Read Goan Konkani 1Tim 4 Bible Online

1Tim 4 - Goan Konkani bible

1Tim 4

¹Xevottachea kallar kãi zannam, khotteam atmeank ani devcharan-cheam xikovnnank kan diun, bhavart soddun vetelim: oxem Povitr Atmean spoxtt sanglam.

²Heô xikovnnô fottkiream mon’xanchea dhongeponna udexim ieteleô; tancheam ontoskor-nnancher devcharan dag diun aplo xik’ko marla.

³Tim amcheam bhavam-bhoinnink logn addvartat ani thoddeô vostu khauncheô nhoi mhonn xikoitat; punn soglleô khavpacheô vostu ami khaunk mhonn Devan rochleat, ani Devacher bhavart dovrun sot ollkhotat tannim teô vostu Devak dhin’vasun gheuncheô.

⁴Devachi dôr-êk rochnna bori, ani Devak dhin’vasun ti gheunchi zait zalear, koslich khavpachi vôst naka mhonnchi nhoi,

⁵kiteak Rochnnar Devachea utran ani amchea dhin’vas-nnechea magnnean sogllem khann Devak somorpil’lem zata.

⁶Bhavartachea ani sodam pallun ailai tê rôkh-borê xikovnnechea posonnan tum ghôtt zalai. Tôr hanvem voir sanglam tem sogott bhavam-bhoinnim mukhar ghalun, Jezu Kristacho tum boro sevôk zatoloi.

⁷Devachê bhoktik upkaronant tosleô naka-zal’leô xamaicheô kanniô pois kôr. Devachê khorê bhoktint vaddonk proitn korit rav.

⁸Kuddichê kosrotik thoddo faido asa khoro, punn Devachi bhokti soglleak upkarta, tôr tantum atanchea ani fuddlea jivitak bhasavnni asa.

⁹Sogllê khatrechi ani soglleamnim mandun gheunk favo tosli sangnni hi:

¹⁰Jivo Dev akhea mon’xakullacho ani vixexponnim Tacher bhavart dovortat tancho Soddvonnar; Tacher dovorlolo asa amcho bhorvanso, ani heach pasot ami koxtt kortanv ani zhuzot asanv.

¹¹Heô adnea ghalun tankam xikovnn diit rav.

¹²Tum tornnê piraiecho mhonn konnench tuji beporva korum noiê. Punn tum tujeam utramnim toxench tujê chalin, tujea pritimogan, visvaxiponnan ani nirmoll jivitan bhavarteancho nomuno za.

¹³Hanv iein porian, sobhek Povitr Pustok vachunk, updesunk ani xikovnn diunk lokx di.

¹⁴Provadi tujê vixim uloile ani zannteamnim tujer hat dovorle tedna Devan tuka dil’lem dennem tujê sovem asa; tachi beporva korinaka.

¹⁵Sangleat team vostum vixim suddsuddit zaun teo pallit rav, ani tuzo vikas sogllea lokak ugtim dixtti poddtolo.

¹⁶Kitem kortai ani kitem xikoitai tachê vixim chotrai dhôr; hantum thir rav; oxem korun, tuka ani tujem utor aikoteleank Dev soddvônn ditolo.