Read Goan Konkani 1Tim 5 Bible Online

1Tim 5 - Goan Konkani bible

1Tim 5

¹Zanntea dadleak zupatti dinaka, punn tujea bapai sorim kortolo asloi toso taka ulo kôr; tornneam mon’xank te tuje bhav zal’lê porim vagoi;

²zannteam bailank avoiô koxeô vagoi, unnê piraiecheam bailam lagim sogllê mannsugen teô tujeô bhoinni zal’lê porim chol.

³Konn na team vidvank manan vagoi.

⁴Konn-êkê vidvek bhurgim vô natram astit zalear, hãnnim poilê svater apleam ghorcheam sovem apli zababdari dakhounk xikchem ani apnnank zolma haddleleank zata tê bhaxen aplem rinn farik korunk zanno zaunchem. Hem Devak man’ta toslem kam’.

⁵Punn zôr konn khorich vidva ani tika konnuch na, tinnem Devacher aplo bhorvanso dovorlolo asa ani ti dis-rat vinoti ani magnnem korit asa.

⁶Punn ji vidva fokot kuddichem sukh bhogunk sôdta, ti jivi asun-ui melea mhonn mhonnum ieta.

⁷Guneanva-meklleô teô zaunchê khatir hi xikovnn tankam di.

⁸Konn apleam soiream-dhaireancho, odik korun apleanch ghorcheancho, samball korinant zalear, tãnnim bhavart sôddla ani tim eka onbhavartea poros paxtt.

⁹Êkê vidvechem nanv vidvanchê xivdder ghalunk, tika satt tori vorsam aschim ani ti eka poti kodde logn zal’li zaunchi.

¹⁰Ticheam boream kornneam pasot tinnem apnnak borem nanv zôddlelem aschem; apleam bhurgeam-ballank rit-rovixen vaddoileant, porkeancho apnnager poramôs kela, bhoktanche pãi dhuleat, oddchonnink sampoddleleank adar dila, sogllea jin’sacheô boreô kornneô keleat, tosli ti zaunchi.

¹¹Tea-vôn unnê piraiecheam vidvanchim nanvam xivdder ghalinaka; kiteak Kristak bhasavnni kelea uprant, tancheô kuddicheô vondovnneô vaddtat tedna, teô logn zaunk sôdtat, ani poilim dil’lem utor moddunk pavtat ani oxem guneanvkarnni zatat.

¹³Tea bhair, bekar ravunk ani ghoran’ghor bhonvunk xiktat; ani bekar ravunkuch nhoi, punn chaddiô sangunk, dusreanchea jivitant ghusunk ani naka zal’lem ulounk-ui xiktat.

¹⁴Hea pasot, tornnê piraiecheam vidvamnim novean logn zaunchem, bhurgim zolma haddchim, aplem ghor-dar korchem, ani amcher vaitt ulovpak dusmanak sondi diunchi nhoi: oxem mhaka zai.

¹⁵Thoddeô tosleô bhavart soddun Soitanacho pattlav korunk geleô.

¹⁶Konn-êklê bhavarti bailecheam soiream modem vidva asat zalear, tinnench tancho samball korcho; ani povitr-sobhecher tancho bhar ghalcho nhoi; oxem povitr-sobha konn-nasloleam vidvancho samball korunk pavteli.

¹⁷Aplo odhikar borê bhaxen choloitat team povitr-sobhecheam zannteank dupêtt mozuri diunchi, bhov-korun utor porgottunk ani xikovnn diunk ghas ghetat tankam.

¹⁸Tôr Povitr Pustok sangta: “Môlltolea paddeachea tonddak muskem ghalchem nhoi”; ani dusrê kodden tem sangta: “Vavraddeak aplo muxaro favo.”

¹⁹Dogam vô tegam zannanchê govaikê virêt eka fuddarean-cher koslem-i garannem manun ghenaka.

²⁰Chovkoxi korun zancho guneanv ruzu zala, tankam soglleam hujir bobatt kôr; oxem herank-ui bhirant lagteli.

²¹Deva ani Jezu Krista mukhar, toxench Tacheam vinchleleam devdutam hujir, hanv tuka oso hukum’ ghaltam: konnacheach tonddak pollenastana vô konnakuch favo-naslolo upkar kori-nastana, heam kaideank pallo di.

²²Doddvoddan konnacher-ui hat dovrinaka, ani dusreanchea patkacho bhagidar zaum naka. Tujem jivit nitoll-nirmoll zaum-di.

²³Tujê jirvonnek ani bhonvun-bhonvun tuka ieta tê piddek lagun hea fuddem udokuch pieun ravum naka, punn thoddo-so soro-i ghe.

²⁴Thoddeam mon’xanchim patkam, zhôddti zaunchê adinch spoxtt distat; heranchim patkam fokot zhôddtechea disa ugtim zatat.

²⁵Têch bhaxen mon’xancheô boreô kornneo spoxtt dixtti poddtat; punn toxem ghoddonam zalear-ui, teô sodanch lipon urum nozo.