Read Goan Konkani 2 Tes 2 Bible Online

2 Tes 2 - Goan Konkani bible

2 Tes 2

¹Amchea Somia Jezu Kristi-ennea ani Tachê bhonvtim ami sogllim zom’pa pasot, to Somiacho Dis atanch pavlo mhonn, amcheach udexim dil’lea porim, bhakitan vo utran vo chittin, tumchem mon, bhavam-bhoinnimnô, sompeponnim ghusponk dinakat mhonn vô tumi akantonakat mhonn ami tumchê lagim magtanv.

³Koxei toren konnench tumkam fosounk dinakat. Kiteak akhea sonvsarar lôk Devacher virudh poilo upraslea bogor, ani Khotto to, xirap poddlolo, dixtti poddlea xivai, to Dis ieuncho na.

⁴Deva-virodhi to hoch! Lôk dev mhonn manta vô bhôzta titleacher-ui to uprastolo; itlench nhoi, Dev zal’lê porim apunnuch dakhoun Gabhareant xinvasonar bostolo.

⁵Tumchê modem aslom tedna hem sogllem hanv tumkam sangtalom mhonn tumkam ugddas asa kai na?

⁶Nemlolea kalla adim to dixtti poddonam zaunk kitem taka addaun dovorta, tem-i tumi zannont.

⁷Gupit bollan khotteponn korta tem kam’, atam addaun dovorta to na zai porian, gupit bollan kotteponn korta tem kam’ korit asach.

⁸Tedna mat Khotto to ugtim dixtti poddtolo. Somi Jezu Aplea tonddachea bafan tacho jiv kaddtolo ani Aplea ienneachea dobajean tacho nas kortolo.

⁹To Khotto Soitanachê podven ietolo, ani sogllê torecheô bollvont kornneo, fottkirim ojapam ani vismitam korun dakhoitolo;

¹⁰ani ibadd zaunchim asat tankam sotacho môg korun apli soddvonn gheunk tankam naka zalem dekhun, to tankam sogllea jin’sachea khotteponnan fosoitolo.

¹¹Hea pasot sot nhoi tachem boll Dev tancher denvoita ani tankam fôtt mandun gheunk pavoita.

¹²Hê porim, sot mandun gheunk na punn khotteponnak lobdoleant titlim-i khastichea formonnak sampoddtelim.

¹³Devachê opurbaiecheam bhavam-bhoinnimnô, tumchê vixim Taka sodanch ami dhinvasunk favo; kiteak amkam povitr korta tea Povitr Atmea udexim ani sot bhavartan mandun gheun soddvonn gheunchê khatir, Devan tumkam soglleam-vôn poilim vinchun kaddleant.

¹⁴Ami tumkam porgott kel’lea xubhvortomana udexim, Jezu Krista, amchea Somiachê, mhoiment vantto gheunk Devan tumkam apoileant.

¹⁵Mhonntôch, bhavam-bhoinnimnô, thir ravat ani zaum amche tonddim zaum amchea potran tumkam xikoileat tim sotam ghott samballat.

¹⁶Amcho môg kela ani Aplê doiallaien amkam soronaslolo dhir ani thir bhorvanso dila to Dev, amcho Bap, khud Jezu Krist amcho Somi tumcheam kallzank dhir dium ani sogllê torecheam boream kornneamnim ani utramnim tumkam thir ani ghott korum.