Read Goan Konkani 1Tim 2 Bible Online

1Tim 2 - Goan Konkani bible

1Tim 2

¹Patkeank soddvonn diunk, hea sonvsarant Jezu Krist ailo mhonnununch, sogllea adim, Devachi bhokti ami purnntaien korchê khatir ani soglleam modem favo ti moriad ami samballchê khatir, amkam xantin ani sovostkaien jieunk mellche khatir, somest mon’xam khatir razam ani odhikaream pasot magat; hanv magtam tem hench: prarthonam, magnnim, ani vinoti korat ani dhin’vasnni diat;

³Oxem korun ami borem kortanv ani hem Deva, amchea Soddvonnarak, man’ta,

⁴Soglleam monxank soddvonn mell’leli ani somestank purnn sotacho onbhov mell’lolo Taka zai, Kiteak Dev Ekloch; Deva ani monxam modekot Modest-ui Ekloch To Khud’ Monis, Krist Jezu. Somestanche soddvonneche mol mhonnun, Tannem Apnnachench somorponn kelem. Hich govai Tannem iukt vellar dili.

⁷Ho nirôp porgottunk ani videxeank khoro bhavart xikounk Devan mhaka apostl nemlo; sot tem uloitam, fôtt sanginam.

⁸Hea pasot kosloch rag dhorinastana ani sogllo vad-vivad sôddun, veta thõi dadleamnim povitr hat ubarun magnnem kel’lem mhaka zai.

⁹Toxench bailamnim tankam sobta tê bhaxen moriadin ani mannsugen nhesun ieunchem; mudialle kens korche nhoi; bhangar-xringar, mannkam-motiam ani unch molachim vostram ghalun ieunchem nhoi.

¹⁰Bhoktivont bailank sobta toslo, boream kornneancho zaum-di tancho xringar.

¹¹Zap kaddinastanam, sogllê nomrutaien bailen xikovnn gheunchi.

¹²Xikovnn diunk vô dadleacher odhikar cholounk hanv bailek rojia dina. Ti ogi ravchi.

¹³Kiteak Devan Adanvak poilo rochlo, magir Evek;

¹⁴ani Adanv fosovlo na, punn bail ki fosovli ani Devachi adnea tinnem môddli.

¹⁵Moriadin bhavartant, pritimogant ani povitrponnant thir ravtit zalear, bhurgeank zolm ditana, Dev bailancho samball kortolo.