Read Goan Konkani 1 Tes 4 Bible Online

1 Tes 4 - Goan Konkani bible

1 Tes 4

¹Xekim, bhavam-bhoinnimnô, Somia Jezuchea nanvan ami tumkam vinoti kortanv ani poratun magtanv tem hem: Devak manonk koxê bhaxen tumi jieunk zai tem tumi amchê koddlem xikleant; toxim tumi jietat khorem, punn tumchem jivit odik ani odik sudharunk vavrat.

²Somia Jezuchea nanvan ami tumkam xikovnn dilea ti soglli tumi tôr zannont.

³Devak zai tem hench: tumi povitr zal’lim. Kamchar tumi pois korcho;

⁴Devachi ollokh nasleleam raxttram porim tumi kuddicheô vondovnneô bhagouncheô nhoi, punn zonn-eklean povitrtaien ani mannsugen aplê potinnichea sangata jieunk zanno zaunchem.

⁶Hê babtint konnench aplea bhavak onit korum noiê ani taka fottoun tacho adav kaddum noiê. Ami tumkam adim hem kollit kelam ani Deva mukhar oxi xiddkavnni dilea: osleam soglleam patkeank Somi khast laitolo.

⁷Devan amkam kamchari zaunk nhoi, punn povitr zaunk apoileant.

⁸Mhonntôch, jim konn hê xikovnnechi beporva kortat, tim mon’xanchi nhoi punn tumkam Aplo Povitr Atmo dita tea Devachi beporva kortat.

⁹Ekamekachea pritimoga sombondim ami tumkam borounchi goroz na; tôr ekamekacho pritimôg korunk Devan tumkam xikoilam;

¹⁰ani akhê Maxedonient soglleam bhavam-bhoinnim thãi tumi oxem korun aileant-uch. Tori astana, to odik-odik vaddot vochum-di mhonn ami tumchê lagim magtanv.

¹¹Ami tumkam sanglam toxem, xantin jieunk vavrat, zonn-eklean ap-aplem kam’ korchem, ani tumche hat-pãi zhoroun pott bhôrat.

¹²Oxem korun dusro lôk tumkam man ditolo, ani tumcheam gorzank konnachich modôt magunk tumkam poddchi na.

¹³Bhavam-bhoinnimnô, bhorvanso-nasleleam ieram mon’xam porim tumi khontibhorit zaina zaunk, morun geleant tanchê vixim sot tem tumi zanno zal’lim mhaka zai.

¹⁴Jezu melo ani punorjivont zalo mhonn ami tôr sotman’tanv, têch porim Jezucher bhavart dovrun meleant tankam Dev Tachê borabôr haddtolo.

¹⁵Ami tumkam atam xikoitanv ti Somiachich xikovnn: ami, jivim asanv tim, Somiachea ienneak Dev ozun jivim dovortolo tim, morun geleant tanchê adim Somiachea sangata aschim nanv.

¹⁶Kiteak hukum’ porgôtt zatolo, Mha-devdutacho tallo gaztolo ani Devachi tuturi vazteli; tedna Somi Apunn khaxa sorgar thaun denvtolo, ani Kristacher bhavart dovrun meleant tim poilim punorjivont zatelim:

¹⁷uprant ami jivim asteleanv tim, Dev ozun jivim dovortolo tim: Kristak ontrallar mellchê khatir, amkam tanchê borabôr kupancher uklun vhortele. Oxem ami Somiachea sangata asteleanv sodam-sodankal.

¹⁸Mhonntôch, him utram monant dhorun, ekamekak ghottai diat.