Read Goan Konkani 1 Tes 5 Bible Online

1 Tes 5 - Goan Konkani bible

1 Tes 5

¹Bhavam-bhoinnimnô, hem kedna ani khõichê ghoddier ghòddtolem tê vixim ami tumkam borounchi goroz na.

²Kiteak chôr zoso ratcho ieta, toso Somiacho Dis ietolo mhonn tumi besborim zannont.

³“Sogllem xant asa, koslich bhirant na!” oxem mhonntat thõich astana, ravonaslelem nisontton tancher ietelem: zoxeô ballonteracheô dukhi êkê gorbest bailecher okosmat ietat, toxem tem nisontton pavtelem, ani tantlo konnuch suttcho na.

⁴Punn to Dis chôr koso ieun tumkam sampddaunk, tumi, bhavam-bhoinnimnô, kallokant nant;

⁵tumi sogllim uzvaddachim mon’xam, disachim mon’xam; ami ratichim ani kallokachim mon’xam nhoi.

⁶Mhonntôch, heram mon’xam bhaxen ami nhidun aschim nhoi, punn zagrut ravum-ia ani sogttant moriad samballum-ia.

⁷Nhidtat tim ratchim nhidtat, ani bebdikai kortat tim ratchi bebdikai kortat.

⁸Punn ami disachim mon’xam ani amchem jivit moriadichem zaunchem. Amchi shhat’ti rakhpachem hatiar zaum-di amcho bhavart ani pritimôg; toxench tokli rakhunk amchem xirastronn zaum-di soddvonnecho bhorvanso.

⁹Kiteak ami Aplea krodhak sampoddchim mhonn nhoi, punn amchea Somia Jezu Krista udexim ami soddvonn gheunchi mhonn amchê sorim Devachi ievzônn.

¹⁰Jezu ietolo tedna ami mel’lim vô ozun jivim asum, Tachea ekvottant ami jieunchê khatir To amchê pasot melo.

¹¹Mhonntôch, zoxem tumi korun aileant, toxench ekamekak dhir diat ani ekamekacho bhavart ghôtt korunk vavrat.

¹²Bhavam-bhoinnimnô, tumchê modem koxtti vavr kortat ani Somiachea nanvan tumchê voir odhikar choloitat ani tumkam bori budh ditat tankam manan lekhat;

¹³Tanchea vavrak lagun tankam vhôdd man ani opurbai dakhoiat. Tumchê modem xantin cholat.

¹⁴Bhavam-bhoinnimnô, xist nasloleank xiddkaiat, bhezuddank dhir diat, osoktank boll diat, soglleam sorim sosnnikaien cholat.

¹⁵Konnench dusreak vaitt vaittan farik korina zaunk chotrai dhôrat, punn zata titlem borem korat, zaum tumchêch modem ekamekak zaum soglleam heram mon’xank.

¹⁶Sodanch khuxal ravat.

¹⁷Thambo-nastanam magnnem korat.

¹⁸Ani khõichê-i poristhitint argham diat, kiteak Jezu Krista sovem oxem korun tumi Devachi khuxi palltat.

¹⁹Povitr Atmeak addkoll ghallinakat.

²⁰Provadeanchea sondexachi beporva korinakat;

²¹punn sogllem topasun kaddun, kitem borem tem ghott samballat.

²²Sogllê torechem vaitt pois korat.

²³Xanti dita to Dev tumkam sopurnnaien povitr korum; ani Jezu Krist amcho Somi ietolo tea Disak, tumcho otmo jiv ani kudd To chuki virêt samballum.

²⁴Tumkam apoileant To Apunn visvaxi dekhun To tem kortoloch.

²⁵Bhavam-bhoinnimnô, amchê-i pasot magat.

²⁶Soglleam bhavam-bhoinnink tumchea mogachi khunna diat.

²⁷Hem potr somest bhavam-bhoinnink vachat mhonn Somiachea nanvan hukum’ ghaltam.

²⁸Amchea Somia Jezu Kristachi doiallai tumchê sovem asum.