Read Goan Konkani 1 Tes 2 Bible Online

1 Tes 2 - Goan Konkani bible

1 Tes 2

¹Bhavam-bhoinnimnõ, tumkam ami bhett dili ti nirfôll zali na mhonn tumi zannont.

²Tumchê-xim pavchê adim Filipi xarant amkam tras diunche diun kosle okman kele te tumi zannont. Devachem xubhvhortoman tumkam porgottunk khub addkhollink amkam fuddo korcho poddlo, punn hi porgôttnni korunk amchea Devan amkam dhir dilo.

³Ami tumkam ulo marla zalear, sotachi vatt ami sôddli mhonn nhoi, kosleach burxeponnak lagun nhoi, tumkam fosounchea monan-ui nhoi.

⁴Portench zalear, xubhvhortoman amchê adhin korunk Devak borem dislem dekhun, ami Tacho nirôp ditanv. Ani mon’xank nhoi punn amchim kallzam topasta tea Devak manonk amcho êkuch hetu.

⁵Amchem ulouop kednanch fuslavnnechem zalem na mhonn tumi besborim zannont; vô kallzant duddvachi koslich axa dhorun ami ulounk nanv: hacho govai Dev.

⁶Kristache apostl[1] zaun-ui tumcher amcho bhar ghalunk amchean zatalem khorem. Tori ami mon’xam koddcho man zoddunk sodunk na, zaum tumchê koddcho, zaum heram koddcho. Punn tumchê modem ami dulobaien vagleanv, ani apleam bhurgeam-ballank opurbaien postelê ani ballgitelê avoiê bhaxen ami zaleanv.

⁸Amchea kallzant tumcho itlo môg rigla ki Devachem xubhvhortoman tumkam diunchê diun, amcho jiv porian tumkam diunk amkam vhôdd khuxi asli: itlim tumi amkam opurbaiechim zaleant!

⁹Ami kosle koxtt kaddtaleanv ani koxe harpit zataleanv, hacho, bhavam-bhoinnimnô, tumkam ugddas asa; tumchê modlea konnakuch zodd zaina zaunk, tumkam ami Devachem xubhvhortoman porgôtt’taleanv tedna, dis-rat ami vavr kortaleanv.

¹⁰Bhavart mandun ghetleleam tumam sorim koxê bhaxen osôl bhoktichi, promannikponnachi ani nixkollonk zali amchi vagnnuk, hache tumich govai, ani tumchê borabôr Dev-ui.

¹¹Bapui apleam bhurgeank vagoita toxench ami tumchê modlea zonn-eklea sorim kelem mhonn tumi zannont.

¹²Aple mhoimêbhorit Rajeak Devan tumkam apoileant dekhun, Taka man’ta toslea jivitachi chal dhorunk tumkam ami vinonti keli, dhir dilo ani nettan ulo marlo.

¹³Devak nirontorim dhin’vasunk anink ek karonn hem: amchê koddsun tumi Devacho nirôp ghetlo tedna, mon’xanchem utor koxem to tumi manun ghetlo na, punn Devachem utor koxem; tôr tem khorench Tachem utor ani tumam bhavarteam modem aplem boll dakhoit asa.

¹⁴Bhavam-bhoinnimnô, Jezu Kristachea ekcharant Judeiant asleleam povitr-sobhank ghòddlam tem tumkam-i ghòddlam; kiteak mhonn’lear, jem tãnnim Judevam koddsun bhôglem, tench tumi-i tumchê kulliecheam bhavam-bhoinnim koddsun bhôgchem poddlem.

¹⁵Judevamnim Somia Jezuk ani provadeank jivexim marle ani amkam-i dhumallo dilo. Him tanchim kortubam Devak koxêch bhaxen manonant, ani oso Judêv lôk sogllea mon’xakullak add zaunk pavla.

¹⁶Videxeank taronn-mellto Devacho sondêx porgottunk amkam ho lôk addaita. Hê bhaxen soglleam tancheam patkanchem map bhoron ailam. Xevottak Devacho krôdh tancher denvun aila.

¹⁷Tôr, bhavam-bhoinnimnô, ami thoddoch vêll tumchê thaun pois asleanv tedna — kallzan nhoi, punn fokot tumchê nodrê thaun pois — zata titlê vegim tumkam tondda-tonddim polleunk kitle mhonn ami axetaleanv!

¹⁸Tumkam bhett diunk zaite ami proitn kele; hanvem, Paulun, komich zalear don pavtti tori oxe proitn kele, punn Soitanan mhaka addailo.

¹⁹Amcho bhorvanso ani amcho sontôs konn dista tumkam? Ani Jezu amcho Somi ietolo tedna, Tachê mukhar amchê vhodd-vikecho mukutt konn?

²⁰Tumich nhoi tim? Khorench, amcho obhiman ani amcho sontôs tumich!