Apli purnn ollokh mello porian toch Rochnnar hea novea mon’xak odik-odik Aplea sarkeacho novo korit asa.

¹¹Hantum anink Grik ani Judêv mhonn na, sunôt kel’lo ani sunôt na-kel’lo mhonn na, porko ani zonglli monis mhonn na, gulam’ ani svotontr monis mhonn na. Asa to ekloch Krist — soglleam sovem Toch!

¹²Tumi Devan vinchun kaddlelim, povitr kel’lim ani Tachê opurbaiechim: dekhun tumi doiall-movall kallzachim, bholim, khaltim, dulob ani vhôdd sosnnikaiechim mon’xam zaiat.

¹³Dusreacher garannem korunk nimit aslear, tumi ekamekak sõsun bhogsat. Somian tumkam bhôgxileant, toxench tumi-i ekamekak bhôgsat.

¹⁴Heam soglleam sugunnancho mukutt koso, pritimôg tumchê modem vosum-di, kiteak tachê vorvim soglleam sugunna-ncho sopurnn ekvôtt zata.

¹⁵Êkuch kudd ghoddun Krist dita ti xanti bhogunk Devan tumkam apoileant; tôr hi xanti dolleam mukhar dovrun tumchem jivit choloiat. Ani Devak sodam dhin’vaxit ravat.

¹⁶Kristacho sondêx subham’ponnan tumcheam kallzamnim tthikann korum. Sogllê zannvaien ekamekak xikoiat ani budh diat. Tumchim kallzam dhin’vasan bhoron, stotramnim, gitamnim ani Povitr Atmo upzoita team gaionamnim Devachi vakhann’nni korat.

¹⁷Tumi mhonntat ani kortat titlem-i Somia Jezuchea nanvan korat ani Tachê vorvim Devak, amchea Bapak, argham diat.

¹⁸Potinnimnô, Somiachea ekvottant asleleank sobta toxem tumcheam potink khalteô ravat.

¹⁹Potimnô, tumcheam potinnincho môg korat ani tanchê thãi khoraien vagum nakat.

²⁰Bhurgeamnô, sogttant tumchea avoibapaik khaltim ravat: hem Somiak man’ta.

²¹Avoi-bapaiamnô, tumcheam bhurgeank tiddkaum nakat, na zalear tanchem mon mòddtelem.

²²Gulamamnô, tanchi xebaski zôddchea monan fokot tancho dollo tumcher asa tedna nhoi, punn sadea kallzan Somiak man diunchê khatir. tumcheam sonvsarantleam dhoniank sogttant khaltim ravat

²³Tumi kortat titlem-i, mon’xam khatir nhoi punn Somia khatir, sogllea kallzan korat.

²⁴Mozuri koxi tumkam dovorlelem daiz Somi tumkam ditolo mhonn ugddas dhôrat. Kiteak, khorench mhollear, tumi chakri kortat ti Kristachi, amchea Somiachi.

²⁵Peleak vaitt korta taka apleam vaitt kortubank favo ti khast melltoli. Kiteak Dev mon’xachem tondd pollenam.