Read Goan Konkani 1 Tes 3 Bible Online

1 Tes 3 - Goan Konkani bible

1 Tes 3

¹Hea khatir, amchem mon anink somadhan zaina zaun, Atenant hanv ekloch ravcho mhonn ami tharailem.

²Oxem astam, ami Timotak tumchê-xim dhaddlo: to amcho bhav ani Kristachem xubhvhortoman porgôttchea vavrant Devacho chakôr. Tôr tumkam ghottai diunchê khatir ani tumcho bhavart thiraunchê pasot ani

³oxem, tumi bhôgtat team koxttam-dogdam modem konnuch halchona. Osli piddapidd Devanuch nirmil’li amchi gôt mhonn tumi zannont.

⁴Tumi koxtt-dogd bhôgche poddtele mhonn tumchê modem ami asleanv tedna ami tumkam sangunuch dovorlelem, ani toxench ghòddlem mhonn tumi pollelam.

⁵Teach pasot, amchean anink ravum nozo zaun, tumchea bhavartachi khobor gheunk mhonn ami Timotak dhaddlo: Soitanan tumkam eka vellar naddlim zait ani sogllo amcho vavr nirfôll zala zait mhonn amkam vhôdd husko zalo.

⁶Atam tumkam bhett diun Timot amchê-xim porot ailo ani tumchea bhavarta ani pritimoga vixim tannem amkam bori khobor dili. Tumi sodanch moipasan amcho ugddas kortat mhonn, ani zoxem ami tumkam polleunk axetanv, toxench tumi-i amkam polleunk otrektat mhonn tannem amkam sanglam.

⁷Ani ani hea pasot, bhavam-bhoinnimnô, tumcho bhavart polleun amcheanch soglleam oddchonnimnim ani koxttam-dukhim modem tumchê vorvim amkam dhir mell’lo.

⁸Tumi Somia sovem ghott ravleant mhonntôch, atam amkam novo jiv bhòrla.

⁹Tumkam lagun, ami amchea Deva mukhar itlo vhôdd sontôs bhôgtanv tea khatir, tumchê vixim amchean koxem mhonn favo tê porim Devache upkar attounk zait?

¹⁰Tumkam rup-rup polleunk ani tumchea bhavartak kitem unnem asa tem bhorun diunk amkam favo kôr mhonn ami dis-rat kallzant thaun Tachê lagim magtanv.

¹¹Khud Dev amcho Bap ani amcho Somi Jezu ami tumchê-xim pavo-xem korum.

¹²Ami tumcho môg kortanv titlo vhôdd tumcho môg ekameka thãi ani soglleam mon’xam thãi Somian odik-odik vaddoum.

¹³Soglleam Apleam bhoktam borabôr Jezu amcho Somi ietolo tedna, amchea Deva ani Bapa mukhar tumi xud’dh-nirmoll aschê khatir, toch Jezu tumchim kallzam povitrtaient thir korum.