Read Goan Konkani 1Tim 1 Bible Online

1Tim 1 - Goan Konkani bible

1Tim 1

¹Ami bhorvanso tthevtanv teach Jezu Kristache ani Deva amchea Soddvonnarache hukume pormonnem, Jezu Kristacho apostl hanv Paulu,

²bhavartant mhojea khorea puta, Timotak noman: Deva amchea Bapachi ani Jezu Krista, amchea Somiachi doiallai, konnvallai ani xanti.

³Hanv Macedoniek vetalom tedna tuka hanvem sanglelem toxem, tum Efezantuch rav. Thõi kãi zannam khotti xikovnn ximpddaitat; tankam tunvem bond korchim.

⁴Toxench, polkeam kanniancher ani purvozacheam vonxavollincher dhean-mon dovrun vêll ibaddinakat mhonn tankam sang. Bhavarta vorvim Devachi ievzônn fuddem vheche bodlek, osleam vostumnim polke vivad mat upzotat.

⁵Mhojê xiddkavnnecho hetu ho: xud’dh kallzantlo, nitoll ontoskornnantlo ani osôll bhavartantlo upzota toslo pritimôg amchê modem vaddounk.

⁶Kãi zannam hem sogllem sanddun ani dusri vatt dhorun naka zal’leam vivadank sampoddleant.

⁷Oslim mon’xam Somurt xikounk fuddem sortat, punn sangtat tem apunnuch somzonant, ani aplench khorem korunk sôdtat, te-i vixim, tim kãich nokllot.

⁸Somurt bori mhonn ami sogllim zannonv, punn ticho favo to upêg kelearuch.

⁹Kaide boream mon’xam pasot korunk nant mhonn monant dhôrchem; te kaido moddteleank ani fiturank, Devak mandinasleleank ani patkeank, Dev-bhirant nasleleam ani fotting mon’xank keleat; toxench apleam avoi-bapaink jivexim marteleank ani her prannghatkeank; bhoxttavnneam ani povitr vostunchi bhidda nasleleam mon’xam pasot;

¹⁰soddeam ani apleach lingacheam mon’xam kodde pozoddponn korteleam pasot, mon’xank chorun vhorteleam pasot, lobaddeam ani lottik soput gheteleam mon’xam pasot, ani rokh-borea xikxonnacher koxê-i bhaxen add veteleam pasot.

¹¹Hem rokh-borem xikxonn mhonn’lear ami vornnitanv tea Devachea mhoimêbhorit xubhvhortomana pormannem asa tem, ani hem xubhvhortoman Devan mhojê adhin kelam.

¹²Jezu Kristak, amchea Somiak, hanv dhin’vastam, kiteak mhojê adhin kel’lea kamak Tannem mhaka boll dilem. Mhaka khatrecho mhonn dhorun, Aplê sevek Tannem mhaka nemlo.

¹³Jezuchi hanvem adim ninda kel’li, Taka dhumallo dil’lo ani Taka okman kel’le. Tori Devan mhoji kaklut keli, kiteak mhaka bhavart naslo tedna nokllo zaun hanvem toxem kelem;

¹⁴ani mhojea Somiachi doiallai mhojer ufallun aili, ani Jezu Kristachea ekvottant jieteleanchea bhavartachi ani bhavam-bhoinninchea pritimogachi bhorti mhaka mell’li.

¹⁵Sogllê khatrechi ani soglleamnim manun ghevpachi sangnni hi: Jezu Krist patkeank soddvonn diunk hea sonvsarant ailo, ani team patkeantlo paxtt patki hanv. Punn mhaka kaklut mellunk karonn hem:

¹⁶Teach pasot Somia Jezun soglleam-vôn chodd mhojê sorim Apli xim’-mer nasleli sõsnnikai dakhounchê khatir, Devan mhoji kaklut keli; hê bhaxen jim konn Jezucher bhavart dovorun sasnnik jivit gheunchim aslim, tankam hanv êk nomuno zaunk.

¹⁷Tor kallam-iuganchea Raiak, ovinaxi ani amkam disonaslelea ekleach Devak, man ani mhoima sodam-sorvodam! Amen!

¹⁸Timot, mhojea puta, tujê vixim provadeamnim ucharleleam utram pormannem, tuka oso updês ditam: tanchea uzvaddan cholun boro soinik koso tum zhuztoloi;

¹⁹bhavart ani nitoll ontoskornn samballun, tum tem zhuz zhuztoloi. Aplem ontoskornn kuxin kaddun dovorlem dekhun, kãi zannam, tanchea bhavartachem tarum futtun, buddlim.

²⁰Tanchê modem Himenêv ani Aleksandr; Devninda korchi nhoi mhonn tankam gomun ieunchê khatir, tankam hanvem Soitanachê adhin keleat.