Read Goan Konkani 1 Tes 1 Bible Online

1 Tes 1 - Goan Konkani bible

1 Tes 1

¹Paulu, Silvan ani Timot Deva amchea Bapachea ani Somia Jezu Kristachea ekvottant asa tê Tesalonikechê povitr-sobhek noman kortat. Devachi doiallai ani xanti tumchê sovem asum.

²Thambonastanam amcheam magnneamnim tumcho ugddas korun, tumam-somestam pasot ami sodanch Devak dhin’vastanv.

³Tumcho bhavart kornneamnim tumim dakhoilo, koxtt korun mogan tumi vavurleant, ani Krista amchea Somia Jezucher bhorvanso dovrun tumi thir ravleant; hem amchea Deva ani Bapa mukhar amchea monant ghott asa.

⁴Mhojeam bhavam-bhoinnimnô, tumi Devachê opurbaiechim ani Tannem tumkam Aplim zaunk vinchun kaddleant mhonn ami zannonv.

⁵Ami tumkam xubhvhortoman porgott kelam: tem fokot utramnim nhoi punn Povitr Atmeachea bollan kel’leam khunnamnim; tea vellar hea sondexachi amchi purnn khatri-i ami tumkam dakhoili. Ani tumcheach boreak tumchê modem ami koxe chol’leanv tem tumi borim zannont.

⁶Tumchê pallien tumi amchi ani Somiachi dêkh ghetli ani Devachem utor sobar koxttam-dogdam modem Povitr Atmeachê khuxalkaien tumi oxem mandun ghetlem,

⁷ki Maxedonient ani Akaient soglleam bhavarteank tumi êk nomuno zaleant.

⁸Hôi, Somiachem utor, tumchê udexim nhoi fokot Maxedonient ani Akaient gazot gelem; punn sogllê kodden tumi Devacher bhavart dovorlo mhonn khobor pavli; oxem he vixim ami kitench sangchi goroz na.

⁹Tumi kitlo boro ievkar amkam dilo, ani jivea ani khorea Devachi chakri korchê khatir koxim tumi murti-puttle sanddun

¹⁰ani ieuncho asa tea krodhantlim nivarta tea Jezuk Tannem mel’leantlo punorjivont kelo ani sorgar thaun ieuncho asa teach Jezu, Tachea Putachi, tumi vatt polleun asunk tumi Devaxim vollon aileant mhonn toch lôk sangta.