Read Goan Konkani 1Tim 3 Bible Online

1Tim 3 - Goan Konkani bible

1Tim 3

¹Hi sangnni khatrechi: zo konn sobhecho fuddari zaunchi axa ballgita, to borea kamachi axa ballgita.

²Punn fuddari sobhê mukhar guneanv naslolo zauncho. To êkê bailê lagim logn zal’lo, olfobhozonni, somjikaiecho, porkeank moipasan ghevpi, ani xikovnn diunk iukt zaunk zai.

³To soreak lobhdol’lo vô tiddken zollta toslo zauncho nhoi, punn dulôb; to zhogddekar vô girestkaiechê axecho zauncho nhoi,

⁴punn aplem kuttumb borê bhaxen choloita ani apleam bhurgeank apnnak khaltim dovorta ani borê dekhin lhan-vhodd korta toslo.

⁵Kiteak zôr konn-êk aplea kuttumbacho vhoddil zaunk nokllo, tôr to Devachê povitr-sobhechi mhenôt koso ghetolo?

⁶To halinch bhavart-dhôrlolo zauncho nhoi; na zalear to gorvan fulon devcharachea khastichea formonnak sampddot.

⁷Tea bhair, bhailea loka modem to borê abrucho zaunk zai; na tôr, to aplem nanv hogddait ani devchara-chea fasak sampddot.

⁸Têch bhaxen, prodhan-sevok manest monis zaunk zai; te don tonddanche zaunche nhoi, nhoi mhonn chôdd soro pietat tosle, vô mhellê zoddiechê axeche.

⁹Bhavarta udexim prokaxit-onbhovik zal’lea sotak nitoll ontoskornnan tannem thir rauchem.

¹⁰Poile tankam topasun kaddche, ani tanchê sovem kosloch guneanv mellonam zait tôr, tannnim ti seva korchi.

¹¹Têch porim bailô manacheô zaunk zai. Teô chaddiô sangpi zauncheô nhoi, punn olfobhozonni, ani soglleam vostumnim khatrecheô.

¹²Prodhan-sevok êkê bailê lagim logn-zal’lo monis zaunk zai, apleam bhurgeank ani apleam kuttumbank sarke choloitat tosle.

¹³Prodhan-sevokanchi seva te borê bhaxen kortit zalear te sobhê modem apnnank vhôdd man zôddtole, ani Jezu Kristacher dovorcho asa to bhavart vhodda kalljidarponnan porgottunk pavtele.

¹⁴Hem tuka borounchea vellar hanv tujê-xim veginch ietolom mhonn ravtam;

¹⁵punn mhaka lambai zait zalear, Devachea kuttumbant koxê bhaxen cholchem tem tunvem zanno zaunchem mhonn hem atam boroitam; aminch hem kuttumb, jivea Devachi povitr-sobha. Hi povitr-sobha Devan ugddapem kel’lem sot. Toch tem zotnaien samballta ani thiraien rakhta.

¹⁶Ami bhoktin vonditanv to gutt dubhavavinn xrêxtt-ut’tôm’: Amchea soimban To dixtti poddlo, Atmo Tacho sakxidar zalo, devdutamnim Taka vondilo, videxeank-ui To porgôtt zalo, xekan’xek prithvecheam lokancho bhavart Tacher asa tthevlolo, mhoimen Taka ubarun vhelo.